Masha Asak Hpe Si Shangun Ai Jak Rai Laknak Ni Galaw Shapraw Ai Lam Hpe Atsawm Sha Bai Myit Yu Ga

Wa Sarabyin Francis kawn anumyu wan bawm a majaw hten bya  hkrum lai mat sai Heroshima shara hta “AI Ethics for Peace”  hte seng nna galaw ai zuphpawng  de mungga laika hku nna shagun shang lawm lai wa ai hpe chye lu ai.Japan Mungdan Hiroshima kaw July shata   9 hte 10 ya shani Mungkan ting na Nawku hpung ningbaw ni zup hpawng let galaw lai wa  ai “AI Ethics for Peace” hta “lai wa sai 1945 ning August shata hta dai shara kaw byin lai mat sai mabyin gaw anhte a matu ahkyak dik ai myit dum lam langai re ai hpe “Peace and Artificial intelligence” hte seng nna jahkrup bawngban nga ai ni hpe mungga hku tsun madi madun da lai wa ai hpe chye lu ai.

Wa Sarabyin kawn ndai “Artificial Intelligence and Peace” lahkawng yen gaw grai ahkyak ai lam re, ndai lam hpe lai wa sai Italy mung na Puglia kaw galaw ai G7 zuphpawng hta tang madun lai wa sai hpe bai myit sawn lu shangun ai lam tsun lai wa ai. 

Dai zuphpawng hta jak lak nak hta masha hpe lata na matu madung da  tsun lai wa ai hpa majaw nga yang jak rai  gaw shi a kata hta masat da ai hte maren sha jaw hkra, grau hkrak hkra galaw ya lu ai ni rai nga ai. Rai tim shinggyim masha ni gaw lata ai lam hta sha n ga, masin salum hku nna mung daw dan lu ai atsam nga ai hpe tsun lai wa ai.

Anhte ni jaw ai daw dan lam ni hpe galaw ai hta anhte shinggyim masha ni a bawnu nyan marai hte galaw sa ai lam gaw grau ahkyak nga ai, dai n re sha  jak hta bang da ai bawnu hpe sha grau kam nna jai lang ai rai yang gaw anhte masha ni hta nga ai atsam ni hpe shayawm kau mat ya ai lam  tsun lai wa ai.

Ndai lam hte seng nna Hiroshima hta byin lai wa sai mabyin hpe anhte ni mu lai wa sai matut nna dai ni anhte mu lu taw nga ai gaw  shada da n ju n dawng ai a majaw byin nga ai majan ni lawm taw nga ai hte mungkan ting hta mahkang hpan amyu myu byin taw nga ai hta anthe ni grau grau nna ndai jak lak nak  hpaji hte seng ai lam ni hpe mung na taw nga ai hpe kahtap nna tsun lai wa ai.

Anhte ni kahpu  kanau ni zawn myit hkrum let sinat laknak ni a majaw asak si hkrum shangun ai laknak galaw shapraw ai lam hpe atsawm sha myit sawn dinglik yu na matu tsun shadum lai wa ai, ndai zawn masha hpe si shangun ai laknak hpe madang tsaw ai hku galaw jai lang nga ai hpe anhte ni pat shingdang ra nga ai lam tsun shadum ai. Shi a magam gun ai ten ladaw ting hta shi a masin salum hte hpawn hpyi nem ai hte kadai shinggyim masha a asak hpe kaning re jak lak nak arai e mung lata la ai lam n nga ging ai hpe kahtap nna tsun lai wa ai.

Wa Sarabyin a numhtet ga hpang jahtum maga de anhte a man hta byin nga  ai manghkang ni hpe yu yu ga “ndai Artificial Intelligence ( Lata hte galaw shapraw ai hpaji byen ya ) a tara masa  hta anhte a nawku hpung makam masham ni hte htunghking htunglai a law htam ai lam rap ra ai hku galaw lajang da sai lam hpe anhte myit sawn yu ra ai.

Dai rai yang she na a jak hpaji hte seng nna lak lai ai hku galaw hpareng ai kaw tawn da ai ga sadi hpe awng dang ai hte galaw lu na re hpe mung tsun lai wa ai.

Hpang Jahtum hku nna Wa Sarabyin Francis kawn ya na zawn zuphpawng galaw ai gaw kaja ai hte myit hkrum gahkyin gumdin ai lam a apu asi ni lu la na hpe myit mada nga ai hte  anhte marai hkum shagu gaw Mungkan a matu simsa ai hpe galaw sa ai ni byin tai ra ai lam tsun lai wa ai hpe Vatican shiga dap kaw na chye lu ga ai.