Hkainu Hpyi Hte Mun Hpe Tsing Shadu Lu Nna Lu Mai Na Akyu

Anhte yawng gaw hkainu hpe sha ai ni hkrai rai nga ga ai. Hkainu sha ai shaloi hkainu hpyi hte mun hpe nyen kaba kau ai ni law ga ai hpe mu lu ai. Masha n kau mi chyawm gaw hkam kaja lam a matu tsi mawan hku nna akyu jashawn jai lang chye ai ni mung nga ai re. Kaja wa nga yang hkai nu hpyi hte mun hta e hkum hkrang hpe akyu jaw ai dat ni rai nga ai proteins, vitamin, menirals, carbohydrate hte fiber dat ni grai law rawng ai lam chye lu ai. Ndai lusha dat ni gaw anhte shinggyim masha ni hkam kaja na matu shani shagu ra kadawn taw nga ai ahkyak ai lusha n’gun dat ni rai nga ai.

America mungdan mare kahtawng hkan nga ai American mungdan masha ni gaw hkainu hpyi hte mun hpe shanhte a htunghking mungding tsi mawan hku nna moi chyaloi nhkoi kaw nna ya dai ni ndai aten du hkra akyu jashawn jai lang nga ma ai hpe chye lu ai. Ya dai ni na aten hta gaw ndai hkainu hpyi hte mun hpe shingra tsi kaja langai mi hku nna US mungdan, French hte Kyrgyz mungdan ni hta grai dam lada ai hku nna akyu jashawn sung lang nga ma ai hpe mung chye lu ai.

Hkainu hpyi hte mun hta lawm ai antioxidant dat gaw cancer mawng ana n byin hkra tau nau makawp maga ya lu ai hte jit law shangun ai atsam rawng ai re majaw anhte hkum hkrang na n kaja ai gung labu maza ni hpe jit alaw wa sa shapraw ai hku nna jasan jaseng kau ya lu nga ai.

Ndai hkainu hpyi hte mun hta gaw mi sha tsun mat wa ai hte lusha dat ni law htam hpring tsup ai hku rawng ai re majaw anhte a myit gawng run ai, myit hkiba lit li ai hte myit daw myit hkrat ai lam ni hpe lawan dik ai hku bai shading sharai ya lu ai rai nna hkum hkrang hkam kaja lam sha n-ga myit hkamja lam a matu mung ta tut akyu kaja jaw ya lu ai shingra tsi kaja langai rai nga ai.

Hkainu hpyi hte hkainu amun hta antihyperlipicdemic ngu ai hkum hkrang na n kaja ai cholesterol sau shajan ni hpe ninghkap jasan kau ya lu ai atsam rawng ai re majaw hpum dinglai ai lam, sin, salum, pu ni hta sau hkayawp magap wa nna, sai rawt, sai tsaw ana byin wa ai hte sai lam lasa gyip mat ai ana ni n byin hkra mung tau nau makawp maga ya lu ai tsi kaja re ai hpe chye lu ai.

Jitdwi saidwi ana lu ai ni hte sai rawt, sai tsaw ana lu ai machyi masha ni a matu lusha dat hpe bai jahpring ya ai bung jat lusha hku nna mung ana tau nau makawp maga na matu mung, shamai shatsai tsi hku nna mung lu lang, sung lang mai ai shingra tsi kaja rai nga ai.

Sai tsaw ana hte seng nna hkainu hpyi hte hkainu mun hta lawm ai jit sa, hka hkaw pyaw shangun ai diuretic dat atsam a majaw hkum hkrang hta law mahkawng wa ai sodium jum dat hte hka hpe jit sa,hka hkaw ai shaloi alaw wa sa shapraw kau lu ai re majaw hkum hkrang hta jum dat law mahkawng wa nna sai tsaw wa ai lam hpe ninghkap makawp kau ya lu nga ai.

Sai lam lasa kata hta dwi hpa dat ni law rawng shadang tsaw wa ai hpe ninghkap jahkrat ya lu ai insulin dat hpe tang du hkra alaw wa shapraw ya lu ai re majaw jitdwi saidwi ana lu ai ni hte grai htap htuk ai tsi kaja langai mung rai nga ai. Bai nna hkainu hpyi hte hkainu mun hpe shadu lu ai shing nrai dai ntsin hte baw hkrut ya ai rai yang ma chyu jaw ai ma kanu ni kara run, kara raw ai lam hpe jahkring shangap kau ya lu ai. Hkainu hpyi hte hkainu mun hta rawng ai lusha dat ni gaw kara a matu n’gun shabyin ya nna grau kaja wa shangun ai.

Hkainu hpyi hte hkainu mun hta bum ai lam hpe shayawm ya lu ai antiinflammatory properties dat lawm ai re majaw lagaw lata, lahpum, lami laman hte hkri hkraw ni hta bum machyi ana byin ai machyi masha ni a matu mung grai htap htuk akyu jaw ai tsi kaja langai mi rai nga ai.

Lami laman bum machyi ana, gout ana lu ai masha ni gaw hkainu hpyi hte hkainu mun hpe shingra tsi kaja langai mi hku nna shani shagu man man rai ding yang lu ya na kaja nga ai. Shi hta lawm ai diuretic dat atsam a majaw jit shabawng, sade the jit sa lam lasa ni hta ana kanu shang nna jit sa, hka hkaw ai shaloi kahtet ai hte jit hti hti ai zawn re ai mang hkang ni n byin hkra mung tau nau makawp maga ya lu ai sha n-ga shamai shatsai ya lu ai re hpe mung chye lu ai.

Hkainu hpyi hte mun shadu ntsin gaw Jaundice ngu ai sin bum shan htoi ana hpe shamai shatsai ya lu ai sha n-ga sin hpe jasan jaseng hkamja shangun nga ai. Dai re majaw tsawra ai shiga madat nu hpu nau wunpawng myusha ni e manu jahpu law law n hkrat ra ai sha, manu dan akyu law dik ai hkamja lam akyu ni hpe hkainu hpyi hte hkainu a kara mun hpe shadu lu ai shing nrai hka hpunglum hte tsing lu ai marang e ya sha tsun mat wa sai hkamja lam akyu law law hpe hkam la lu mai nga ga ai re.

Tsawra ai nu wa hpu nau ni anhte sadi la chye ra na lam gaw hkainu hpyi hte hkainu kara mun hpe tsi mawan hku nna shadu lu na rai yang gaw tsi gat tawn da ai hkainu hpun hta na n lang ai sha hkam kaja lam hte htuk manu bung pre ai hkainu hpe sha lata nna shadu lu ga ngu nna tsun shadum ya mayu ai. Ndai hkainu hpyi hte hkainu kara mun hpe ra wa shagu aten tup nan n mai lu ai raitim daini na aten hta grai wa tam yak lu yak ai gaw n rai nga ai majaw ya sha anhte na la, chye la lu sai hte maren tinang hta byin hkrum sha ra ai ana ahkya hpan hta hkan nna akyu jashawn jai lang chye let hkum hkrang myit masin ngwi pyaw hkam kaja ai, asak galu ai akyu hpe hkam la nga ga ngu garan kachyan ya dat lu ga ai.