Hka Ge Ntsin Lu Ai Gaw Hkamja Lam A Matu Nhkyak Ai

Masha langai asak hkrung nga lu na matu hka gaw n nga nmai ra ahkyak ai zawn hkamja lam a matu mung hka law law lu nna hka dat hpring tsup na ra ahkyak la nga ai.Hka ngu ai gaw ntsin rai nga ai,dai majaw hka lu ra ai ngu ai shaloi ntsin hpan ni rai nga ai hka hpun lum,hka katsi,yu maya hka san hka,tsi hka,nam si ntsin,shat mai ntsin ni yawng gaw hkamja lam hpe akyu jaw ai ntsin ni hkrai rai ngai.Ntsin hpan hkrai rai tim tsa chyaru,beer,soda lawm ai dwi hpa ntsin ni gaw hkamja lam a matu akyu njaw ai ntsin ni bai rai nga ai.

Hkamja lam a matu kaja dik ntsin gaw yu maya hka san hka rai nna hka san hka ngu ai shaloi mung masha nkau mi hka san hka mari lu ai,nkau mi hka htung hka ja lu ai,nkau mi hka shi na ja lu,nkau mi gaw hka hpe shadu kau nna lu ai ni nga ai.Dai gaw tinang ja lu ai hka san ai nsan ai hta hkan nna lu ai lam rai nga ai.Du hkra ladaw katsi kahtet hta hkan nna mung hka hpun lum lu ai,hka katsi lu ai lam ni nga ai.Grau nna ya na zawn re ai ginhtawng ta aten hta jan kahtet ai majaw masha law malawng gaw hka katsi hpe lu nga ga ai re.Hka katsi hta sha pyi hka ge hka katsi hpe grau lu mayu ai ten rai nga ai.Hka ge ntsin lu dat ai a marang e jahkring mi laman kahtet hkyamsa ai zawn mung hkam sha na ga ai.Rai tim hka ge hka ntsin gaw hkamja lam hpe hkra machyi shangun ai ntsin re ai hpe mung dum nga ga.

Hka ge tawng,hka ge ntsin ni lu ai gaw hkum hkrang hkamja lam hpe hkra machyi shangun nga ai hpe masha nkau mi chye ninglen lu ai,nkau mi nchye ai majaw lu ai ni nga na ga ai re.Masha nkau mi gaw hka ge ntsin hte nan nhtuk ai,lu dat ai hte rau machyi hkrum ai lam ni byin ai majaw koi gam ai ni mung nga ai.Chye ninglen lu ai masha ni gaw chye ai rai tim tinang hta e lu dat shagu machyi ai lam n nga ai,kalang ta hpa nbyin wa ai re majaw nmai ai hpe chye ai rai tim lu mayu ai majaw lu ai ni rai nga ma ai.Dai zawn n sadi ai hta nang mung,ngai mung lawm nga na ga ai re.

Rai yang hka ge hka ntsin lu ai majaw hkum hkrang hkamja lam hta gara hku hkra machyi wa ai kun ngu ai hpe kalang mi bai myit sawn hka ja yu ga.Grai kahtet ai ten hta a katsi nga ai ntsin lu mayu ai majaw hka ge ntsin lu dat ai shaloi kalang lang yu hkraw machyi mat ai lam ni byin law chye ga ai re.Bai hka ge ntsin gaw jan kahtet ai ten lu dat ai shaloi a katsi nga nna kraw katsi,ba hkoi dum ai zawn nga ai rai tim loi mi na ai hpang grau kahtet ai hpe hkam sha ra chye nga ai.

Bai katsi ai ten sau lawm ai malu masha ni ja ge mat ai hpe anhte mu lu na ga ai re.Hkum hkrang kraw kata de mung dai hte maren sha rai nga ai.Hka ge ntsin lu ai gaw hkum hkrang kraw kata na sau dat ni ja ge pa gumdin mat shangun ai majaw lu sha rin bungli hpe wa hkra shangun nga ai.

Kan chyat ai – hka law law lu ai gaw lusha rin shamyit ai hta garum ya lu ai nga nna tsun ai rai tim hka ge ntsin hpe lu ai rai yang gaw kan chyat ai mang hkang byin wa lu ai.Hpa majaw nga yang hka ge ntsin lu ai gaw sha bang ai lusha ni hpe mung ja ge mat shangun nna rin mani na yak hkak wa ai zawn pu ni kaw nna sha bang ai malu masha ni hpe ra ang ai shara de nlu sa bang ya ai shaloi kan chyat ai lam byin wa ai rai nga ai.

Hydrogen shapraw ai hpe pat shing dang ai – asak mahkrung yawng gaw nsa sa lu na matu oxygen ra kadawn nga ai zawn n kaja ai nbung hydrogen bai shapraw kau na matu mung ahkyak la nga ai.Hkum hkrang hta kahtet shadang dingrun nga taw ai rai yang she oxygen kaw na gale dat ya ai n kaja ai nbung hydrogen dat hpe lu shapraw kau na rai nga ai.Dai majaw hka ge ntsin lu ai gaw oxygen hte hydrogen ginlen masa hpe dingbai dingna shabyin, wa hkra shangun kau ya nga ai.

Puba ai – hka ge ntsin lu ai gaw mi sha tsun sai hte maren lu dat ai shaloi a katsi sha nga nna hkum hkrang hpe asan zeng nga hkam sha shangun nga ai.Rai tim hka ge ntsin lu ai a majaw hkum hkrang kata na kahtet dat shadang gaw yawm hkrat mat nna mi na kahtet shadang bai lu na matu energy tsam n gun hpe grau n gun shadat shaw jai lang ra ai majaw puba lam byin shangun ai gaw hka ge ntsin a majaw hkum hkrang hkamja lam hpe hkra machyi dingbai dingna jaw ya ai lam ni rai nga ai.

Sau shajan law rawng wa ai – hkum hkrang kata kahtet shadang yawm mat ai shaloi sau ni ja gumding majaw rawng mat nna lusha rin yak mat ai.Shaloi hkum hkrang hta sau shajan law rawng wa ai majaw hpum lai ai lam byin wa nna hkamja lam hta hkra wa sai.

Shingrai tsawra ai shiga madat nu wa hpunau ni  jan kahtet la ai ginhtawng ta ten hta e hka ge ntsin lu dat yang she ba hkoi ai zawn nga hkam sha lu ga ai raitim hkamja lam hta grai machyi shangun lu ai re majaw yu maya hka katsi hpe sha lu ai gaw anhte yawng a matu hkam kaja ai akyu hpe grau nna lu la mai nga ga ai.

Yu maya hka katsi  gaw hka dat hpe grau nna jahpring ya lu nga ai.Shingra lusha rin shamyit emzyme ni hpe jasu alun ya ai majaw lusha rin shamyit kaja shangun ai,pu kaba shamu shamawt magam hpe grau kaja shangun ai,sai san seng nna hpyi,sade,sai hpraw di ni kaw nna maza mala  gung ni hpe la shapraw kau ya ai hkum hkrang a magam lam ni hpe kaja shangun ai akyu ni hpe lu la mai nga ai majaw hkamja lam hte htuk ai yu maya hka katsi hpe sha law law lu nna asak galu hkam kaja ai akyu hpe hkam la nga ga law.

Lamang tang madun ai - Julia Ja Ing