Chyeju Mangai Ta Ga ShaGawp ( 05 November 2021 )

Chyeju Mangai Ta Ga ShaGawp
*************************************

Namlimpa Jau aseng, hka san sara ning htawn, hka san mare kaw nga lai wa nna, ya bum tsit pa hpyen yen Camp (2) kaw shanu nga ai, Ritar Hpaula Ji Tawng ka shagun dat ya ai, “Chyeju Mangai Ta” ngu ai Ga Shagawp hpe ginlen shagawp ya na n ngai.

Ga shagawp hpe sawn sumru na ahkang jaw ya ai, hpan karai hpe chyeju dum dik sai.

RVA magam gun nga ai Wa jau hte Mama ni, sara/ sara num ni yawng hpe mung, na chying chyeju dum dat n ngai law

Hkawp nu wa Wunpawng myu sha ni e, ndai shata ndai aten wa.

Wunpawng bu ga nmut mangai ta, marit maroi mada yu tim nhproi sa.

Bum shagawng marawn shagu, mangai ja mam ni htoi tu.

Nshung sama bat sha wai, singkung pi lan ni pyen kashoi.

Nsin kalang sha pyi pyaw, lamu summwi de du hkra pyen pyaw.

Gupshi sai wan ni sha wam, yi sin Ahdwi gum gai amyit dam.

Marit ning tsin sha bai lu, moi na lam hpe shing ran mu ai, nmut mangai ten nan rai sai.

Ndai aten ndai shata, Gup Tung kala November.

Hka hku bungshi bung ahpawt, mangai ja mam ni gayawt.

Gang hkau lamu mung san tsawm, marit samwi ni yawng tawm.

Hkra u sumhpa nsen na, nam nga grau chyang mung shaga.

U tu chyang ngau mung garu, lagat gat yen mung kasu.

U ri u gan goi ai n sen na, chyihkyi shan ni mung ngoi pyaw nga.

Htawng seng mangai ten ndai, wa la gyin htawng mung rai sai.

Mangai yin wa de bai yu, u byit u tsa pyen kasu.

U tswi u hkring ni pyen kashoi, u hkru u ka ni hkrai shawng shai.

Du dum si ni gamawng, wa du wa tsa ni kanawng.

Nam nga woi hkyeng ni kashun, tsap la na hpang she kapun.

Kadu hka la grau n rau ai, hkyinchye raw ding la ni grau ai.

Yi baw yi mai yawng chyam ai, shing nawm du hkra n ngam ai.

Yu naw yu gam kasu ai, hkrudu hkruyen akan hkru ai aten rai nga sai.

Ndai aten ndai ladaw, nam si nam saw ni mung grai law.

Lu na sha na hpa tsang n ra, chyeju hpring ai wunpawng bu ga.

Mangai si mai ni mung hkum, nai mam asut ni mung grai lum.

Aja panyep nyep, gum hpraw lagyep gyep ai ten rai nga.

Mangai aten ndai wa, nrau nhtau she rai nga ahka.

U gawn brang ni manap hkawn, sum bwi gup ban hte hpawn.

Lahpraw sing gyin gyin, Ah Nu gum gai ayi sin.

U jawng machya ntsa kaw na, wa hpawk dum let mahkawn hkawn nga.

Nda tang hturen dum shapyaw, htawng seng mangai wa taw law.

Sumhtang marit shamai lu, moi na lam ni hpe bai shing ran mu.

Mangai ta a nam chyim wa, yawng gaw hkam sha yu sana.

Karai chyeju hpe shakawn ga, nlung nai mam hte hkri awn ga.

Ndai aten ndai shata, mangai yin wa shagu hkan wa.

Mam mu mam dan ji ga saw, yi sa yi wa ma she law.

Lu let sha let mani HH, kade ba tim ba ai n-na.

Mam bye mam lam chyip chyip rai, mam raw mam gun hkang she manai.

Bum lung Bum yu yi sa lam wa, ama ni mung grai sa kam ai ten she rai nga a hka.

Ya ndai zawn nmut mangai ngai, ladaw gyinshi she gashai ai.

Moi moi kaw na gyin rawn, dai ni du hkra lakawn hkrat wa ai.

Hkarang yi na hkai hpan hkum sum hpa, nam ji nam ya ni hpe dum ai made alun yu na.

Mam gaw madung, shimgyim asak jahkrung.

N nga nan nmai ai, ahkyak dik nan she re ai.

Nhpraw nhkye nbaw n nyeng.

Shaloi hkai nu shaba, loi kawng loi hka pa.

Jau dum sa, ndin nprang.

Ntsit nchyang nbaw lai si, chying htaw pat si.

Shari pan bung, sinpraw ding dung.

Gauri man maw, hka hku nbaw.

Lahput hkau na, Li-su zaza.

Sintung kau ya, manaw e mahta.

Tsun pi ndang, ka tim ka nhpra.

Dai sha nrai hkarang yi kaw, hkai ai.

Kahkum kum gyin, kai byek shingnam.

Majap shaba, jing hpaw gyinka.

Latsan kum shu, lasi shapre.

Wa hkum hkum hkye, nai sam nai kawng.

Shanam gai tawng, nai yu nai hpum.

Nai rawng nai ka, yawng la ding da.

Nai hkyeng nai maw, mahkri manaw.

Sap bring sam bup, hkri tawng majap

Chying hkrang hpagyi, gyi tum ya gyi.

Law law sai wa, baw hpan sum hpa.

Namji nam ya, ndai ram hkum ai.

Chyeju nang ngai, an hte yawng lu sai.

Nsi nai si hte nang lu malu sut gan hpe, chyeju dum shakawn kabu gara hkri awn nga ga law.

malap mali hkum rai chyeju dum let sak jaw ra ai

nang ngai an hte yawng ma hkra, mangai nnan sak jaw ai akyu wa, htam shi n ga lu na she nga

hpyen yen prat wa galoi she hkoi na, gat kaw na sha mari la, alu bai sa bang na nga, myit hta gaw n-gut rai tim ganing nan nrai sai

Ndai ga shagawp hpe naw jahkring sana, shut ai lam ni nga yang sharai ya.

Ga shagawp hpe sawn sum ru ka shapraw lu na matu n gun atsam jaw ya ai hpan karai hpe na.chying chyeju dum dik sai.

Du na November hta bai hkrum ga, shi ga madat nga ai nu wa ni yaw a ntsa karai kasang shaman jaw ya u ga.

Yawg hpe grai chyeju kaba sai

Ka shagawp ai - Ritar Hpaula ji Tawng
Bum Tsit Pa Camp 2