Hkamja Ai Masha Ni Galaw Chye Ai Akyang Kaja Ni

Galaw  man taw ai lam ni gaw aten na wa jang akyang byin mat nga ai.Hkam kaja let nga mayu ai masha ni gaw hkamja lam hte htuk hkra hkan galaw shaman ai kaw nna dai lam ni gaw kyang lailen kaja ni  tai mat wa ai.Dai zawn re ai akyang kaja ni hpe masha shagu tinang hkum nan galaw shaman la nna rem tawn da na ra nga ai.

Hkamja lam hkan sa ai masha ni galaw chye ai akyang kaja ni gaw hpa ni rai nga ai kun?

Hka ndum gun hkawm ai – anhte yawng chye ga ai hte maren hka lu ai gaw masha langai asak hkrung nga lu na matu hte hkum hkrang hkamja lam a matu n nga nmai ahkyak la ai rai nga ai.Hka law law lu ai masha gaw sai,shan a madi rai hkam kaja tsawm htap ai,lusha hte ana ahkya ni nbyin hkra makawp maga ya lu ai rai nga ai.Dai majaw hkam kaja lam hkan ai masha ni gaw tinang hkawm sa ai shara shagu de hka ndum gun hkawm chye ai akyang nga ma ai re.Dai gaw tinang a hkum hkrang hta hka dat galoi mung hpring tsup nga lu na matu hka dat htawng ai lam nbyin na matu yaw shada nna galaw ai akyang kaja langai rai nga ai.

Lusha hpe masam maram nna sha chye ra ai –ya prat na aten hta mu sau ai ready made lusha ni law law pru taw nga ai re.Aten nlu ai majaw,shing nrai nkam shadu sha taw ai majaw,gat jahkring hkring nkam sa ai majaw nga nna ready made lusha hpe grai sha law wa nga ai.Ready made lusha ni hpe grau mari sha byin ai hta sha mung mu ai,galaw sha mung loi ai hte aten na na tawn da mai ai lam ni a majaw mung rai nga ai.

Ready made lusha nrai tim seng hkan na  n kaja ai sau ni hte kyaw gangau dut ai ushan gangau,yang yi gangau zawn re ai sau law,si shum law,dwi hpa law ai lusha ni hpe mung loi loi hte mari sha law taw nga ai.Kaja wa nga yang dai lusha ni gaw sha ai lang law wa jang hkum hkrang hkamja lam hpe hkra machyi shangun ai lusha ni rai nga ai majaw koi gam ra ai hta lawm nga ai re.Hkamja lam hkan sa ai masha ni gaw dai zawn re ai lusha ni hpe mai byin ai daram koi gam nna dum nta kaw hkamja lam hte htuk ai hku galaw lajang sha nga ma ai.Tinang sha ai lusha hte machyi makaw ana ahkya ni hpe n shaga la ga ngu tsun shadum ya mayu ai.

Hkum hkrang shamu shamawt lam galaw ai – hkamja lam hkan sa ai masha shagu lusha hpe hkamja lam hte htuk hkra galaw lajang sha chye ma ai hte hkum hkrang shamu shamawt lam hpe mai byin ai made aten jaw galaw chye ai akyang nga ma ai.Jahpawt manap jau jau yup rawt nna lam hkawm ai,shing nrai shana maga daw jan pyi ai hpang lam hkawm ai shamu shamawt lam gaw shanhte a hkum hkrang hkamja lam hta grai nan akyu jaw madi shadaw garum ya lu ai akyang kaja ni rai nga ai.

Jahpawt jau jau lam rawt hkawm ai gaw manap jau jau na jan shingkang hpe hkra la let san seng ai nbung hpe chyu marawp la lu ai hte hkum hkrang shamu shamawt lam hpe galaw ya taw ai re majaw asak galu hkam kaja lam a matu kaja dik ai akyang lailen kaja langai rai nga ai.

Tinang hkum hpe lahku lamai di chye ai – hkamja lam hkan sa ai masha ni gaw tinang hkum hpe galoi mung lahku lamai rai nga chye ma ai.Lahku lamai di ai ngu ai hta yup ten shalai nna nga ai,lusha sha ten shalai kau ai,ladu lai lusha bang ai,grai puba lai mat hkra n gun dat bungli galaw ai,ladu lai hkra jan shakra bungli galaw ai lam ni hpe n galaw ma ai re. Dai zawn rai nga sa chye ai masha ni gaw tinang hkum tinang mung kam ai myit rawng nna myit masin ngwi pyaw simsa ai akyu hpe mung hkam la lu nga ma ai.Masha gaw hkum hkrang hkam kaja yang she myit pyaw lam lu na,myit pyaw lam nga ai rai yang she hkum hkrang hkam kaja lam mung nga na rai nga ai.Dai majaw tinang hkum hpe lahku lamai chye ai akyang kaja hpe mung rem tawn da nga ga.

Hkru hkru yup ai - Hkamja lam a matu galaw ra na akyang kaja langai hta hkru hkru yup ra ai gaw pyaw hpa lam rai nga mali ai.Hkru hkru yup ai ngu ai mung masha langai hkamja lu na matu grai ahkyak ai hta lawm ai hpe anhte galoi mung dum nga ga.Yup ai ngu ai shaloi mung aten ntam yup ai hku nre sha,shi aten hte hkrak rai aten man man yup chye na ra nga ai.Masha langai lami ni hta nar yi hkum ( 8 ) yup na ra ai nga nna tsun da nga ai.Dai hkying hkum ( 8 ) hpe shana yup tung lai ai hpang yup nna jahpawt jan law du hkra yup taw ai hku nre sha,jau jau yup,jau jau rawt chye ai akyang galaw da ai rai yang masha gaw atsawm yup hkru nna hkum hkrang,myit masin ngwi pyaw hkam kaja ai akyu hpe lu la nga ai.Dai majaw aten hte hkrak rai hkru hkru yup chye ai akyang mung anhte yawng hta rem tawn da nna myit masin,hkum hkrang ngwi pyaw hkam kaja ai,asak galu ai akyu hpe hkam la nga ga ngu tsun shadum garan kachyan ya dat lu ga ai.

Lamang tang madun ai - Julia Ja Ing