San Pra Ai Ni A Labau, August 04, 2018

San Pra ai John Marie Vianney a Labau

Nu wa Hpunau ni, San pra ai Wajau John Marie Vianney a lam hte seng nna, Wenyi makam masham lam hta yawng a matu akyu tai u ga matu, gam garan ya mayu n ngai.

Nu wa hpu nau ni, August shata praw (4) ya shani gaw Chyoi pra ai Catholic nawku hpung kawn nna, masat da ya ai, San Pra ai John Vianney a poi nhtoi shani mung rai nga ai. Bai nna, lak lai ai langai mi gaw, n dai san pra ai John Vianney a poi nhtoi hta, Mungkan mungdan jut shara shagu hkan Sasana magam gun nga ai ginwang up Jau ni a poi nhtoi ngu, masat shagrau da ai lam rai nga ai. Shingrai, San pra ai John Vianney gaw, madu a shaning 1786 ning, May shara 8 ya shani, Francis mung, Lyions mare makau na, da-da-li ngu ai kahtawng hta, makam masham ngang kang ai, kawa Mahte hte kanu Maria Belize yan kaw nna, shangai wa ai rai nga ai. Shi a kanu gaw, tsawra hkungga gying ai dinghku kanu langai rai nhtawm me, dai kahtawng na shayi num sha ni gaw, shi hpe grai tsawra hkungga kasi yu la shajang ma ai.

Dai zawn kang ka ai kanu a sharin shaga ai npu hta, nga kaba wa ai John Marie Vianney gaw, myit kup ai masha langai byin tai wa ai sha n ga, kanu zawn sha Madu Yesu hte Chyoi pra Nu Maria hpe, grai tsawra kam hpa chye ai wa rai nga ai. Shi manang ni hte ginsup chyai nga ai aten hta pi, jahkring hkring Madu akyu hpyi ga hte Ave Maria akyu hpyi ga ni tsun rai, manang ni hpe akyu hpyi woi awn chye ai wa rai nga ai. Kalang mi mung John Vianney mat mat ai majaw, hkan tam yu yang, shara mi kaw zim rai, lahput hput di let, akyu hpyi nga ai hpe sa mu la ma ai. John Vianney gaw, asak (13) ning hta, mara raw chyoi pra hkum hpe shawng nnan hkam la ai shani, Madu Yesu hpe grai tsawra ai myit hte hkam la nna, shi a asak aprat ting, myit masin wenyi yawng hpe, Madu Yesu hte Nu Maria a lata hta, ap tawn da nu ai. Shi asak (18) ning hta, Jau tai mayu ai majaw shi a kawa kaw ahkang hpyi ai shaloi, kawa myit nhkrum ya ai majaw, grai yawn let, Karai Kasang kaw, shi a kawa myit malai lu u ga, ja ja akyu hpyi nu ai.

Shingrai Karai Kasang a chyeju hte asak (20) ning hpring ai shaloi, Jau tai na matu, kawa gaw shi hpe ahkang jaw ai sha n ga, kawa hkum nan kasha hpe Ekole mare na, Bar-le ngu ai Jau a lata hta sa ap da nu ai. John Vianney gaw dai jawng kaw hpaji sharin nga yang, bawnu nyan marai ningra ai hte maren, laika hka na grai yak la nga nu ai. Shi hta sak grau kaji ai jawngma ni a jahpoi asawng ai hpe mung hkam sha ra nu ai. Laika gade hti shakut ai raitim, matsing na nyan, nlaw la ai majaw, sharin ya ai sara ni pi myit htum wa ai du hkra rai nga ai. John Vianney gaw, myit ru myit kaji ai hta lai nna, nyan marai shaman jaw ya rit nga nna, Karai Kasang kaw sha akyu hpyi nga nu ai. Dai shaloi shawng de na ram n-yak ai sha, loi li matsing hkraw wa nu ai. Dai zawn shakut nga yang, Francis mungdan na tara ubadi hte maren, asak aprat ram sai ramma shadang sha shagu, hpyen magam gun hpai ra ai lam, amying pru wa sai. Kaja wa sha sak prat ram sai John Vianney mung, 1809 ning, October shata (26) ya shani, hpyen dap de shang mat wa nu ai.

1810 ning hta gaw, mung masa bai kaja wa sai re majaw, John Vianney mung hpyen dap na pru nhtawm me, nta buga de bai nhtang wa lu nu ai. 1811 ning hta, Va-rai-ya mare na, Jau tai jawng kaji hta bai matut lung lu nu ai. Ndai Jau tai jawng kaji gaw, myit masa su hprang hpaji sharin la ai aten rai nhtawm me, laika grai wa nlu hkan ai raitim, shi a si mani mai kaja tsawm htap ai arawn alai hte myit su myit kup la ai majaw, Jau kaba ni kaw nna, grai madang tsaw ai jawng de matut lung lu na ahkaw ahkang jaw dat ma ai. John Vianney gaw laika sharin hkam la ai lam hta, lanyan ai raitim, si mani tsawm htap ai arawn alai, Karai Kasang hpe tsawra kam hpa chye ai majaw, ginwang up Saradaw a ahkang hte 1815 ning, August (12) ya shani, ayak ahkak rai, Jau tai aya hkam la lu nu ai.

Jau tai ai hpang, makam masham hten bya nna, nga sat nga sa madang hpang hkrat ai masha ni nga ai, Ars” ngu ai nam kahtawng kaw magam lit gun hpai na, lit shatsam hkrum nu ai. Dai mare masha ni a masa hpe mada nna, akyu hpyi shakut ai hte kasi kaja madun let, nhkring nsa shadum jahprang sharin shaga nga nu ai. Nnan daw de nloi la ai raitim, yet yet myit malai lu wa ma ai. Karai Kasang gaw John Vianney hpe lak san shaman chyeju jaw ya nga ai gaw, mara raw ya ai lam hta mying grai dan hkung ai lam re. Mau hpa mu chye lu ai gaw, mara sa raw ai ni ntsun hkrup ai mara ni hpe shi bai tsun shadum ya ai lam rai nga ai. Grau nna shut hpyit mara tang pyaw nga ai ni, John Vianney kaw mara raw chyoi pra hkum hkam la ai hte gaw, myit masin kata lak lak lai lai hkam sha ai hte myit yawn myit malai lu nna, prat nnan de bai hkawm sa wa ma ai lam chye lu ai. Ndai zawn John Vianney a mai kaja ai lam ni gaw, lani hte lani gajai gumhkawng wa nna, sumtsaw sumtsan buga hkan shanu nga ai masha ni, mara sa raw hkam la ma ai.

Dai aten hta, lani mi hkying hkum (16) du hkra, mara raw ya nga nu ai. Shani shagu masha (400) daram mara sa raw la ma ai hte, tara mungga sa madat la ma ai lam, labau hta mu hti lu nga mali ai re. Shi gaw lu sha gam let akyu hpyi shakut ai, Jahpawt jau jau hkying 2:00 am daram hta rawt nna, akyu hpyi ai. Shi a malu masha gaw, namlap namlaw kaji kapu hte yang yi sha rai lu ai. John Vianney a prat hta, magam bungli awng dang magang, nat tsa dan gaw gung lau magang rai nga ai lapran hta, Karai Kasang a chyeju hte 1859 ning August shata praw 4 ya shani manap jau jau hkying (2) ten shi a sak (74) ning hta Madu Yesu shi hpe htani htana grin ai mungdan hta ban sa lu na matu, woi la hkrum sai rai nga ai.

Dai hpang nawku hpung gaw, John Vianney hpe san pra ai masha dang da na shawng na ning gam rai nga ai, alu ai masha madang de dang da na matu htu shaw yu ai shaloi, shi a moi mang hkraw taw nga ai. Raitim, hpa mung hten za ai lam n nga, shi si ai shaloi lup da yang na hkum tsawp hte raw sha, bai mu lu ma ai. Dai rai nna, John Vianney hpe madu a shaning 1925 ning hta Wa sarabyin Pio (11) kaw nna, san pra ai masha byin wa sai lam masat shagrau lai wa sai rai nga ai.

Nu wa hpu nau ni, San Pra ai John Vianney tsun ai kasi la hpa ni gaw, 1. Shagrit shanem ai masha hpe Karai Kasang gaw shi a mying ning sang a matu, jai lang nga ai. 2. Akyu hpyi ai lam hte lu sha gam ap nawng ai lam gaw, Karai Kasang a hpung shingkang dan hkung wa u ga, jai lang ai shaloi, tang du ai lak nak ni re, nga ai. 3. Masha ngu ai gaw, ganing re ai madang kaw mi du taw tim, tinang a man ang ai magam bungli hta, kang ka galaw gunhpai ai wa gaw, Karai kasang a matu atsawm ap nawng lu ai lam re. 4. Shi gaw lani mi hta nayi hkum (14) (15) (16) du hkra, mara raw ya lu ai wa rai nga ai. 5. Karai Kasang kaw ap nawng ai lam n nga ai, magam bungli shakut ai lam gaw, gaman li la rai na re nga nna, tsun da ai hpe myit dum nna, anhte a prat sak hkrung lam a matu, shakut sa wa mai ai hte kasi la hpa lam ni hpe gam garan ya dat nngai law.

Shamyet Shanat ai – San Pra ai John Marie Vianney a labau laika buk

Ka Lajang ai – Mama Rose Angeline Maran Nang Doi

                        RVA – Jinghpaw Nsen Shapoi Dap

                        Manila, Philippines.

St. John Marie Vianney (May 08, 1786 – August 04, 1859)