Karai Kasang Ndang Di Lu Ai Hpa Mung Nnga Ai

Karai Kasang hte rau n mai byin ai lam hpa mung n nga ai, Karai Kasang ndang di lu ai hpa mung n nga ai nga nna August 7, ya shani Angelus akyu hpyi ai shaloi San Peter Pa kaba shawa masha hpe Wa Sarabyin Francis tsun dat nga ai.

Wa Sarabyin Francis gaw Chyoi Pra ai Wenyi a magam bungli hpe myit sumru lam galaw na saw shaga let  hpan da ai lam hta Chyoi Pra ai Wenyi a magam hte seng nna hkaw tsun ngut ai hpang Yesu Hkristu awng padang hkam la lu ai hkye hkrang la ai lam hta Chyoi Pra ai Wenyi a lit hpe myit yu na matu tsun ai.

Chyoi Pra ai Wenyi hte Madu Yesu masha hkum hkrang tai wa ai lam hpe myit sumru ga. Madu Yesu gaw Chyoi Pra ai Wenyi a marang e, Nu Maria a  hkri tung hta shinggyim hkum hkrang hpe hkam la nna, shinggyim masha tai wa sai” ngu ai makam masham hpe madi shadaw ai kaw nna hpang wa sai.

Chyoi Pra ai Nu Maria gaw Madu Yesu hpe shangai ai hta grau nna Karai Kasang a Mungga hpe hkap la ai hku nna, Karai Kasang a makam masham hte, shi hkum nan kanu tai wa ai.

Nu Maria gaw Karai a kanu tai na matu lamu kasa ga sa shana ai shaloi ndai lam gara hku mai byin na kun nga nna san ai. Nawku hpung mung dai zawn sha mai kaja ai lam hpe sha tam ai zawn rai nga ai mungkan ga hpe Madu Yesu hte shi a hkye hkrang la ai lam hpe hkaw tsun na matu gara hku mai byin na kun nga nna ga san san na lam nga wa ai.

Rai timung Karai Kasang a atsam hte n mai byin ai hpa mung n nga ai. Mahtai gaw dai aten hte ya aten hta mung maren sha rai nga ai nga nna Kasa laika hpe lakap nna Chyoi Pra ai Wenyi kaw na n-gun atsam lu la na marin dai nga nna Wa Sarabyin tsun ai.

Chyoi Pra ai Wenyi n lawm yang, Nawku Hpung gaw shawng lam de n mai sa wa ai, nawku hpung galu kaba wa lu na n re, kabu gara shiga hpe hkaw tsun lu na n re, nga nna Wa Sarabyin tsun ai.

Nawku hpung hta kashin kamun hkam la sai masha shagu gaw langai hte langai yawng seng nga ga ai. Anhte a n-gun hte n dang di lu ai lam ni hta jan ai masa lam ni anhte hkrum katut  wa ai shaloi, ndai lam hpe myit dum nna n-gun lu la mai ai, shalan shabran la let anhte a hkrun lam hpe matut hkawm na ra ga ai.

Karai Kasnag hte rau rai yang hpa mung n mai byin ai ngu n nga ai lam hpe  myitdum nna ndai lam hpe kam sham ga ai rai yang anhte ni mau hpa amu galaw lu na ga ai. Karai Kasang n dang di lu ai lam hpa mung n nga ai nga nna Wa Sarabyin tsun dat ai lam Vatican shiga dap kaw na chye lu ga ai.