Wa Sarabyin: “ Karai Kasang Gaw Masha Hkum Shagu Hpe Aten Shagu Shaga Nga Ai “

September 20, Laban shani, “Madu Lamu Kasa Akyu Hpyi,” ngut ten Wa Sarabyin Francis gaw dai laban shani hti ang ai “shadang sha lahkawng tsabyi sun hta bungli galaw ai ga shadawn hpe lakap nna, Karai Kasang a hkang da ai hpe hkan shatup ai lam myu hpan lahkawng hte seng ai lam hpe shadum da ai.

Sun Madu Kawa gaw Kasha lahkawng hte bung ai magam gun ni hpe Karai Kasang a Ja Mungdan matu magam bungli galaw shatup na matu saw shaga ga ai.

Shawng na laban hta gaw tsabyi sun madu Karai Kasang gaw pru sa nna, masha shagu hpe shi a tsabyi sun hta bungli galaw na matu saw shaga ai. Karai Kasang gaw masha shagu hpe aten shagu saw shaga nga ai. Shi a saw shaga ai hta anhte a bai htang ai magam myu hpan lahkawng hte seng nna, ndai laban hta ga shadawn hte bai tsun shadum da ai.

Ndai gaw anhte hpe myit mada shara jaw ai lam rai nga ai. Anhte hta yawm mat ai n gun atsam, anhte shamat kau ai myit mada shara, anhte n hkrum yu shi ai mahkrum madup ni hpe Karai Kasang anhte hpe bai jahpring ya nga ai re.

Nawku Hpung gaw, galoi mung Karai Kasang zawn rai nga nna, ra kadawn nga ai ni hpang de sa du nna myit mada shara jaw ra ai. Pru sa nna Madu a Kabu Gara Shiga hpe hkaw tsun sakse hkam ra ai. Machyi ai masha ni hpe yu lakawn ra ga ai. Dingbai dingna hkrum na hpe hkrit tsang ai lam nnga ai sha yak hkak hkrum nga ai ni hpe ni htep ai hku garum ya ra ga ai.

Karai Kasang gaw, galoi mung pru sa nna ra kadawn ai ni hpe chyeju jaw ya ai zawn Nawku Hpung mung ra kadawn ai ni kaw sa du garum ya ra ga ai.

Shawng na laban na ga shadawn hta na bungli shang ai ni hpe bungli madu shabri shabrai jaw ai shaloi shawng hpang shang ai ni yawng hpe maren mara sha garan jaw ai hpe mu lu ga ai. Yesu Madu gaw bungli galaw ai hte shabyi shabrai jaw ai hpe anhte chyena hkra ga shadawn hku tsun ai lam sha rai nga ai. Madung chye na shangun mayu ai gaw, Sumsing mungdan madu rai nga ai Karai Kasang a mai kaja ai magam hpe chye na shangun mayu ai rai nga ai.

Karai Kasang gaw aten hte mahtai hpe madung n yu ai. Anhte shi hte ni htep ai ni hpe daw jau mayu ai myit hte daw jau ai hpe mahtang madung da yu nna, anhte hpe shi a ja mungdan shang lu na ahkaw ahkang jaw nga ai.

Ndai masa gaw tara rapra ai lam ngu ai hta grau dam lada ai rai nna, Shi a chyeju hpe shadan shadawng ai she rai nga ai, ngu Wa Sarabyin tsun da nga ai.

Mai kaja ai lam hta hkan ai ni gaw shanhte a hpang jahtum shani hta akyu ara hpe hkam sha lu na rai nga ai. “Karai Kasang a tsabyi sun rai nga ai Nawku Hpung kata hta shaga la ai sai hte maren, htep lahti hkan nang ai ni yawng hpe Chyoi Pra dik htum ai Kanu Nu Maria gaw shani shagu garum shingtau ya u ga akyu hpyi ga hte Wa Sarabyin Francis, shi a mungga hpe jahtum da ai.

Bai, anhte a matu yawng mayawng rai nga ai Karai Kasang a shawang tsawra myit hte Yesu madu a hku hkau ai lam gaw anhte a akyu hpyi nsen hta a nga nga na ra ai ngu akyu hpyi shangut da ai hpe Vatican kaw nna ndau da ma ai.

20 September 2020, 11:08

Source : Vatican News