“Du Sa Ladaw” Du Shang Wa Sai Raitim, Covid -19 Chyam Bra Ana Tsin-Yam Hkrum Sha Nga Ding Yang

Mungdan Asuya gaw Chyam bra ana tsin-yam kaw nna lawt lu na matu lam amyu myu hku shakut shaja nga ai. Makam Masham hpung shagu na hpung woi hpa-awn ni hte hpaji ninghkring ni mung akyu hpyi ai hte ladat amyu amyu shaw shakut nga ma ai. Raitim, coronavirus gaw chyam bra hkawm ding yang rai nga ai.

Hkristmas holidays aten mung ni wa sai majaw mungdan Asuya hte Nawku makam masham hpung shagu kaw nna mung Covid -19 makawp na matu ndau shabra laika ni hkuk shapraw ndau da masai.

Wa Sarabyin Francis kaw nna mung Covid -19 tsin-yam hkrum hpang ai aten kaw nna matut manoi shadum n gun jaw ai lam, akyu hpyi nga ai lam, de a matu garum madi shadaw ya nga ai lam ni aten ladaw masa hta hkan nna mungkan masha ni hpe lam woi ya nga ai.

Daining na Nawku Daw Jau Shaning gaw Covid 19 tsin-yam kaw nna lawt lu na matu makawp da ai lam kata nawku daw jau lamang ni hpe galaw sa ra na kun? Ndai zawn re masa hta anhte ni gaw Karai Kasang a nhtoi shingkang hpe shadan shadawng lu na lam gaw hpa rai ta?

Yawng a matu mai kaja lam hpe madung da nna mungdan Asuya hte makam masham hpung ni hku masat da ai lam kata Karai Kasang hpe nawku daw jau let ra kadawn ai ni hpe garum mai ai masa hta lu lawm ai hpaji, ladat, sutgan ni hte rau akyu hpyi garum ya na gaw ahkyak nga ai.

Ndai Du Sa Ladaw hta  “Myit Mada Shara” hpe shada garan gachyan ya ra ga ai. Du Sa Ladaw gaw “Ngwi Pyaw Simsa Lam Kaba” hpe myit mada lu ai ka sadi hte ningnan hpang ai ladaw rai nga ai.

Chyam bra ana du shang wa ai aten kaw nna nan mungdan shagu na mung shawa masha ni yawng gaw sadi maja nga ma ai rai nna, seng ang ai ni mung makawp maga tsi mawan ni hpe hpe laja lana rai sawk sagawn nga ma ai. Ana kanu kap masha ni hpe yu reng tsi lajang ya nga ma ai. Hkam ja lam a matu sadi maja nga ma ai hte, sut masa lam n hkrat sum na matu mung sadi maja let, dai lam ni hta awng dang lu na matu machyi hkam, aten ma hkam, sutgan ma hkam ai ni mung law law galaw nga ma ai.

Ndai Du Sa Ladaw hte Hkristmas Ladaw gaw, katsi la ai ndai n-shung ta hta Hkye la Madu Yesu Hkristu du sa ai gaw n-sin chyip re ai mungkan ga hpe myit mada shara jaw ai hpe shadum ya nga ai.

Covid – 19 tsin-yam makawp na matu mungdan Asuya Hkam Ja Dap hte Myanmar Mungdan Ginsup Hkringmang Dap Daju” kaw nna masat matsun da ai hkan sa ra ai lam ni hte seng ai ndau laika htuk shapraw da ai hpe mahta nna, “Myanmar mungdan Saradaw wuhpawng kaba” CBCM kaw nna masat ya da ai nawku daw jau lamang ni hpe hkrak tup hkan sa na matu RVA Jinghpaw Nsen Shapoi Dap, magam gun ni hku nna ndai jahpra dat ga nngai.

Ireland kaw na Saradaw Kaba, Archbishop Martin gaw shi a mungdan na hpung masha ni hpe “shani shagu n-law htum minute (5) sha gaw simsa ai hku nga let Du Sa Ladaw a lachyum hpe sumru nna wenyi lam hta shakung shangang shakang la ga,” ngu saw shaga da ai hpe Vatican kaw nna ndau da ya ma ai hpe mu hti lu ai hpe garan gachyan ya ga ai.

Shani shagu na Misa Hkungga hpe mung bat langai ya shani kaw na bat kru ya shani lapran, jahpawt daw hkying 6:30 a.m., Laban shani hta jahpawt daw hkying 8:00 a.m., kaw RVA Kachin Page kaw nna live shapoi ya nga ga ai hta, mawn mawn shang lawm nga ga ngu Wa Saradaw Francis Daw Tang kaw nna n gun jaw saw shaga nga ding yang re ai hpe nu wa hpu nau ni hpe bai kahtap shadum dat ga ai.

Du Sa Law hte Hkristmas Ladaw hta Hkristu Madu hpe myit mada let “Nawku Daw Jau Lamang ni hta shang lawm, akyu hpyi ai lam hta shakut, mai kaja magam bungli hpe galaw ap nawng, Covid- 19 tsin-yam kaw nna mung lawt, ngwi pyaw simsa ai lam hpe madu lu mu ga akyu hpyi ya let,

Hkristu a magam hta,

RVA Nsen Shapoi Magam Gun Ni

Yawng hpe Karai Kasang Shaman ya u ga!

Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/church/news/2020-11/advent-in-a-time-of-pandemic.html