Hpahka Lu Ai Wa Hkamja Na

Anhte Myanmar mungdan masha ni gaw hpahka lu chye ai akyang nga ga ai re. Dai gaw hkamja lam a matu kaja ai akyang rai nga ai.Anhte tsing lu dat ai hpahka gawm mi hta n tak sawn tawn ai hkamja lam akyu law law rawng nga ai majaw hpahka gawm mi gaw  tsi gawm mi tai nga ai.

Hpahka lu nna hkam la lu mai ai hkamja lam akyu ni hpe hkaja yu ai shaloi

1 ) Hkum katsing si ana n byin hkra makawp maga ya lu ai – Shani shagu hpahka gawm mali a lahta dingrun lu ai masha ni gaw hpahka tsep kawp nlu ai masha ni htan hkum katsing si ana byin lu masa tsa shadang 21% du hkra yawm ai lam sawk sagawn da lu ai hpe  tsun da nga ai. Dai hte maren bawnu sai lam ja gumdin nna hkum chyen si shing nrai hkum katsing si ana byin lu masa mung tsa shadang 30% daram shayawm kau ya ai majaw hkum katsing si ana a hkrit tsang hpa kaw na shalawt ya lu ai hta lawm nga ai.

2) Salum hkamja lam a matu kaja ai – hpahka shani shagu dingrun lu ya ai gaw heart attack ngu ai a kajawng sha salum adawt machyi hkrum ai hte salum sai lam hte seng ai hkamja lam mang hkang hpe makawp maga ya lu ai akyu nga ai.Dai gaw hpahka hta rawng ai anti-oxidant atsam law rawng ai flavonoid dat jasat rai gaw salum hte bawnu a matu kaja dik makawp maga ya ai majaw rai nga ai.

3) Nra hkamja lam a matu kaja ai – galoi shagu hpahka lu ai gaw nga chyu lu ai zawn sha nra hkamja lam a matu kaja ai lam chye lu ai. Hpa majaw nga yang hpahka hta rawng ai calcium dat, vitamin A hte vitamin K dat ni gaw asak aprat a majaw byin chye ai nra hkamja lam mang hkang hpe makawp maga ya lu nga ai.

4) Wa hkamja lam hpe garum ya lu ai –hpahka lu ai gaw wa ni hpe grau ngang shangun nna n gup manam ai hpe hkyamsa shangun lu ai nga nna  Japan sawk sagawn maram dap langai kaw na tsun da nga ai. Hpahka dingrun lu ya ai gaw n gup kata na pH madang hpe rap shara ya ai majaw n gup hkamja lam a matu kaja ai rai nga ai.

‌5) Alzheimer ana byin wa lu masa hpe shayawm kau ya lu ai – hpahka hpe dingrun lu ai masha ni gaw Alzheimer ngu ai shamying ai matsing nyan hten za ningra mat ai majaw malap ja ai ana byin lu masa hpe tsa shadang 50% du hkra shayawm kau ya lu ai.

6) Cancer ana nbyin hkra garum ya lu ai – Flovanoid dat law rawng ai hpahka gaw jit bawng cancer ana hpe  madung shayawm kau ya lu ai lam tsun da nga ai.

7) Bacteria ni hpe ninghkap jahten kau ya lu ai – hpahka hta bacteria ninghkap dat hte antioxidant ni rawng ai majaw bacteria ana kanu ni hpe ninghkap gasat kau y lu ai.

8) Lusha rin kaja ai – masha nkau mi shat sha ngut shagu hpahka lu ai akyang nga ma ai re,dai zawn shat sha ngut ai hpang hpahka gawm mi lu ya ai gaw lusha rin shamyit kaja ai majaw lusha nkrai ai majaw byin ai mang hkang hpe hkyamsa shangun ai sha n ga, shat kan hte seng ai hkamja lam mang hkang hpe mung makawp maga ya lu ai akyu hpe jaw ya lu ai lam tsun da nga ai. Raitim sadi ra ai lam mung nga ai,dai gaw shat sha ngut ai hte nan hpahka tsing tawn da chyalu  hpe lu dat ai rai yang lusha hta lawm ai lusha dat yawng lu la na hpe pat shingdang kau ya ai majaw shat sha ngut nna loi na ai hpang she lu ya jang grau kaja ai nga nna mung hpaji jaw tsun da ai lam ni nga nga ai.

Hpahka lu ai shaloi sadi ra ai bai langai mi gaw hpahka hpe tsi hte rau n mai lu ai.Hpahka gaw gung shaprai kau ya lu ai, lusha hta rawng ai dat ni hpe n gun dat nbyin hkra shingdang kau ya ai zawn tsi hte rau lu ai rai yang mung lu bang dat ai tsi a ning hkik atsam hpe shaprai kau ya shangun ai re majaw tsi lu ai shaloi yu maya hka hpun lum shing nrai hka hkut katsi hte lu ai gaw kaja dik rai nga ai.Hpahka sha nrai,yu maya hka hpunglum ahpraw lu ya ai mung hkamja lam  akyu law law hpe jaw ya lu nga ai.

Hka hpunglum lu ya ai a marang e hkum hkrang a matu ra kadawn ai hka dat hpe jahpring ya lu ai sha n ga lusha rin kaja ai, kan kyat kan shingdang ai mang hkang hpe garum ya lu ai, hkum hkrang hta sai gayin shamu shamawt lam kaja ai akyu ni hpe lu la mai nga ai majaw hka hpunglum lu ai mung hkamja lam a matu hkrak ai akyang kaja langai rai nga ai ngu garan kachyan ya dat lu ga ai.

Lamang tang madun ai - Julia Ja Ing