Ana Ahkya Mai Tsai Ai Tsi Tsing Kaja

Tsawra ai shiga madat nu wa hpu nau ni ndai shingra tsi hpun, tsi ru, tsi lap, tsi pawt ni hpe Jinghpaw tsa jet jet hte tsing tawn da nna akyu jashawn jai lang ai rai yang mai tsai lu na ana ahkya ni gaw maju lasa ,lami laman hte shan wawm ni hta machyi ai , Hkum chyen si, hkum katsing si ai, maju lasa hten ai majaw kahprim kahpram hpam wa ai,  asak kaba ai ni lahput magaw malan yak nna lam nmai hkawm ai, dung dung rawt rawt re ai shaloi nshang machyi ai ni ndai tsi tsing da ai tsa hpe jai lang nna shamai shatsai la mai ai Jinghpaw tsi kaja rai nga ai.

Bum ai ,makret machyi ai shara shagu hta chya nna yat yat rai manat ya yang mai tsai lu ai sha n-ga salum hte Sate hkam nkaja ai majaw lagaw lata katsi lagyi ja ai ni mung tsi ndai hpe chya ya yang grai lum kahtet wa shangun nga ai. Sai hkawm sa ai lam hpe grau kaja shangun ai. Sai kata sau law ai majaw sai ntsin pa nawn nna sai lam gyip kaji ai hpe hkyamsa mai tsai shangun lu ai.

Tsa hte tsing na tsi malawm ni hpe tsun ga nga yang, jinghpaw tsa jet jet rai ran a, dai tsa jet hta e kaidu lap hte pawt, nbung ju, tsi chyinghtum nga nna mung tsun ai, buga ginra hta hkan nna shamying n bung ai lam ni gaw nga ai, n kau mi nam salwi nga nna mung tsun ai, salwi lwi hkrawn si, alap hte lakying ni mai bang ai, jaga lap, lakying, lashan hte ru pawt, mintra hte nam chying, shamyen ru, kumba ban, manoi run dai shingra tsi hpun ni hpe bang nna tsing tawn da mai ai.

Ya sha tsun sai hta jat nna naw jinghkum jat bang mai ai tsi ni gaw shanam chyang, ru nhtang, payuk sau, mura pawt, kahtan ru pawt, migai ru, mai chyu kawa pawt lu yang mung bang mai ai, ndai shingra tsi hpun ni hpe jinghkum bang tsing tawn da nna akyu jashawn jai lang ga.

Dai re majaw ndai Jinghpaw tsi kaja rai nga ai tsi tsing hpe tinang hta hkam sha ra ai ana ahkya hpan hta hkan nna ta tut akyu jashawn jai lang chyam yu ga. Shaning hku tsing tawn da nna sung lang mai nga ai.

By Julia Ja Ing