Tauba Makrung Sha Nna Lu Mai Ai Hkamja Lam Akyu Ni

Tauba si hta hkam kaja lam hpe akyu jaw ai dat ni grai law rawng ai zawn tauba makrung sha ai mung hkum hkrang hkam kaja lam a matu kaja ai dat ni grai law rawng ai lam chye lu ai.

Tauba makrung hta rawng ai dat ni gaw mawm dat, vitamin A, vitamin B, vitamin E, vitmin
C, vitamin K, hpri dat, folic dat, potassium dat, carbohydrate, calcium hte protein dat ni rawng nga ai lusha shat mai lap rai nga ai.

Dai zawn re ai dat ni grai law rawng ai re majaw tauba makrung sha ai rai yang salum hkam kaja ai, hka dat jahpring ya lu ai, hkum num nak yawm hkrat lu ai, jit sa lam hta ana kanu shang ai lam hkyamsa ai, lusha rin shamyit kaja ai akyu ni hkam la lu mai nga ai.

Tauba makrung hta mawm dat grai law rawng ai majaw tauba makrung sha ai rai yang kaw si lawan ai lam nbyin ai. Bai calorie rawng shadang yawm ai sha n-ga vitamin C, vitamin B, vitamin K, vitamin A, vitamin E dat, hpri dat, folic dat, potassium hte magnesium dat ni rawng ai re majaw hpum jat ai lam n byin ai sha hkum num nak hpe shayawm jahkrat kau ya lu ai rai nga ai.

Tauba makrung hta mawm dat law rawng ai gaw kan chyat, kan shingdang ai mang hkang hpe mung hkyamsa shangun lu ai zawn lusha rin shamyit mang hkang a majaw byin ai kan hten kan machyi ai mung hkyamsa lu ai. Mawm dat a majaw kan sa man ai rai nna pu kaba hpe jasan jaseng ya lu ai. Dai re majaw lusha rin shamyit kaja nna pu kaba san seng ai hte ana ahkya lawt lu na matu tauba makrung sha ya na kaja ai.

Jit sa lam hta ana kanu shang ai ana byin ai rai yang tauba makrung hpe ntsin rin shup la nna lwi hkri si ntsin loi mi bang rai lu ya jang jit sa lam hta ana kanu shang ai lam a ningdaw mi rai hkyamsa lu na ra ai.

Tauba makrung gaw hkum hkrang na kahtet shadang hpe shayawm shanem ya lu nna hka dat jahpring ya lu nga ai hte shat kan hpe katsi shangun ai. Dai re majaw tauba makrung hpe jan grai kahtet ai ginhtawng ta ten hta sha ai rai yang katsi pyaw nna hka dat hpe mung jahpring ya lu ai. Bai nna ladi sai kayun ai, ban si tu ai hte n gup kata hpye ana byin ai mang hkang ni hkyamsa lu na matu tauba makrung sha ya ga.

Salum hkam kaja ai – tauba makrung sha ai gaw cholesterol hpe shayawm jahkrat kau ya lu ai re majaw salum hkam kaja na matu kaja dik garum ya lu ai.

Tauba makrung gaw bawnu hte maju lasa ni hpe hkam kaja shangun ai choline dat rawng ai re majaw matsing nyan kaja ai akyu jaw ya nna bawnu tsam marai hpe sharawt ya lu ai hte myit hkamja lam hpe kaja shangun ai lusha langai rai nga ai.

Tauba makrung sha ai gaw hkum hkrang hta na sum yawm mat ai hka dat, jumdwi dat hte carbohydrate dat ni hpe bai jahpring ya lu ai. Protein hte kaga lusha dat ni mung grai law rawng ai tauba makrung gaw lasa shan hkam kaja na matu mung kaja dik garum ya lu ai lusha kaja rai nga ai.

Ndai tauba makrung gaw hkam kaja lam hte htuk kaja ai lu sha rai  nna masha law malawng hte mung htuk ai lu sha rai nga ai, rai tim tauba makrung hte dat nhtuk ai lam byin chye nga ai re, dat n htuk ai masha ni chyawm gaw n sha ai kaja dik rai nga ai. Masha shagu mung shani shagu nan ladu lai sha ai lam hpe chyawm gaw n mai galaw na ga ai ngu tsun shana garan kachyan ya dat lu ga ai.

By - Julia Ja Ing