Myi Machyi Li Ana Hpe Sadi Ga

Myi machyi li byin wa ai lam madung ni gaw virus hte bacteria zawn re ai ana kanu ni,dat nhtuk ai rai,ga shadawn pat arai,nam pan nmoi,wan hkut ni hte sap pya,baw hkrut ntsin,hka hpun yawnt lawng ni hta jai lang ai clorine ni a majaw byin wa lu ai lam chye lu ai. Myi li ana byin yang myi maga mi shing nrai lahkawng maga mung byin chye ai rai nna byin ai ten bat mi,bat mi jan na hkra byin chye ai.Aten ladaw n lata kap bra byin chye ai ana rai nga ai.Ana kumla ni gaw myi gaya hpang ai,myi kata lama mi rawng ai zawn myi akrawn akrawn nga ai,myi prwi si pru ai,myi hkyeng ai,myi hkyi shing but ai,myi bum machyi ai,myi makrim nna nhtoi nmai yu ai lam ni byin chye nga ai. Ya ndai laman hta masha law law wa myi li ana byin taw ai hpe mung mu mada lu ai. Myi li ana gaw kap chye ai ana re majaw tinang kaw n byin wa hkra tau nau makawp maga la chye ga ngu  nna mung tsun shadum ya mayu ai.

Myi machyi ana byin ai rai yang hkyamsa wa hkra anhte gara hku galaw la mai na ga ai kun, myi grup grup yin hkan asan re ai sumpan hka madit da ai  hte shing nrai hka hpun lum tsing da ai pasi hte lani mi 2/3 lang abwi rai katsut arut nna myi san seng lam galaw ya u.Myi hpe jahkring hkring arut ganun ai lam nmai galaw ai. Hka hte sap pya jai lang nna lata hpe jahkring hkring sha kashin san seng ya ra ai. Hpa majaw nga yang nsan seng ai lata hte jum masawp hkrup nna ana grau sawng wa lu nga ai.Myit set set ai masha ni myi set hpe jahkring hkring sha san seng lam galaw ya ra ai.

Myi li ana gaw kap bra ana langai re majaw myi machyi taw ai masha a labu hpun palawng ni,myi man katsut hpa jet,hka shin hpa jet,myi set hte kaga arung arai ni hpe kaga masha ni hte jawm lang ai lam tsep kawp nmai galaw ai.Rai hkrut ai shaloi mung myi machyi ai masha a bu hpun palawng hpe kaga san san hkrut ya ra ai.Masha yawng lang ai hka hpun yawt lawng hta hka hpun yawt ai lam nmai galaw ai.

Myi machyi ana byin ai rai yang myi hkra machyi,myi nmu mat ai lam nbyin na matu hkamja dap a matsun ai lam n nga ai sha tinang chye ai hku tak nna tsi shamai ai lam hpe koi gam na ra nga ai.Myi machyi ana byin yang ahkyak ai gaw machyi taw ai myi hpe hkum ganun,lusha garai nsha ai ten hka hte sap pya jai lang nna lata atsawm shawng kashin kau ra ai.

Virus hte bacteria ana kanu ni a majaw byin ai rai yang masum mali ya bat mi laman shi hkrai bai mai mat wa lu ai re majaw kaga tsi lajang lam grai wa n galaw ra ai. Rai tim mai na aten hta lai tim nmai hkraw ai rai jang hkamja dap de madun tsi tsi hkam la na ra ai hte madung gaw hkum ding san seng lam galaw na grai ahkyak nga ai.Myi li ana shada kap bra ai gaw hkum ding san seng lam ningra ai a majaw madung byin ai hpe mu lu nga ai lam sarawun ni tsun da nga ai.

Lama dat nhtuk ai lam a majaw byin ai rai yang myi bum ai lam yawm na matu hka katsi hte bum ai shara kaw kashin ya ra ai. Myi tsi bang ya mai ai.Myi ka-ut makret machyi ai rai yang makret machyi mai tsi hte allergy dat nhtuk ai lam hkyamsa na matu burmeton shing nrai cetirizine kaga hkamja dap ni matsun ai tsi la ma ma lu ya mai ai.

Chemical datu rai a majaw byin ai myi machyi ana rai yang ntsa lam na myi sap sanap shawng bum wa ai.Kaning re ai chemical datu rai mi raitim bum machyi ai hpe byin shangun ai rai nna Myanmar mungdan hta gaw acid a majaw bum ai hte alkali a majaw bum ai lam ni byin law ai.Acid a majaw myi machyi ai shaloi myi grai machyi byin chye nna myi prwi si pru ai,myi gaya ai lam gaw n nga chye ai.Myi grai hkyeng chye ai hte acid hpan hta hkan nna myi ntsa lam yawng hten za mat chye nga ai,myi ntsa lam hpraw mat ai zawn re lam ni byin chye nna hpraw ai hpang myi hpyi malu wa chye ai.

Chemical datu a majaw myi machyi ana byin ai rai yang myi nmu mat na hpe tsang shara nga ai re majaw myi hpe san seng ai hka hte kashin ya ra ai.Byin ai hte rau mai byin ai made lawan dik ai hku kashin ya ra ai.Myi de datu rai shang ai gaw myi nmu mat ai du hkra byin wa chye ai ahkyak ai mabyin langai rai nga ai hpe sadi la ra ai.Hka hte kashin ngut ai hpang tsi rung de lawan ai hku sa madun tsi tsi hkam la na ra ai.

Virus a majaw myi machyi ana byin ai rai yang myi machyi ai ana langai sha byin chye ai zawn waw machyi ai,yu hkraw machyi ai ana ni hte mung gapyawn byin chye nga ai.Virus a majaw byin ai machyi ana kumla ni gaw myi prwi si pru ai,myi gaya ai hte myi akrawn akrawn nga ai lam ni rai nga ai.Myi maga mi de shawng byin hpang chye nna kaga maga mi de mung lawan ai hku kap wa chye nga ai.

Bacteria a majaw byin ai rai yang gaw myi grai gaya ai hte matswi rawng chye nga ai.Dai matswi ni a majaw myi hpaw yak ai lam byin ai.Rai tim kalang lang gaw matswi nrawng ai sha myi hkyi ni shingbut kap ai lam mung byin chye ai.Virus a majaw byin ai zawn sha myi kata nbun lama ma shang ai zawn nga myi akrawn ai kaw nna loi sawng wa jang myi ka-ut machyi wa ai hte myi maga mi de htawt kap wa chye nga ai.

Bacteria hte virus a majaw byin ai myi bum machyi ana gaw nbung kaw nna myi kata de kap shang wa lu ai.Dai ana ni gaw ginhtawng ta ten nhpu shingbun law ai shara ni hta byin law chye ai zawn hkun hkraw nna kahtet ai duhkra ladaw ten hta virus ana kanu ni mayet law jat chye nga ai.Masha langai hte langai grai lawan ai hku kap loi ai ana mung rai nga ai. Myi li ana kap ai masha lang da ai rai hpe jawm lang,shap lang ai hte mung kaga masha hta bai kap wa lu nga ai majaw ndai lam ni hpe atsawm chye na tawn da nna myi machyi ana,shing nrai myi li ana byin wa ai ten hta grai nsawng wa hkra tau nau sadi sahka tsi shamai la chye ga .

Lama na myi machyi ai ana gaw virus hte bacteria ana kanu a majaw nre sha,chemical datu rai a majaw byin ai rai yang prat tup myi hten,myi nmu mat ai lam byin chye ai rai nna ni htep ai hkamja dap de lawan ai hku sa madun tsi tsi hkam la na ra nga ai lam garan kachyan ya dat lu ga ai. 

By - Julia Ja Ing