October Shata Hta Rosary Hti Ai Lam, ( 02 Oct, 2018 )

October shata hta Rosary hti ai lam

          Hkungga tsawra ai shiga madat nu wa hpu nau ni, October shata hta Rosary hti ai  lam hte seng nna, wenyi n gun lu la mu ga, yaw shada let gam garan ya dat lu n ngai.

          Nu wa hpu nau ni, anhte a nawku hpung gaw, moi moi kawn nna, ndai October shata hpe Rosary hti ai shata ngu, masat da ya sai rai nga ai. Madu a shaning (1878) ning kawn nna, (1903 ) ning laman hta nawku hpung hpe woi awn lai wa ai, 13 ngu na, Wa Sarabyin Great Leo gaw, kahtawlik kun dinghku ni hta, Rosary hti akyu hpyi ra ai lam, (13) lang ngu na, shana shabra laika hta, bang shalawm ndau dat ai hte October shata gaw Rosary hti ai shata ngu, lak san lata tawn da sai re. Dai hte maren October shata (7) ya hpe mung, Rosary poi nhtoi ngu masat da ya sai. Ndai poi byin pru wa ai lam gaw, Madu a shaning (1571) ning October shata (7) ya shani hta, Hkristan ni hte Turakyi ni, Let-pan-to ngu ai, hka lam majan byin wa sai.

Dai ten hta, wa sarabyin a matsun madun ai hte maren, mungkan ting na hpung masha ni yawng, Rosary hti akyu hpyi ai, Hkristan hpyen hpung ni hkum nan mung, shana aten tup, Rosary hti akyu hpyi let, ala maja nga ai majaw, majan hta hkrat sum n gun yawm nga ai hkristan hpyen hpung ni gaw, shanhte hte kachyi mi mung n gun nbung ai Turakyi hpyen hpung ni hpe hkap kasat dang kau lu ma ai lam labau hta mu lu ai. Dai majaw hkristan hpyen hpung ni gaw, Rosary hti nna majan hpe awng dang ai chyeju lu la ma ai lam re.

          Rosary a mau hpa atsam hte Hkru-sit majan kaba hpe dang kau lu nna, awng padang ninglaw lu ai, October shata  (7) ya shani hpe,  Madu a shaning (1566) ning kawn nna, (1572) ning laman hta, up hkang woi awn lai wa ai, nawku hpung a ningbaw wa, Wa Sarabyin Pio gaw, san seng chyoi pra ai Rosary poi hku nna, shaning shagu galaw na matu masat da ya sai lam mung, chye lu ai. Ndai October shata (7) ya hta mung, chyoi pra ai Rosary a hkawm hkam jan poi nhtoi ngu masat let, galaw nga ga ai re. Dai majaw shaning shagu na lak lai ai shata mung rai nga ai. Ndai shata hta sha Chyoi pra ai Rosary a hkawhkam jan, Nu Maria hpe shagrau sha-a ai shata mung rai nga ai.

Karai kasang gaw anhte ra ai, ra gadawn nga ai chyeju ni hpe jaw ya mi ga, Rosary hti shakut ai shata mung rai nga ai. Madu hta yup pyaw ban sa mat wa sai wa Sarabyin Yawhan Pawlu II, shadum lai wa sai lam hta, Rosary hti ai gaw, Madu Yesu hpe madung da ai lam re, Rosary hti ai lam hpe atsawm hkan galaw ai ni gaw, karai kasang a lam hta hkawm sa let, shi a mungga hte asak hkrung ai lam re hpe mung kam sham nga ga ai. Mungsung ga sung ni hpe atsawm sumru yu let, Rosary akyu hpyi ai ni gaw, Hkristan prat hte wenyi hkrun lam hta sung ai de sit sa nga ai lam re nga nna, Wa Sarabyin Yawhan Pawlu II, tsun shadum lai wa sai rai nga ai.

          Rosary hti akyu hpyi ga hte, kabu gara shiga ni yawng hta, lachyum sung ai mungga ni rawng nga ai, Nazaret mare kaw Madu Yesu a ma prat hte nga ai aten kaw nna, shara shagu hkawm sa, mungga hkaw tsun ai aten du hkra sumru yu na lam ni hte Madu Yesu a mungsung ga sung ma hkra gaw, karai kasang a hpung shingkang dan hkung na lam rai nga ai. Rosary hti akyu hpyi ai lam gaw, anhte hkristan masha ni a matu n gun rawng ai lak nak langai hte lachyum pru ai lam re hpe mung, wa sarabyin Yawhan Pawlu II hkum nan, atsawm chye madat hkam sha ai majaw, Rosary hti shakut na lam n gun jaw mat wa sai rai nga ai.

Nu wa ni, Wa Sarabyin Yawhan Pawlu II gaw, shi asak naw hkrung nga ai aten hta, Mungkan ngwi pyaw simsa na matu, rosary hti shakut ra ai lam hpe, n gun jaw ai sha n ga, shi hkum nan, Italy mungdan, Wun-pey mare kaba kaw nga ai Chyoi pra ai Rosary a Hkawhkam jan mying ai, akyu hpyi ginra kaw lai wa sai (2003) ning October shata (7) ya shani, mungkan ngwi pyaw simsa u ga matu yaw shada let, rosary hti akyu hpyi ai lam hpe galaw nna, anhte yawng hpe kasi madun n gun jaw, shatsam lai wa sai re. Ndai lam ni gaw, Madu hta ban sa mat wa sai Wa Sarabyin Yawhan Pawlu II hkaw tsun lai mat wa ai mungga ni hta na bai nhtang sumru let, n gun la mayu ai lam rai nga ai.

          Hkungga ai nu wa hpu nau ni, Chyoi pra ai Nu Maria gaw, karai kasang hpe kam sham ai hte shi madu karai kasang a mungga hpe madat la nna, shi a asak aprat hpe ap nawng let, mungkan ga hpe hkye hkrang la ai chyeju hpe shalai, shalen ya sai re. Dai hkye hkrang la ai magam lam hpe Madu Yesu hte rau, daini du hkra, gun hpai ya nga ai re. Dai majaw, shi hpe tut nawng chyeju dum shagrau ai lam mung rai nga mali ai re. Chyoi pra ai Maria gaw, Na-um na-sin kaw nna, npawt mara nkap ai karai a kanu rai nga ai majaw, nhkru ai tsa dan hpe dang kau lu nga ai re.

Anhte mung Rosary hti akyu hpyi ai shaloi, nhkru ai tsa dan a agung alau ginshang yaw ai lam ni hpe dang kau lu ga ai hpe myit dum ga.  Nu wa hpu nau ni, daini na aten hta masha law law Rosary hti akyu hpyi ai a marang e, Wenyi hkum hkrang akyu chyeju ni hpe ta tut hkam sha lu nga ai re. Shinggyim masha amyu baw sang shagu gaw, rosary hti akyu hpyi ai lai len hte hkau chyap chyalu rai nga masai.

Dai majaw Rosary hti akyu hpyi ai ngu ai, ga hkum hpe na dat ai hte akyu hpyi ga langai ngai, shing nrai, kam sham ai lam lama ma hpe gahtap nna gahti galai rai, tinang hkrai, shing nrai, uhpung uhpawng hte rau akyu hpyi ai lam re hpe chye na nga ga ai re. Shing rai, rosary hti akyu hpyi lai ladat  hpe kahtawlik hpung ni sha n ga, Engligan hpung ni, Oxdadous, Islam hte Bukda makam masham hkan ai ni mung, hkan sa galaw nga ai hpe mu lu nga mali ai re.

Raitim, tsun shapraw ai akyu hpyi ga hte kam sham myit maju jung, sum ru, myit aru ai lam ni gaw, shai nga ga ai. Gashadawn, Kahtawlik nawku hpung ni Rosary hti akyu hpyi ai lam hta sumru, myit aru ai kam sham ai lam gaw, Karai Yesu masha sa tai ai, shangai chying hkai wa ai aten kaw nna, Udang ntsa jen noi si hkam ai hpang, bai hkrung rawt wa ai, mungsung ga sung lam ni hpe myit sumru nna, dai hpe kachyi zawn hkrang la galaw ai gaw, tsun shapraw ai akyu hpyi ga hti hkum gade lang rai sai, chye lu na matu, masat galaw da ai rai nga ai law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.