San Pra Ai Ni A Labau, August 01, 2018

San pra ai Julia a lam

          Nuwa Hpunau ni, San pra ai Julia gaw, Africa mungdan dingdung maga na Du magam langai a shayi sha rai nga ai. Gawng shingyan tsawm ai sha n’ga, myit su ai hte shagrit shanem ai, makam masham hta ru jung ai, shawang tsawra myit kaba ai jan mung rai nga ai. Madu a shaning ( 439 ) ning hta myalu myasha lagu lagut damya hpung ni gaw, Julia nga ai mare kahtawng hpe sa hpya kau nna, shi hpe mung mayam shatai na matu woi mat wa n’htawm me dut sha kau ma ai. Daizawn dut sha kau hkrum ai raitim, shagrit shanem ai myit the, shi a n’ta madu ni hpe tsawm ai myiman n’sam madun let, a’mu lam magup hta a’tsawm sha hkan galaw ai majaw, dai dum n’ta masha ni yawng, Julia hpe hkungga nga ai lam labau hta tsun da nga ai.

          San pra ai Julia gaw, moi kaji ai ten kaw nna, karai kasang hpe hkrit hkungga tsawra ai re majaw, a’kyu hpy ai lam hta, sharawng shara rai nga ai. Dai majaw, bungli galaw ai ten sha n’ga, hkring sa ai ten ni hta mung Rosary hti kyu hpyi shaja ai the shani shagu lu sha gam rai shakut nga ai rai nga ai. Shi a n’ta madu sahti wa mung Julia a makam masham, shagrit shanem ai myit hpe hkung ga nga ai. Lani mi na ten hta, Julia a madu hpaga la wa gaw, hpaga ga hkawm sa ai ten Julia hpe mung woi hkawm ai. Daizawn hkawm let, Carsika zinlawng de sa du chyai ma ai. Dai shara hta, hpara sum la hpe hkungga nawng ya  ai poi n’htoi the ang ai majaw, Julia gaw shi n’ta madu hte rau dai poi de sa lawm ra sai.

          Raitim, Julia gaw, shi a makam masham n’re ai majaw, shingdu de man yawng nna dung nga ai. Dai shaloi, munggyi wa gaw, wow ra num sha ma kadai rai ta? anhte a hpara hpe n’gawn n’sawn di ya ai ngu nna, tsun dat ai hte, hpaga la wa gaw, ngai woi hkawm ai mayam num re, shi gaw, Hkristan masha  re ai, a’mu bungli lam shagu hta kang ka ai the galaw ai majaw, shi kam sham ai lam hpe ngai n’jahten mayu n’ngai ngu tsun dan dat nu ai. Julia mung, gadai hpa mi tsun tsun shi tsawra kam hpa ai Madu karai kasang hpe sha myit maju jung nga sai re majaw, gadai hpe mung hkrit ai lam n’nga, shi galaw ra ai magam hpe sha shagrit shanem ai myit the shakut galaw nga ding yang rai nga ai. Shi a makam masham hta sha manoi manat nga let, san seng ai myit masin the sak hkrung lu na sha madung rai nga sai. 

          Julia a jet ai makam masham hpe Munggyi wa masin pawt taw nga sai. Dai majaw, Munggyi wa gaw, Julia a makam masham hpe jahten mayu nna, hpaga la wa hpe na a mayam num, ngai hpe dut ya rit nga nna, hpyi lajin wu ai. Dai shaloi hpaga la wa mung, n’dut ya lu ai lam tsun dat nu ai. Matut nna, Munggyi wa, hpaga la hpe nang hpyi ai made mi jaw na, dut ya rit nga nna, matut tsun, hpyi mari wu ai. Dai shaloi hpaga la wa gaw, ngai a mayam num gaw, a’rai yawng hta na grau manu dan ai, dai majaw, n’lu dut ya n’ngai ngu bai htan dat sai. Munggyi wa ganing n’chye di n’na, hpang jahtum, hpaga la wa hpe tsa, jaw shanang da nna, yup malap mat ai shaloi, Julia hpe hpara sumla nawku na matu lajin taw nga sai. Raitim, Julia gaw, ngai a makam masham n’re majaw, gara hku mung nawku lu na n’re lam tsun dat nu ai. Dai shaloi Munggyi wa , Julia hpe, nang n’dai hpara sumla hpe nawku jang, nang hpe mayam prat kaw na shalawt ya na ngu tsun tim, Julia gaw Yesu Hkristu a shang lawt hpe lu la ni ai majaw, laga hpa shang lawt mung n’ra n’ngai ngu nna, matut ningdang kau sai.  Dai shaloi munggyi wa manu mana masin pawt nna, nang zawn re ai mayam num gaw, nga nna, Julia a myi man hpe kahpret ya ai the shi a kara hpe mung gang baw kau ya ai. Daizawn, zingri ai raitim, Julia gaw shi a makam masham hpe n’jahten kau ai sha Madu Yesu hta sha manoi manat nga ai lam labau hta mu lu nga ga ai re. Bai Munggyi wa, Julia hpe n’lu gunglau ai re majaw, shi a lawu tsang ma ni hpe a’myu myu di zing ri shangun sai rai nga ai. San Pra ai Julia gaw, Shi a sak prat hpe Shi tsawra ai shi a Madu Yesu Hkristu hpe sha ap nawng jaw da sai re majaw, zingri zingrat yawng hpe jam jau hkam let, hkam la lai wa sai rai nga ai.

          Nu wa ni, San pra ai Julia gaw, jamjau hkrum tim, kam sham ai myit n’hten ai majaw, hpang jahtum shi hpe Udang hta jen sat kau sai lam nawku hpung a labau hta a’dan sha tsun da nga ai hpe chye lu ai.  Shingrai, San pra ai Julia gaw, Shi a sak prat htum ai du hkra, Madu Yesu hta sha ap nawng lai wa sai rai nga ai. Madu Yesu a mying hte tara sak se tai mat ai jan mung rai nga ai.  Dai majaw, San Pra ai Julia hpe Catholic Nawku hpung kawn nna, teng man ai makam masham hta sak se hkam mat wa ai san pra ai jan ngu nna, tang da hkrum sai rai nga ai. Ya daini du hkra nawku hpung kawn nna, teng man ai makam masham hta ngang ngang tsap ya nga ai San Pra ai Julia ngu masat da ya sai rai nga ai. Shi a poi n’htoi shani hpe May shata ( 23 ) ya shani ngu masat let, dai n’htoi shani du shagu shi hpe lak san nawku hkungga shakawn ai lam galaw nga ga ai re. Nu wa ni, mayam num shayi sha a makam masham myit gaw, grai nan mau hpa rai nga ai. Ja sut gan, arawng sadang hta na, Madu karai kasang hpe grau manu shadan tsawra ai sha n’ga, ga sadi dung ai, jet ai Hkristian prat hpe sak se hkam mat wa ai rai nga ai. Lama na nang , ngai a prat, Julia a prat the bung ai ngu gaw, gara hpe mahtang lata na rai kun? myit yu mai nga ai. Nu wa ni, shinggyim masha gaw, mungkan hta sak hkrung ai hkrun lam gaw, jahkring sha rai nga ai. Htani htana sak hkrung lu na matu a’hkyak nga ai. Dai majaw, tinang hpe madu karai kasang jaw ya sai makam masham n’li hpe lani hte lani bawng kaba wa hkra teng man ai lam hta shakut hkawm sa nga ga law.

Ka Lajang ai wa - Mama Rose Angeline Maran Nang Doi

                          Myitkyina, RVC Ginjaw Rung