Hpun Shamyen Si Hpe N Lu Koi Ai Ni Ndai Hku Sha Ga

Dr.Khin Mg Lwin tang madun da ai hta myen  myusha ga hku တညင်းသီး ngu ai hpun shamyen si hpe dat garan yu ai shaloi shi hta e masha hpe akyu jaw lu ai lusha dat hpa mung n rawng ai lam tsun da nga ai.Hpun shamyen si hta rawng ai pat maina samit zawn re ai club si ni gaw sade hta wa pat majaw rawng taw  chye ai rai nna sade hpe hkra nan hkra machyi ya lu ai majaw sha na n hkrak ai, hkrit tsang shara nga ai lusha re lam mung tsun da nga ai.Bai ndai hpun shamyen si hpe kaga mungdan masha ni gaw nang ai baw gung si re majaw nmai sha ai lam tsun da nga ai.

Hpun shamyen si gaw gung rawng ai lusha re nga tim anhte Myanmar mungdan hta gaw nang, ngai masha law law wa hpun shamyen si ra sha ai masha ni grai law nga ga ai re. Ra sha ai masha ni gaw chye ninglen nan n lu shakoi ai majaw sha ding yang rai nga ga ai. Grau nna ndai aten gaw hpun shamyen si kung ai ten rai nga ai majaw ra sha ai masha ni a matu hkum hkrang hta hkra machyi lam yawm mat hkra gara hku sha yang grau kaja na hpe sawk sagawn hkaja da lu ai made hpe garan kachyan ya mayu ai.

Hpun shamyen si sha shut nna nang ai mabyin hte hpun shamyen si hta na gung dat ni loi yawm mat na matu,hpun shamyen si sha nna hkra machyi lam yawm na matu gaw hpun shamyen si shadu ai shaloi wan grung grung hte atsawm hkut hkra rai,  grit dik masum lang hka galai nna shadu kau na ra ai.Shaloi she shi hta rawng ai gung ni loi yawm mat na rai nga ai. Kalang shadu ngut shagu hka hpe yawng ru kau nna hka nnan bai bang shadu ra ai. Bai nna shadu ai shaloi jumdwi hte salwi lap bang shadu ya u. Dai gaw lawan hkut loi nna hkup ai dat hte magyep ai dat hpe shayawm kau ya lu ai. Hpun shamyen si hta na gung yawm mat lu na ladat bai langai mi gaw jum hte tsing kau ai rai nga ai. Hpun shamyen si hpe katsing sha ai,wan hta ju kakang sha ai gaw gung law dik re majaw n sha ai gaw kaja dik rai nga ai. Hpun shamyen si sha ngut ai hpang lwi hkri si ntsin gawm mi gayau lu kau u,hka law law lu ya ra ai hte hka dat law rawng ai jangwawm si law law sha ya ai mung kaja ai.

Hpun shamyen si gaw kyin nna magyep ai lusha hpan re majaw hkum hkrang hta sai lam,hka lam zawn re ai hku kaji ni hpe pat kau ya lu nga ai.Dai majaw hpun shamyen si sha na rai yang hku kasha ni jahpaw ya lu na lama ma hte sha ya na kaja ai. Masha n kau mi hpun shamyen si hpe shat mai hku nna sha chye ma ai re.Dai shaloi salwi lap mung sha shalawm ya ai rai yang hku kasha ni hpe pat kau ya ai dat hpe jahpaw kau lu hkra garum ya lu ai.

Hpun shamyen si gaw n gun dat hpa majaw nbyin ai rai nga yang amino acid myu mi rai nga ai djenkolic acid ngu ai gung dat rawng ai,dai acid gung dat a majaw lusha dat shabyin ai hpe ninghkap shing dang kau ya ai rai nga ai.

Hpun shamyen si sha yang hpa ni byin wa na rai,hpun shamyen si sha yang n gup manam ai,jit sa,nam sa yang manam ai hpe anhte yawng chye nga ga ai.Dai zawn manam npyaw sama pru ai gaw hkum hkrang a kraw kan kata hta gung byin taw ai majaw rai nga ai.

Shawoi na masa hku nga yang hkum hkrang kata de gung maza ni du shang wa ai shaloi sin gaw gung ni hpe la shaprai kau ya ai.Sade gaw jit sa hka hkaw ai hku nna gung maza ni hpe shinggan de shapraw kau ya ai magam bungli ni hpe dingrun galaw ya taw ai rai nga ai.

Raitim hpun shamyen si sha bang dat ai shaloi, hpun shamyen si hta na gung byin shangun ai dat gaw sin de shawng ndu ai sha, sai kata de du mat ai hpang she sin de du ai rai nga ai.Sin gaw hkum hkrang kata du shang wa ai gung maza ni yawng hpe la shapraw kau ya lu ai raitim hpun shamyen si a gung hpe gaw  la shapraw kau ya lu ai lam n nga ai hpe chye lu ai.

Shaloi gaw sade kaw nna shapraw kau lu na bai shakut ra sai.Raitim hpun shamyen si hta rawng ai molecule gung ni gaw sade kaw na jit sa lam ni hpe pat shing dang kau ya ai.Dai shaloi sade hkra machyi hkrum nna jit sa ai shaloi sai lawm ai,jit sa yak ai,sade hkra machyi mat ai majaw mashi machyi ai hpe hkam sha ra ai.Dai majaw hpun shamyen si sha ai gaw sade lahkawng maga hpe hkra machyi shangun ai teng sha rai nga ai.

Dai re majaw tsawra ai shiga madat nu wa hpu nau ni hkum hkrang a matu hpa lu sha dat mung n rawng ai sha n-ga sade hpe hten za hkra machyi shangun ai hpun shamyen si hpe grai ra sha ai raitim tinang a hkamja lam matu shadawn sharam rai sha chye ga, n sha hkra koi lu ai gaw kaja dik rai nga ai.Lama sha ai rai yang mung ya sha tsun ai hte maren shi hta rawng ai magyep naw dat hte gung dat maza ni yawm mat hkra ladat jaw jaw hte shadu sha ga. Sha ngut ai hpang mung hka law law lu na, lwi hkri si ntsin gayau lu na hte hka dat law rawng ai jang wawm si ni law law bai sha ya rai nna sadi sahka la chye ga ngu tsun shadum ya dat lu ga ai.

Lamang tang madun ai - Julia Ja Ing