San Columban Jau Hpung Gawde hpang ai 100 ninghpring Jubili Poi hte Deacon Marai (5) a Jau Shatai Poi galaw na lam hte seng ai Zuphpawng galaw

Myitkyina Sasana, Ginwang up Wa Saradaw Francis Daw Tang lam matsun woi awn ai hte maren, San Columban Jau Wuhpung Gawde hpang ai (100) ning hpring Chyeju Shakawn Jubilee Poi hte Deacon marai (5) a Jau Shatai Poi galaw na hte seng ai zuphpawng hpe 2018 August shata 27 ya shani, Aung Nan San Columban Nawku Htingnu, Ginjaw Mung Bawng Rung kata kaw galaw lai wa ai.

Zuphpawng hta Ginwang up Wa Saradaw hte Jau ,Ma Ma ni, Ginjaw Mungbawng Hpung Ningbaw, Amu Madu hte Jau Ginwang shagu na seng ai ai Jau Ma Ma,Tarahkaw Sara ni ,Saradaw Ginwang kata na Commission hpung na ni sa du shang lawm let, Poi hpe gara madang hku galaw sa wa na lam, Poi Shabyin Shata Main Komiti hte Sub Komiti ni hpaw  la na lam ni hpe  bawngban jahkrup ai lam galaw ai.

Dai hte Maren, Jubili Poi kaba hte Jau Shata Poi hpe 2018 November shata 16 hte 17 ya shani, San Luka Edin Chyum Jawng Wang kaw  galaw na matu tau nau masat da sai hte, Poi hpe awngdang ai hte galaw lu na matu, Poi Shabyin Shatai Komiti hte Sub-Komiti ni hta  lawm ai masha ni hpe tara shang mying hti lit jaw shatsam da lu sai rai nna Poi Logo hte seng ai lam, Poi hta shalawm mat wa  na  lamang ni hte Jubili poi alu hte seng ai lam ni hpe jahkrup bawngban la lu sai  rai nga ai.

San Columban Jau Wuhpung hpe 1918 ning November shata hta Hpaw Hpang ai lam Vatican kaw nna masat da sai hte dai ning 2018 November shata hta 100 tup hpring sai hte Maren, Chyeju Madu Columban Jau ni hpe shakawn shagrau ai Poi hte Myitkyina Saradaw Ginwang kata hta Jau nnan (5) mung bai lu la na rai nga ai Jubili Poi kaba hpe 2 ya tup Htunghking Manau ,Yungwi Pyinra lamang ni ,Labau hte seng ai Madun Gawk ni hte rau wu wu di di galaw sa wa na re ai lam ,du wa na September shata 21 ya shani lahkawng lang ngu na shabyin shatai Komiti Zuphpawng hpe  matut galaw na re ai lam chye lu ga ai.

Thomas Mung Hpan