Kanu Kawa Poi ( Parents' Day )

" KANU KAWA POI"
( July 26, 2019)
***San pra ai Joachim & Anna Poi.
( Feast of Sts Joachim & Anne)
*** San pra ai Joachim & Anna a poi n'htoi hpe kasi kamang shatai nna," Kanu Kawa ni hpe shagrau chyeju dum poi" galaw ga ai rai.

*** Matsun maroi htunglai hta tsun da ai gaw, Joachim yan Anna gaw Nazareth Mare hta nga lai wa ai. Shan gaw Yuda lakung hta na rai nhtawm, Dawi a aru arat kaw na re lam chye lu ai. Shan a sharin achyin shalat dat ai majaw, Chyoi Pra Maria Karai a Kanu tai wa lu ai. Shan gaw masha amyu baw law law a matu Karai a chyeju ningsang hpe ginlet shalai ya ai hka-singgat ( channel) tai wa sai. Shan lahkawng a kasi ningli hte akyu hpyi htinglu ya ai lam gaw, anhte hpe myit jasu sharawt ya ai hte lam matsun madun ya ai lam rai nga ai....

*** Anhte galaw ai ' Kanu Kawa Poi' gaw anhte kashu kasha ni hpe lam kaja law law hpe myit dum shangun nga ai. Karai a Tara Kanu Shi hta na No.4 gaw, kashu kasha ni a lit magam hte seng nna hkang da ai ga( aming) -commandment rai nga ai. Dai hta e madat mara lam (obedience) hpe madung tsun da ai re. Dai madat mara lam hta, lam yan 4 lawm nga ai. Dai ni gaw :
-- tsawra ai,( love)
-- hkungga lara ai,( honor & respect)
-- chyeju dum chyeju htang chye lam,( gratitude)
-- madat hkam la nna hkan sa shadik ai( subjection) ni rai nga ai.

*** Ga shaka dingsa na Jawjau Laika 19:3 hte Tara Jahprang Laika 10:20 hta shinggyim kanu kawa ni hpe hkungga lara ai gaw, Karai a Aming Ga ( commandment) re nga nna rawng nga ai.

*** Nu Wa ni hpe hkungga lara chyeju dum shagrau ai gaw lam law a majaw rai nga ai..
-- shangai chyinghkai ya ai chyeju,
-- bau maka galu kaba wa shangun ai chyeju,
-- mungkan hpaji sharin ya ai,
-- makam masham lam ngang kang hkra lam woi ya ai,
-- myit-su tsawm htap ai kashu kasha ni tai hkra shakung shazet
ya ai ....etc.

*** Maigan mungdan hkan gaw, kawa ni a poi, kanu ni a poi nga nna kaga ga rai galaw ma ai. Anhte Myen Mung Kahtawlik Nawku Hpung hta e, kanu kawa poi hpe rau sha pawng galaw ai. Lachyum mung shi a shi nga ai ngu mu lu ai. Ndai Kanu Kawa Poi hpe kabu gara jawm galaw ai a marang e, kashu kasha ni hte kanu kawa ni yawng laksan shaman chyeju wunli hkam la na ga ai hpe kamhpa myit mada ga ai re...

" Nu wa ni yawng asak galu ngwi pyaw nga mu ga...!
Tsawra ai kashu kasha ni yawng mung myit-su kungzet let bawngring gan ga wa mu ga law....!"

By  Fr.John Dashi Naw Lawn