Ramma Hte Ahkying Aten ( Youth Program )

Ya na tsa ban 21 hta, lawan ai hku galai shai nga ai hpe anhte ramma ni yawng mu chye nga sai rai nga ai hte maren, bawng ring rawt jat wa nga sai lam ni hpe mung, n-hkan dep lu ai daram rai wa nga ai. Ndai zawn galai shai nga ai hte maren, anhte ramma ni mung tinang a prat magam, makau grupyin ni hte, shinggyim nga sa lam madang ni, mung dan hpe rawt jat galu kaba wa hkra gaw sharawt lu ai ni rai nga hpe mung, chye da nga ai hkrai rai nga ai. Ndai zawn byim na matu, anhte nang ngai ramma ni, tinang myit lawm ai hpaji lam hta, ahkying aten hpe mai kaja hkra jai lang ai hku nna, galai shai rawt jat wa ra nga ga ai, dai   galai shai rawt jat wa na matu, tinang a aten hpe jai lai ai kaw grai nan ahkyak lawm nga ai lam chye da ra na rai nga ai.

Shawng n-nan hku nna, anhte ramma ni a lapran, Nrau Ai ngu ai ga hkum hpe, na ga, tsun shaga yu ai ni hkrai  rai na re. Byim da masa tara gaw, anhte ni yawng hpe, hkying hkum 24 hpra jaw da ai hte, shajan nlu ai ni hkrai rai nga ai. Ndai zawn hkying hkum 24 laman, tinang a ahkying aten hpe gara hku akyu nga hkra jai lang sa na ngu ai a ntsa, langai hte langai a, awng dang ai lam ni, shai hkat nga wa ai hpe myit yu chye na ra nga ai. Dai majaw tinang lu la da ai aten kadun laman mai kaja hkra jai lang let du mayu ai pan dung de du hkra sa wa na gaw, nang ngai ramma ni yawng a lit magam nan rai nga ai. Ya na prat anhte ni yawng chye ai hte maren, Internet,lam yan ni gaw, ramma ni a lapran  mying gum hkawng let, kaji kaba yawng ngu na daram jai lang nga ma ai re. dai zawn sha, lam yan shagu hta gaw, maikaja ai hte, nkaja ai gaw, rau run rai nga ai hpe mung chye da nga ai ni hkrai rai nga ai. dai zawn sha, ndai  internet lam yan ni jai lang ai lam hta, dai zawn sha rai nga ai. ya ten hta, anhte myanmar mungdan ni hta mung, hpaji lam a matu, internet ni hpe jai lang ai ni nlaw nga ai gaw, lahpawt hpa rai nga ai, law malawng gaw, tinang a manu dan ai ahkying aten ni hpe majoi shalai kau ai ni rai nga ai hpe mu lu nga ia, ndai zawn mabyim masa ni gaw, tinang a makau grupyin hpe sha hkum tsun, tinang a prat a matu, awng dang rawt jat wa na matu pyi yak wa nga ai madang rai wa nga ai hpe myit dum sa wa ga ngu n-gun jaw mayu ai.

Maga mi maga yu ga nga yang mung, tinang gaw, ladat hpaji mungkan hta nga taw nga ai masha rai nga ai majaw, ladat hpaji hte, kung kyang wa hkra, shakut hkawm sa na mung ra ahkyak nga ai. Dai zawn rai yang, anhte ramma ni law malawng, game gasup let, ten htum ndum, madu hkum pyi sadi ra ai lam ndum ai ni byim mat chye nga ga ai. Bai laika hpaji hti hka ja ai akyang lailen nnga ai ni law nga ai madang hpe mu lu nga ai. Dai zawn laika hpaji hpe hkaja shakut na ten ni hpe, tinang a computer game ni ntsa sha aten jaw, myit maju jung nga ai majaw, tinang a hpaji lam ni hta, hpang hkrat shangun ai madang du hkra, akyang nang mat ai ni hpe mu ga, na ga ai mung anhte ramma nang ngai ni yawng sha rai nga ga ai. Dai sha n-ga, ya na prat ramma ni law malawng gaw, hkum dek smart phone lang ai ni hkrai rai wa nga saga ai. ndai zawn phone ni hpe jai lang let, tinang a manu dan dik ai ahkying aten ni hpe mai kaja ai magam ni hta, akyu jashawn jai lang mai nga ga ai. Tsun mayu ai gaw, tinang a magam bungli galaw ai hku mi rai rai, n-galaw ai mi rai rai, ten nga ai ahkying hta, nre ai lam yan hku ten jahtum na malai, tinang a phone hpe jai lang let, ga hpan kung kyang wa na matu hka ja ai lam ni hta laga majat hpaji law law ni hpe  hti hkaja matsing ra ai gaw, tinang a shani shagu na lit magam nan rai nga ai law.. Bai Tsawra ai ramma ni, htum mat wa ai ahkying aten ni hpe bai lu mayu tim, bai nlu ai sai lam gaw anhte nang ngai yawng chye da tara langai rai nga ai. Dai majaw Aten Nlu Ai ngu tsun taw nga na malai, tinan a ahkying aten hpe jai lang masa lam hpe san jep yu na matu ndai shara kaw madi madun n-gun jaw shadum mayu nngai. dai hta tsawra ai ramma ni, 1. tinang a lani mi na ten hta, aten kade daram tinang a prat hpaji lam a matu jai lang nga ai kun? 2. Aten kade daram, tinang a magam bungli a matu, jai lang sai kun? 3. Aten kade daram wa tinang a makau grupyin ni hpe hka ja nga ai kun ngu ai zawn re ni hpe mai myit sawn yu mai nga ai , jahtum hku nna, mungdan langai bawng ring rawt jat kalu kaba wa na matu, dai mungdan a ningbaw ningla tai na ni rai nga ai, anhte nang ngai ramma ni a ntsa madung rai nga ai. Dai majaw, tinang a kadun la ai ndai ahkyin aten laman tinang a, prat, makau grupyin, shinggyim nga sa madang, mungdan bawng ring lam ni rawt jat wa na lam ni hta, teng man ai hku hpran lajang let, mung dan a matu akyu gun hpai lu ai mung masha kaja, ramma kaja, kashu kasha kaja ni byim tai lu wa mu ga ngu yaw shada let

#youth

#rvakachinservice