Saradaw Kaba Cardinal Charles Bo A Mungga: "Nu Maria Mara N-kap ai Na-um Na-sin Poi"

Tsawra ai Nu Wa hpu nau ni,

Karai kasang a shaman chyeju nanhte yawng langai hpra a ntsa a nga nga u ga.

Dai ni nanhte a man hta ngai du tsap nga ai aten, nanhte a makam masham kaba ai lam hpe ja ja shakawn shagrau mayu nngai. Shawoi shaning hkan nga yang, Nyaung Lay Pin Nu Maria poi de hpung masha ni tsa lam kaba hku nna  shaning shagu sa du shang lawm ma ai. Nanhte a makam masham kaba ai lam gaw Myanmar mungdan kata na kaga Hkristan ni a matu n gun lu hpa makam masham sakse hkam ai lam nan tai nga ai.

Myanmar mungdan de sasana du shang wa ai shaning 500 ning Jubilee poi kaba hpe Yangon mare kaba hta galaw ai shaloi mung sharawng shara kabu gara myit hte nanhte shang lawm lai wa ma ai. Wa sarabyin Myanmar mungdan de du gawan sa ai shaloi hta mung tsawm htap ai nanhte a htung hkying bu hpun palawng ni hpe mawn sumli bu hpun let poi lamang ni hta shang lawm lai wa ma ai majaw mungkan a man hta hkik hkam ai poi lamang tai lai wa sai re. Wa sarabyin hkum nan mung, nanhte a kaba la ai makam masham hpe shakawn shagrau lam galaw ya mayu ai majaw, shawa Missa hkungga kaba hta Jinghpaw mungdaw kaw nna galaw ya ai sagu rem sumdoi hpe nan lang nna Missa hkungga nawng ya lai sai rai nga ai.     

Tsawra ai nu wa hpu nau ni e, dai ni anhte a matu nambat langai ahkyak dik htum gaw “Myitkyina saradaw ginwang a matu akyu hpyi ra ai” ngu ai lam rai nga ai.

Wa saradaw kaba Pawlu Zinghtung Grawng a makoi mayang ai poi de anhte sa du hpawng lai ai aten hta mung, ndai anhte a saradaw ginwang a matu Wa saradaw kaba matut nna akyu hpyi htinglu ya nga rit ga ngu nna anhte akyu hpyi lai wa ga ai.

Ndai saradaw ginwang a matu shakut shaja ap nawng magam gun hpai lai wa sai Wa saradaw Francis Daw Tang hpe mung, dai ni anhte chyeju dum ra ga ai. Ndai saradaw ginwang rawt jat galu kaba wa hkra shakut shaja lai wa sai Wa saradaw Francis Daw Tang a chyeju ni anhte a ntsa law law nga nga ai. Wa saradaw Francis a matu matut nna akyu hpyi ya nga ga.

Dai ni, Chyoi pra ai Nu Maria a mara nkap ai nau-um na-sin hkam la ai poi hpe anhte galaw nga ga ai. Covid 19 ana zinli mang hkang a majaw mungkan ting grai yak hkak ai lam ni hkrum nga ga ai aten mung rai nga ai. Velanganni Nu Maria, Hkamja lam a Nu Maria poi hpe grai hkam sham myit kaba hte galaw ai ni nanhte rai nga ma ai ngu ai hpe mung ngai chye nga nngai. Machyi kaba hkrum nga ai mungkan ga hpe tsi shamai ya rit ngu nna Nu Maria a lata hta ap ya ga. Shut hpyit ai lam hta na lawt lu na matu chyu sha nrai, majan manghkang, hpyen yen tsin-yam manghkang, matsan tsin-yam manghkang, zinli ana manghkang, ndai lam ni mahkra kaw nna shalawt ya rit ngu nna Nu Marai kaw garum hpyi ga. Nu Maria a akyu hpyi htinglu ya ai lam a marang e anhte a myit masin hta mung, anhte a saradaw ginwang hta mung hkum tsup ai kabu gara lam ni lu la u ga akyu hpyi ga.

Nu maria a prat hpe yu dat yang, shi gaw anhte zawn sha matsan mayan ai jan re. Hpaji law law mung nchye ai. Arawng aya lu ai kun dinghku hta nga kaba wa ai jan mung n rai nga ai. Ndai zawn yu maya sha re ai jan hpe “Chyeju nga lit ga, nang a lu ndai, dai Madu gaw nang hte rau nga nga ai law” nga nna   Lamu kasa Gabriela tsun ai lam hpe dai ni na Kabu Gara ai shiga ja chyum mungga hta na lu nga ga ai.

Nu Wa hpu nau ni, ndai mungga hpe nanhte hkum shagu a masin salum hta rawng nga shangun mayu ai. Kaning re ai ru yak manghkang lam ni hpe mi anhte hkrum nga ga ai raitim, “Chyeju nga lit ga, nang a lu ndai, dai Madu gaw nang hte rau nga nga ai law” nga nna anhte hkum shagu hpe dai Madu a lamu kasa tsun nga ai. Anhte gaw hkaw hkam kasha ni nrai, sahti kasha ni mung nrai ga ai; raitim mung tsawra ai Madu karai kasang a kasha ni rai nga ga ai, ngu ai lam hpe dum chye ai rai yang, Nu Maria zawn, “Nye wenyi ngai hpe hkye la ai Madu Karai Kasang hta kabu gara li ai, Shi a mayam jan a myit gyip ai hpe shi mada yu nu ai; Yu u, ya kaw nna shu mashi shu masha prat dingsa, ngai hpe a lu ai, ngu na ma ni ai” ngu nna anhte tsun mai nga ga ai.

Nu Maria hpe hkap la shakawn shagrau na matu, myit nhkawn ai Hkristian hpung ni mung nga ma ai. Raitim mung Nu Maria chyawm gaw, kadai hpe mung n ging hka ai sha yawng hpe hkap la lakawn ya nga ai.

Nu Maria a prat hte dai ni anhte a mabyin bung ai lam ni law law nga nga ai. Nu Maraia gaw sut masa matsan ai kun dinghku kaw nna yu maya masha langai sha rai nga ai. Shani shagu ra ai malu masha, lang ra ai arung arai ni lu la hkra, Ma Yesu hpe bau sin ya ai kawa San Yawsep hte shan lahkawng shani shagu magam bungli galaw ra ai. Anhte law law dai ni hkrum nga ai zawn sha Egutu Mung de hpyen yen hku nna hprawng hkawm lai wa ra ai. Tinang a buga de bai du wa ai shaloi mung, hpyen yen tsin yam hkrum masha zawn nga ra ai. Ndai zawn re ai matsan mayan ai kun dinghku hta Madu Yesu nga kaba wa ai rai nga ai.

Raitim mung ndai matsan mayan re ai kun dinghku hpe Karai Kasang shaman chyeju law law jaw ya ai. Anhte myit ai hte Karai kasang myit ai lam nbung nga ai. N gun ja atsawm rawng ai ni hpe shagrit kau na matu yu maya masha hpe Karai kasang lata la ai.

Dai ni Chyoi pra ai Nu Maria a mara nkap ai nau-um na-sin hkam la ai lam hpe anhte myit sumru yu let akyu hpyi nga ga ai aten, Nu Maria a Sasana magam hte anhte a Myitkyina Sasana a mabyin hpe myit shachyaw la na matu grai nan htap htuk nga ai.

Nu Maria galaw nga ai lit lamang ni gaw:

• Shamai shatsai ya ai lam lit magam,
• Htingram shapri shanem ya lam,
• Kabu gara ai shiga hkaw tsun ai lam,
• Shinggyim masha ni hkrum nga ai ru yak nchyi nmu lam ni hta shang lawm hkam sha ya lawm nga ai lam,
• Shinggyim masha ni hkye hkrang la hkrum lu mu ga matu hkye hkrang la ai magam bungli lam ni rai nga ai.

Htingram shapri shanem ya lam, ngu ai hta, anhte a npawt kanu yan kawa a shut hpyi mara a majaw shinggyim masha hte Karai kasang a lapran na ga shaka hten run mat wa sai. Ndai hten run mat wa sai Karai kasang hte anhte shinggyim masha lapran na kanawn mazum lam hpe bai htingram ya ai lam hpe Madu Yesu galaw ya ai. Nu Marai gaw ndai htingram ya lam galaw ya ai Madu Yesu a kanu nan rai nga ai. Dai ni anhte jawm hpawng nga ga ai aten ndai htingram hkat lu lam shaman chyeju a matu akyu hpyi ga. Karai kasang hte pri nem ra ai, makau grup yin shingra tara hte htap htuk ai kanawn mazup lam nga ra ai, bai grau nna ahkyak ai lam langai gaw anhte shada da a lapran pri nem ai kanawn mazup lam lu la na matu akyu hpyi ra ai ngu ai lam rai nga ai.

Anhte shada lapran ngu ai hta, tinang a kun dinghku kata, wuhpung wuhpawng hte jau ginwang ni kata, bai saradaw ginwang kata hta pri nem htap htuk ai ganawn mazum lam ni nga ra ai.  

Kun dinghku kata hta nju ndawng lam ni nmai nga ai. shada da mara raw ya hkat let Chyoi pra ai htinggaw zawn mai kaja ai kanawn mazum lam ni kun ding hku hta nga nga hkra gaw gap ra ai. Wuhpung wuhpawng, jau ginwang kata ni hta mung, shada htingram hkat ai shapri shanem hkat ai lam ni nga ra ai.

Saradaw ginwang madang hta mung pri nem ai kanawn mazum lam, htingram hkat lam ni nga ra ai. 1 Kor 12:27 hta “Ya nanhte gaw Hkristu a hkum hkrang rai nga ai hte, langai hte langai de a daw shan ni rai nga myit dai,” nga nna kasa Pawlu tsun ai zawn, saradaw ginwang ngu ai gaw, kun dinghku langai rai nga ai. Anhte a Myitkyina Saradaw ginwang hta Karai kasang a shaman chyeju ni law law hkam la lu nga ai. Anhte Kachin Wupawng sha ni gaw hkyik hkam ai amyu sha ni re; shawang tsawra myit kaba ai, shinggyim sari hpe ahkyak shatai makawp maga chye ai.

Bai, yak hkak jam jau lam ni law law hkrum ai Saradaw Ginwang mung rai nga ai. Gashaka dingsa, Pru Mat wa ai laika hta na zawn, ndai Saradaw Ginwng na masha ni majan manghkang, hpyen yen manghkang, ka ni nang hpam manghkang, lamu ga zing la hkrum ai manghkang, bawm manghkang, asak naw ram ai ramma ni htingbu mungdan ni de pru hkawm mat wa ra ai, num ma ni dut sha hkrum ai, ndai zawn re ai law la ai mang hkang ni hpe hkrum nga ra ai saradaw ginwang mung rai nga ai. Law la ai yak hkang manghkang lam ni hpe hkam jan manga lu na atsam gaw Karai kasang kaw na sha lu la na rai nga ai. Dai re majaw, lai wa sai ten na myit n-pyaw hpa n-hkrum n-ra lam ni hpe shapri shanem hkat let myit mada shara hte hpring ai shawng lam kam maka hpe lu la hkra shakut ra na ga ai.

Ndai Saradaw Ginwang gaw, shaman chyeju n-hprang sut rai law law hte hpring ai buga mung rai nga ai. Lagat ntsin hte nga chyu lwi ai, shaman chyeju hpring ai buga nan rai nga ai. Lagat ntsin hte nga chyu lwi ai mungdan de woi sa wa ya na, nga nna Ga Shaka Dingsa Chyum Laika hta shi a amyu masha ni hpe Karai Kasang ga sadi jaw ai lam law law lang mu mada nga ga ai. Shi a amyu masha ni a lapran myit hkrum gahkyin dum din lam, shada shapri shanem htingram hkat lam ni nga nga na hpe Karai kasang ra sharawng nga ai. Karai kasang ra sharawng ai lam, anhte hpe saw shaga nga ai Karai kasang a nsen hpe madat nna hkan sa nga ga.

Nu Maria gaw shamai shatsai ya ai jan re.

Ndai poi nhtoi hta anhte a myit masin, wenyi, hkum hkrang shamai shatsai ya ai lam hkam la lu la matu akyu hpyi ga. Shi gaw anhte a matu tut e akyu hpyi htinglu ya nga ai. Anhte a kun dinghku, wuhpung wuhpawng Saradaw Ginwang hpe shamai shatsai ya u ga akyu hpyi ga.

Nu Maria gaw Karai Kasang a mungdan lam hpe hkaw tsun shachyam shabra ai jan mung rai nga ai.

Mungga rai nga ai Madu Yesu hpe shi a hkritung hta gun ai jan sha n rai, dai mungga, dai Madu hpe shi a asak aprat hte hkaw tsun ai jan mung rai nga ai. Ndai Myitkyina Saradaw Ginwang, kade nna yang Sasana shachyam shabra lam hta grai n gun kaba ai, grai awng dang ai Saradaw Ginwang tai wa na hpe ngai shingran mu nga ai. Mungdan kata na kaga Saradaw Ginwang ni de sha n rai, maigan mungdaw ni de du hkra Sasana shachyam shabra lu ai Sarada Ginwang tai wa na re. Bai anhte Kachin, wunpawng ni gaw ndai mungdan hta sha n rai, mungdan masum hta nga nga ai, ngu ai lam hpe mung myit dum nga ga. Mungdan lamu ga jarit hte anhte myu sha ni garan ging hkan da hkrum nga ga ai raitim, Karai kasang a mungga a marang e anhte gahkyin gumdin nga lu na rai ga ai.

Nu Maria hte Udang hpe mung garan ginghka nmai nga ai.

Nu Maria gaw wudang hpe galoi mung shingdu gayin kau lam n galaw ai. Wudang hpe galoi mung shi sharawt mada yu nga ai. Nu Marai hpe kam hpa ai ni kadai mung, yak hkak jam jau hkrum ai aten hta Nu Maria hpe mu mada lu na re, nchyi nmu hkrum ai aten shi anhte a matu akyu hpyi htinglu ya na rai nga ai. Shi a kasha Madu Yesu a marang e, lak lai ai shaman chyeju ni anhte a matu shi shabyin ya na re. Kasha Madu Yesu a marang e, shamai shatsai ya lam, shapri shanem lam, myit hkrum gahkyin gumdin lam ni hpe Nu Marai shabyin ya nga u ga.

Chyeju kaba sai.

Cardinal Charles Maung Bo.      

#rvakachinservice