Jinghpaw W.P Kahtawlik Sasana Salum Daju Chyum College

Kahtawlik Sasana A Salum Daju San Luka Chyum College

Myitkyina Saradaw ginwang, Edin jau ginwang na lamu ga Eka ( 21 ) dam ai shara hta hpaw tawn da ai St. Luke’s College gaw Sasana galaw na Sara/num ni hte ningbaw ningla tai na masha ni hpe shapan shalat ya ai chyum hkawlik rai nga ai. St. Luke’s College hpe Francis jau ni a prat hta Manmaw Saradaw ginwang na Nahlaing kaw shawng hpaw hpang da ai rai nna ( 1947 ) ning hta Columban Sasana jau ni Manmaw de bai hpaw da ai. Dai hpang ( 1957 ) ning hta Columban sasana jau, Wa Jau Bernard Hwe, Wa Jau Francis Zukdaw Lum Dau, Wa jau Paul Lasang La, Sara Tsumhpawng Ja Li, Sara Felix Lum Ji ni woi awn nna Myitkyina Saradaw ginwang na Tanghpre nawku jawng wang hta San Luka Chyum Jawng bai htawt sit hpaw da sai rai nga ai.

Buga ginra masa lam, mung masa lam ni hta hkan nna ( 1978 ) ning hta ya na Edin San Luka jawng wang de bai htawt sit hpaw da ai. Edin San Luka chyum jawng hpaw hpang ai ten hta Wa Jau Gregory Lazum Naw Din, Sara kaba Peter Tsumhpawng Ja Li, Sara kaba Yawhan Nlam Gam Li, Duwa Johny Kareng La ni woi awn magam gun lai wa sai. Duwa Johny Kareng La gaw Edin San Luka chyum jawng wang lu hkra shakut ya sai hte chyum jawng wang hpe alu jaw ya sai nawku hpung a chyeju madu mung rai nga ai. San Luka chyum jawng gaw Columban jau ni shakut shaja gaw gap da ya ai sasana magam ni hta na apu asi langai mung rai nga ai.St.Luke Hkawlik gaw Socio -Pastoral ngu ai hte maren shinggyim bawng ring lam, sasana amu hte seng ai lam ni hpe gapyawn nna sharin achyin ya taw ai rai nga ai.

Jau : Anhte madung yaw shada ai gaw Sasana galaw na ningbaw ningla ni hte ningbaw ningla tai na ni hpe shapan shalat ai lam rai nga ai. Ya gaw loi madang tsaw ai hku bai galaw lajang sa wa ai. Hpa majaw nga yang Wa Sarabyin Pawlu VI tsun da ai ga ( Socie of the time ) prat madang galai shai wa ai lam ni hta hkan nna sasana galaw ai lam ni hta mung prat madang dep ai sasana galaw sa wa ra ai.

Dai re majaw moi gaw San Luka Chyum Jawng ngu nna anhte shamying ai, 2014 ning kaw nna San Luka Hkawlik madang de bai sharawt ai lam rai nga ai. 2013 ning hta Wa Saradaw Francis Daw Tang ngai hpe ndai kaw lit sha ang ya ai, dai kaw nna jau ni a zuphpawng hta chyum jawng hpe madang tsaw ai hku bai galaw na matu lit shatsam ya ai.

Dai zawn galaw ai lam hta Manmaw de na Saradaw hte wa jau ni, Myitkyina na Saradaw hte wa jau, Lashio de na Saradaw hte wa jau ni nkau mi lawm ai. Bai EAPI kaw jau kaba ni lawm nna ndai madang shatsaw ai lam hpe galaw ai. Myenmung na Jesuit jau ni mung tsawmra mi garum madi shadaw ai. San Luka Hkawlik hta Myitkyina, Manmaw, Lashio Saradaw ginwang na Sara tai na ni madung sa du sharin hka ja nga ai rai nna Kyaing Tong hte Thai Mungdan Sasana galaw na Wunpawng myusha ni mung sa du sharin hka ja la nga ma ai. Ya aten laning mi hta jawngma ( 40 – 50 ) hkap la nna hpaji ladaw lahkawng ning hte sharin ya taw ai.

Jau : Sharin ai hpan ni mung Socio Pastoral ngu ai hte maren shinggyim bawng ring lam hte seng ai, sasana amu hte seng ai lam ni hpe gapyawn nna shapan shalat sharin achyin ya ai. Sasana galaw na jawngma langai mi gaw sasana myit masa rawng ra ai. Madu Yesu hpang hkan ai jet ai kasa langai mi a kasi kamang hte maren sasana galaw na matu ndai kaw shapan shalat ya ai.Jahpawt yup rawt ai ten kawn shana yupra shang ai aten du hkra Wenyi lam hte seng ai hpe shapan shalat ya ai. Values education shanhte hta nga ra ai, manu shadan ra ai lam, hkum hkrang rawt jat galu kaba ra ai lam mung grai ahkyak ai, dai majaw ginsup hpan ni sharin ya ai, hkai lu hkai sha, rem lu rem sha ningpawt ninghpang lam ni hpe sharin ya ai. Myit masa, myit jasat lam ni hpe garum ya ai.

San Luka Chyum jawng hpe 2014 ning kaw nna EAPI ngu ai East Asian Pastoral Institude Philippines hte ginrun nna Chyum Hkawlik madang shatsaw hpaw da sai rai nga ai. EAPI jawng gaw hpung masha ni hpe yu lakawn ai lam, sasana galaw ai ht gara hku ladat shaw ra ai lam n hpe sharin ya ai. Dai jawng hta jau, mama, brother ni hpe sha nrai, shinggan na hpung masha ni hpe mung sharin ya ai international jawng langai rai nga ai. Chyum hkawlik madang shatsaw da tai 2014 ning hpang kaw nna Sasana galaw na tara hkaw sara/num ni hte ningbaw ningla tai na jawngma marai ( 200 ) daram hpe shapan shalat ya sai hte prat masa hta hkan nna ta tut sasana galaw nga ai tara hkaw sara/num ni ( 200 ) hpe mung ningjat jat sharin dabang hpaw nna shapan shalat dat ya sai.ya lu sai.

Jau : Socio – Pastoral Formation Center re majaw EAPI hte matut mahkai nna Pastoral Sasana amu hte seng ai lam maga de grau nna shanhte a garum madi shadaw ai lam ni lawm ai. Anhte a staff ni mung dai de sa nna sharin hkam la ai. Social maga de mung Myanmar Jesuit sasana hpung ni garum ai. Dai re majaw Socio-Pastoral Information Center hta EAPI, Myanmar Jesuit Sasana hpung ni hte Religious Mama ni garum ya nga ai.

Jawngma langai mi ndai de du sa wa ai ngu ai gaw shi hpe Karai Kasang shaga la ai lam rai nga ai. Karai Kasang shaga la ai lam gaw anhte  kadai mung n ging n dan ai, raitimung Karai Kasang jaw ya ai chyeju kumhpa langai mi re.

Ya gaw prat madang mung galai shai wa sai majaw sharin hkam la na Sara/num ni mung hpaji lam maga de loi mi madang nga ra sai. Ya Chyum Hkawlik jawng nnan hpe gawgap taw nga ai.  Jawng gawgap ngut ai hpang gaw jawngma ( 300/400 ) daram hpe shapan shalat lu na re. Dai shaloi gaw jawngma ni a tsang madang hta hkan nna sharin ai lam ni galaw mat wa na yaw shada ai.Ndai kaw na ngut ai jawngma malawng maga ni gaw Saradaw ginwang, jau ginwang ni hta shingdep shingtau tai nna hpung masha ni hpe garum shingtau nga ai.

Ya na prat hta ramma ni law law wa hkrat sum taw nga ai, sharin na shara n nga ai, gara de sa na mung nchye rai byin nga ai. Ndai jawng hta sharin dat ya ai a marang e makam masham rawng ai, kaja ai masha langai mi hku nna masha law law hpe dawjau lu na rai nga ai.

2014 ning hta Chyum Hkawlik ngu madang shatsaw shagrin dat sai hte ya  gawgap taw ai chyum hkawlik jawng kaba ngut ai hpang gaw jangma ( 200/300 ) daram hkap la nna jam mau jaw lu ai madang byin hkra hkyen lajang taw ai San Luka Chyum Hkawlik jawng rai nga ai.