Lanam Majap Hpun Hkai Ladat

Lanam majap hkai ladat

  Lanam majap hkai na matu - Majap bra bawng galaw ai hta grau na sadi ra ai lam gaw bra na ga atsawm tsam ai ga rai ra ai. Bra bawng galaw na ga atsawm ntsam shi yang hkai ban kasha ni nhtoi kaji ten hta sha, hpun ban htoi nsam byin  nna kyip si wa chye ai. Nkau mi gaw ga hta kyem nga ai latung ana zinli a majaw, hka a majaw kamu ana, shu lamut ana ni a majaw mung re nga nna myit la ma ai.

  Majap hpe kalang ta gat ayai hkai nga ma ai.Law malawng hku na hkai ban, hkai buk, hkai sadek ni kata bra hkai ai lam gaw law nga ai.

  Hkai buk, hkai sadek ni kata bra hkai ai re yang zaibru htam mi ,atsawm hkraw ai ga hkumyun htam mi, ga shatsam htam mi,Uria htam 8, shingra ga namhpun nga hkyi shamun ni hpe ra hkra shalau sumpum gayau da ra ai. Atsawm sha gayau nna hkai htuk hkai sadek kata de bang jaw ya ra nga ai. Dai zawn re ai hkai htuk, hkai sadek kata myu nli tum bra ai shaloi ga shan kata sung sung nshang hkra ntsa lam yan hta hkai tum jahkrat nna ga shan hkum yun , zaibru hkum yun ni kachyi mi gat jaw nna yi hku , tsing jahkraw ni ga up jaw nna hku kaji ai hka jaw ai ngoi ni hte hka jahkrat jaw jaw ra ai.

  Majap hkai ban kasha ni gaw nhtoi 45-60 laman hta hkai sun de htawt sit hkai ra ai. Hkai bawng nhtoi kaji ten hkai sun de htawt sit hkai ai shaloi hpun kya nna kadang wa chye ai.

  Hkai yan langai the langai 10”-15” tawn da nna hpun langai the langai 9”-6” gang da hkai ai gaw kaja dik rai nga ai. Hkai ai bat mi daram na ai hpang hpun npawt hta nhkrun kasha ni galaw jaw nna dat namhpun ntsin hpaw gayau la nna jaw ra ai. Hpun a asak ladaw hkan nna shingra namhpun dat namhpun asi si na n-gun tsi ni hpe bat mi hta lai lai bang jaw ra ai. Madi bam htang shadang n ding hprut na matu hka shalen jaw ra ai. Hka ing ai dam hpe ndang hkam ai raitim madi bam ai hpe gaw ra nga ai.

  Majap Hpun nkau mi hta hpun  grai kaba nga nhtawm asi nsi chye ai. Hpun tu kaba lam hta kaja nna hpun….lakung laking ni hpe daw kau jaw ai lam galaw nna bat mi daram hka njaw ai sha tawn da nna pru wa ai maku ni hte rau apu ma um ni law wa na rai nga ai.

  Majap hpun a lap ni hkyeng nhtawm lap gumdin nga yang lap gumdin  byin ai hpun hpe kalang ta baw kau nna dai hpun a ru shara hpe nhkrun htu nna hpun lap jahkraw , ga shatsam ni bang nna wan nat kau jaw ra ai. Grai lawan kap hkra chye ai ana hpan langai re majaw kaga hpun ni de kap hkra chye ai. Majap gaw hpun jahkrat hkai ten kaw na nhtoi 120-150 laman apu ma um asi ni pu si hpang di la mai sai rai nga ai.