Wa Shaman Si Hte Hkamja Lam ( Durian )

Wa shaman si gaw ya ten myin taw ai namsi hpan rai nga ai. Wa Shaman si sha ai majaw baw sin ai,sai rawt ai,du krung li,baw li ai lam ni byin chye ai rai tim wa shaman si hta hkamja lam hpe akyu jaw ai dat atsam ni mung law law rawng ai hpe chye lu ai.Wa shaman si hta magnesium,potassium hte magri dat ni rawng ai majaw nra hkri hkraw ni hkam kaja na matu garum ya lu nga ai.Dai sha n-ga asak aprat kaba wa ai ten byin chye ai nra hpa,nra tsam ana ni nbyin hkra mung ninghkap makawp maga ya lu ai atsam rawng ai.Wa shaman si hta magri dat hte hpri dat rawng ai a majaw sai n gun yawm ana byin wa shangun ai kumla hpe shamai shatsai ya lu ai zawn Wa shaman si hta law malawng rawng ai vitamin hte anti-oxcidant ni gaw cancer ana hpe ninghkp gasat kau ya lu ai.Bai nna wa shaman si hta vitamin C, B, E ni rawng ai majaw cancer byin shagun ai cell ni ndu shang wa lu hkra makawp maga ya lu ai.Masha gaw asak aprat kaba wa ai hte rau hkum gawng shingyan a gawng kung kumla ni rai nga ai hpyi kyip dumrit wa ai,lasha shan ni kya kapum wa ai mabyin hpe masha shagu tawt lai nlu mai ai shingra tara rai nga ai.Raitim masha nkau mi hta gaw asak aprat naw ram ai ten kawn grai jau nna hpyi kyip dumrit lawan ai lam ni byin nga ma ai.Dai zawn re ai mang hkang hpe wa shaman si hta rawng ai vitamin dat ni gaw hkum hkrang kata na jahten shaza dat ni rai nga ai free radicals ni hpe shayawm kau ya lu ai majaw aten garai ndu yang hkum gawng kun ginsa lawan ai kaw na makawp maga ya lu ai.
Wa shaman si hta mawm dat grai law rawng ai mung lusha rin shakrai ai magam bungli a shamu shamawt lam hpe garum ya lu ai rai nga ai.Mawm dat garum ya ai majaw kan chyat kan shingdang ai,pu lam pat shingdang taw ai,kan tit shabung nga n pyaw,kan manai machyi ai lam ni n byin hkra shayawm kau ya lu ai zawn pu kaba cancer ana n byin hkra mung garum ya lu ai. Wa shaman si gaw kahtet dat law ai namsi rai nga ai majaw jan grai kahtet ai ten shadawn sharam rai sha chye na gaw ra nga ai. Wa shaman si hpe grai law sha ai rai yang mi sha tsun sai,baw sin ai,sai rawt ai hte masin kahtet nga n pyaw ai lam ni mung byin chye nga ai.
Wa shaman si gaw lusha n gun dat law nna hkum hkrang hpe hpum shangun ai majaw lasi nna hpum mayu ai masha ni sha ya na kaja ai lusha namsi mung rai nga ai.
Wa shaman si gaw vitamin C dat grai law jaw ya lu ai majaw machyi makaw,ana ahkya ni nbyin hkrum hkra hte hkyamsa mai tsai hkra garum ya lu ai,cholesterol dat shayawm kau ya lu ai akyu ni hpe jaw ya lu nga ai.Salum hte seng ai ana a matu mung kaja dik ai hku garum ya lu ai.Nra hte sai,shan,hpyi tsawm htap hkamja lu na matu mung garum ya lu ai namsi rai nga ai. Bai nna wa shaman si sha ai gaw yup pyaw shangun ai akyu hpe mung jaw ya lu nga ai.
Tsawra ai shiga madat nu wa hpunau ni wa shaman si gaw ya sha tsun mat wa sai hkamja lam akyu ni hpe jaw ya lu ai lusha namsi re nga tim wa shaman si hte n htuk ai,rau n mai gapyawn sha ai lusha ni mung law law nga ai hpe anhte chye tawn da na ra ga ai.Wa shaman si hte n htuk ai lusha ni hpe sawk sagawn lu ai made tsun ga nga yang
1. Tsa chyaru,beer –Tsa chyaru,beer hpe wa shaman si hte rau sha hkrup ai rai yang asak lawm mat chye ai madang du hkra hkrit tsang shara nga ai nga nna tsun da nga ai.Wa shaman si hta rawng ai dat myu mi gaw hkum hkrang kata na tsa shadang hkang ya ai hpe garum ai cell ni hpe shingdang kau ya ai gaw masha hpe si shangun ai du hkra hkrit tsang shara nga nga ai.
2. Chyu – chyu ngu ai hta nga chyu,dumsu chyu hte kaga chyu hpan ni lawm nga ai. Wa shaman si gaw sai kata nga ai caffeine dat hpe shayawm kau ya ai.Caffeine dat ngu ai gaw masha hpe set lasau nga zet ai myit hpe hkam sha shangun ai dat myu mi rai nga ai. Wa shaman si grai law sha dat jang yup mayu ai,du krung li,baw li ai lam ni byin chye nga ai. Dai gaw caffeine dat yawm mat ai majaw re. Wa shaman si hpe chyu hte gapyawn sha ai rai yang caffeine dat hpe grau yawm mat shangun nna sai rawt ai lam ni byin wa chye ai. Ntau shalau si ai du hkra byin chye ai lam sadi jaw tsun da nga ai.
3. Cocacola – caffeine dat grai law rawng ai cocacola hpe wa shaman si hte rau sha ai rai yang a kajawng sha salum galawp hkring mat ai,nsa sa chyat ai lam ni byin wa chye ai hpe sadi la na ra ai.4. Saba si – saba si hte wa shaman si lahkawng yan gaw kahtet ai lusha rai nga ai.Ndai lahkawng hpe kalang ta rau sha bang ai rai yang kahtet dat law nna machyi makaw byin wa chye nga ai.Dai hte maren dumsu shan mung kahtet ai lusha rai nga ai majaw wa shaman si hte lang lata rau sha bang dat ai rai yang machyi makaw byin wa chye nga ai.5. Chyahkan – chyahkan gaw katsi ai lusha rai nna wa shaman si gaw kahtet ai lusha rai nga ai majaw ndai lahkawng hpe rau gapyawn sha dat ai rai yang kan machyi,kan makram lam ni byin wa chye ai lam ni sadi jaw da ai hpe sawk sagawn hkaja lu nga ai.
Shingrai tsawra ai shiga madat nu wa hpunau ni ya ndai aten hta myin taw nga ai wa shaman si gaw hkum hkrang hkamja lam hpe akyu jaw ya lu ai lam ni nga ai zawn wa shaman si hte nhtuk ai lusha ni mung nga ai re majaw dai lam ni hpe atsawm chye na da let hkum hkrang a matu akyu pru ai hku nna sha,shadawn sharam lu sha jai lang chye nna nhtuk ai lusha hpe koi yen kau raiu hkum hkrang myit masin asak galu ngwi pyaw hkam kaja ai akyu hpe hkam la nga ga law.

Lamang tang madun ai - Julia Ja Ing