2019 "Lu Sha Gam Ladaw" Na Matu Wa Sarabyin a Mungga

2019 ning na Lu Sha Gam ladaw a matu Wa Sarabyin Francis a Mungga hpe bat lahkawng ya, Feb 26 ya shani Vatican kaw nna ndau shabra lam galaw dat nga ai.

“Nga yawng nga pra mung myit ndaw ai hte, Karai Kasang a kashu kasha ni a paw pru na ra ai hpe ala nga ma ai” For the creation waits with eager longing for the revealing of the children of God”  nga ai ja chyum Mungga daw hpe ga manoi shatai da nga ai.

Shaman chyeju hte hpring ai ndai Lu Sha Gam Ladaw (Lent Time) hpe kaman lila n shatai kau na matu hte, Karai Kasang a tara mungga ni hpe hkan nang hkan sa let Karai Kasang a kashu kasha ni zawn nga pra sa wa na matu shadum da nga ai.

Wa Sarabyin a Mungga hta, “Myit htingkut ai lam hte gum rawng gum tawng ai lam ni hpe shingdu de tawn kau da let Madu Yesu hpang de gayin wa ga. Ra kadawn nga ai anhte a hpu nau ni a makau tsap ya nga ga, Wenyi ,Hkum Hkrang hte seng ai anhte a lu lawm ai lam ni hpe ra kadawn nga ai hpu nau ni hpe gam garan jaw ya nga ga.” nga nna tsun shadum da nga ai.

Lu sha gam ai, akyu hpyi ai, alu atan sak jaw ai lam ni hte seng nna mung jaw ang mai kaja ai masa hte galaw lu na matu tsun sharin shadum ai lam ni mung galaw da nga ai.

Dai ning 2019 na Lu Sha Gam ladaw gaw  March shata praw 6 ya shani kaw  hpang nna  April shata 20 ya, Pascha poi a shawng shani,bat kyu ya shani shangut na rai nga ai.

Source : Vatican News