Covid Makawp Maga Tsi Hte Side Effect

Tsawra ai shiga madat nu wa hpunau ni daini na hkamja lam lamang hta gaw Covid makawp maga tsi prup la ngut ai hpang byin chye ai side effect byin ai gaw kaja ai kumla re kun,n kaja ai kumla re kun ngu ai hte seng nna shiga madat n kau mi myit ung ang taw ai lam ni hpe sawk sagawn hkaja lu ai made tsun sang lang garan kachyan ya mayu ai.

Covid makawp maga tsi prup ngut ai hapng masha nkau mi gaw hkum kahtet machyi ai,n kau mi hkum loi lum ai,n kau mi lagaw lata makret ai zawn re ai side effect hkam sha ra chye nga ai. Raitim masha n kau mi hta rai jang  makawp maga tsi prup da ai timung hpa laklai ai kumla n hkam sha ra ai ni mung nga ai. Dai majaw side effect hkam sha ra ai masha ni hte hpa mung n byin ai masha ni gaw gara hku shai hkat ai re kun nga nna chye mayu ai ni nga ai zawn n kau mi tsi n kaja ai re kun nga nna myit tsang, ung ang ai ni mung nga nga ai.

Makawp maga tsi a side effect hpe hpa majaw masha shagu n hkam sha ra ai re kun ngu ai lam hpe hkaja yu ai shaloi coronavirus makawp maga tsi hpe lang hte lang rai sawk sagawn chyam maram lam ni atsawm sha galaw ngut ai hpang she htuk shapraw dat ai rai nga ai. Ana hpe makawp maga na hte ana kap hkrum wa ai raitim pyi grai sawng ai hku n byin na matu yaw shada nna galaw htuk shapraw da ai tsi ni rai nga ai. Makawp maga tsi ngu ai a mabyin masa gaw tsi prup ngut ai hpang side effect ngu ai machyi kumla kaji kajaw byin chye ai rai nga ai.

Raitim masha a hkum hkrang gaw langai hte langai a hti htang ninghkap ai hta hkan nna hkam sha ra ai machyi kumla ni shai hkat chye nga ai. Nkau mi hta loi sawng ai hku byin chye nna n kau mi hta gaw nau n sawng ai hku byin chye ai. Kalang lang  makawp maga tsi prup ai raitim mi sha tsun sai hte maren hpa laklai ai machyi kumla mung n hkam sha ra ai masha ni mung nga chye ai.Madung gaw hkam jan lu ai hkum chying n gun a hti htang ninghkap ai lam shai hkat ai majaw rai nga ai.

Lamang tang madun ai - Julia Ja Ing