Chyoi Pra Ai Mali Ya ( Holy Thursday )

CHYOI PRA AI BAT MALI YA

(HOLY THURSDAY or MAUNDY THURSDAY,CYCLE C)

Chyoi Pra Ai Bat Magam (Holy Week) hta Triduum ngu ai masum ya ninghtoi matut manoi akyu hpyi nawku dawjau ai hpe galaw ga ai. Ndai hta Chyoi Pra ai Mali Ya hpe gaw “Maundy Thursday” ngu nna mung shamying da nga ai. Kaning rai nna dai hku tsun shamying ai rai kun? Madung gaw, Latin ga “mandatum” kaw na sa wa ai rai li ai. Lachyum gaw “Aming Ga” (mandate) ngu ai rai nga ai. Ndai ga hkum hpe Yawhan a Laika 13:34 hpe mahta nna tsun shamying ai rai nga ai. De a lachyum gaw, “Nanhte shada da tsawra nga mu, ngu nna tara ningnan ngai nanhte hpe jaw da made ai; ngai nahte hpe tsawra made ai zawn, nanhte mung shada da tsawra nga na rai myit dai,” ngu ai rai.

CHYUM MUNGGA DAW NI:-

Pru Mat Wa Ai 12:1-8, 11-14 …. Madu Karai a shalai dat ai shana na matu, gara hku hkyen lajang galaw sa wa na hpe, Israela kashu kasha ni a matu matsun ga hpe Mawshe yan Arun htawn tsun shana ya ai.

1 Korinhtu 11:23-26 ……. Nanhte galoi rai timung ‘muk ndai ai hte ndai gawm lu’ nga yang, Madu a si hkam ai lam, Shi du sa ai du hkra tsun shana ya myit dai.

Yawhan 13:1-15 ….. Madu Yesu gaw Shi a tsawra myit gade wa hkum tsup nga ai hpe madun mu ai. Kasa ni a lagaw hpe kashin ya nna, shanhte mung shada a lagaw mai kashin myit, dai, nga nna ga matsun jaw da wu ai.

HPANG JAHTUM DAWSHA POI (Last Supper)

Chyoi Pra Bat Mali Ya Shana hta e, Madu Yesu a “Hpang Jahtum Dawsha Poi” (Last Supper) hpe myit dum nga ga ai. Kasa ni hte hpang jahtum lusha dawsha ai ten hta, “Chyoi Pra Hkum” (Eucharist) hpe shabyin shatai da sai. Chyoi Pra Hkum shatai da ai hte rau, “Jau Aya” hpe mung shabyin shatai da sai. Chyoi Pra Hkum gaw Kahtawlik makam masham hta asak rai nga li ai. Chyoi Pra Hkum hkam la ai marang e, Madu Yesu hte n daw n hka langai sha pawng matut wa ai. Dai gaw Kahtawlik ni a kamsham lam rai nga mali ai.

MADU YESU GAW GARA HKU GALAW AI RAI KUN?

Yesu gaw shi a sape kasa ni hte rau sha-ku langai mi hta dung nga ai. Ndai Shalai wa ai poi sha na, ngai grai ra sharawng da we ai, ngu nna shanhte hpe tsun wu ai. Shaloi Shi gaw gawm la nna, shakawn ngut jang,”Ndai la nna nanhte shada garan lu mu” ngu wu ai. Shi gaw muk la nna shakawn ngut jang, dai hpe ahkyep alep nhtawm, shanhte hpe jaw mu ai. Kasa ni hpe Madu gaw muk hte tsabyi chyaru a lachyum hpe sanglang dan wu ai. “Ngai hpe adum nga na matu, ndai galaw mu” ngu nna htet da wu ai.

AHKYAK AI LAM KABA (3)

Ndai Chyoi Pra Bat Mali Ya shana de na nawku dawjau ai lamang hta ahkyak ai lam kaba (3) hpe myit sumru yu let shanglawm akyu hpyi nawku shakawn nga ga.

(1)Chyoi Pra Hkum hpe shabyin shatai da ai (Institution of the

Eucharist),

(2)Jau Aya hpe shatai da ai (Institution of the ministerial

priesthood),

(3)Tsawra tara ningnan (New commandmet of love)…ni rai mali ai.

KASA NI A LAGAW KASHIN YA AI (Washing of the feet)

Yesu gaw shat sha nga ai kaw na rawt nna, shi a palawng kaba raw kau nhtawm, hpajet langai mi la nna nshang e kyit wu ai. Dai hpang jarung hta ntsin bang la nna, sape ni a lagaw hpe kashin kau ya nhtawm, shi kyit ai hpajet hte katsut ya ya di mu ai. Sape kasa ni kaw na Shi hpe ap kau na wa Yuda Iskarut a lagaw hpe kashin ya sai. Bai nna Madu hpe nyet kau na wa Petru hpe mung kashin ya sai. Shi hpe hprawng shakram na kaga sape ni a lagaw hpe mung kashin ya sai. Lagaw hpe kashin ai bungli gaw mayam a lit rai li ai. Mayam ni hta na pyi grit dik ai mayam wa a bungli rai nga ai. Ndai zawn lagaw hpe kashin ya ai gaw, dawjau ai magam hpe hkrang shapraw ya ai kumla tai wa sai rai.

YESU TAWN DA AI KASI KAMANG

Madu Yesu madun ai kasi ningli hku nna anhte hpe sharin ya nga ai gaw, Shi a dawjau ai magam hpe gun hpai yang, tinang a jinghku jingyu ni chyu sha n rai, tinang hpe ninghkap ai ni hte sadi n dung ai ni mung lawm nga ai, ngu ai hpe dum chye shangun nga ai. Yawng hpe dawjau na matu, Madu gaw myit ra sharawng nga ai. Shagrit shanem ai myit hte dawjau na ahkyak madung rai nga ai hpe matsun tawn da nga ai law…

“Nanhte hpe ngai galaw ai zawn, nanhte mung hkan galaw myit ga, ngu nna ngai nanhte a matu kasi kamang tawn da ni ai.” (Yhn 13:15)