Ma-un lap,Ma-un Pu,Ma-un Ru,Ma-un Si Ni Mung Tsi Mawan Kaja Rai Nga Ai

Karai Kasang hpan da hkrum sai anhte shinggyim masha ni hte asak hkrung baw hpan ni yawng  mungkan ntsa asak hkrung nga lu na matu ra kadawn ai lam ni hpe Karai Kasang gaw shingra tara hku nna madi shadaw garum ya nga ai.

Dai zawn shinggyim masha ni asak hkrung nga lu na matu shingra tara hku nna madung lajang da ya ai hta hpun kawa ni lawm nga ai.Dai shingra hpun kawa ni hta dum nta shachyaw lang mai ai,lu sha shatai mai ai ni lawm ai hte tsi mawan kaja,tsi hkrung tsi nan hpun ni mung law law lawm nga ai re.

Dai zawn law la ai shingra hpun kawa hpan ni hta na daini ma-un hpun a akyu hte seng nna hka ja la yu ga.Ma-un hpun hpe nchye ai,garai nmu yu ai masha gaw nlawm na ga ai ngu kam ai.Ma-un hpun gaw pang lai hkin gau ni hta grau law tu ai hpun hpan mung rai nga ai.Madung gaw ma-un si hte ma-un ntsin hpe lu sha jai lang ga ai re.Ma-un si,ma-un ntsin hte ma-un sau ni hpe lu sha hku nna grai dam lada ai hku lu sha jai lang ga ai zawn hkamja lam tsi mawan hku nna akyu jashawn jai lang ai,chya hpa shakya rai hpan amyu myu hku nna galaw shapraw jai lang ai gaw mungkan ting madang rai nga ai.

Ma-un si,ma-un ntsin,ma-un sau ni a hkamja lam akyu hte seng nna shawng de na lamang ni hta mung law law lang tang madun ya lai wa sai rai nga ai.Daini gaw ma-un lap lakung,ma-un pu hte ma-un ru ni mung tsi mawan kaja rai nga ai lam hte seng nna sawk sagawn hka ja da lu ai made hpe bai tang madun garan kachyan ya mayu ai.

Ma-un ru a tsi mawan tai ya lu ai hkamja lam akyu hpe shawng yu yu ga,

Ma-un ru hta carbohydrate dat,sau dat,lauric acid,myristic acid hte caprylic acid ni rawng ai.Lauric acid gaw sha bang dat ai malu masha ni hpe lawan ai hku rin shamyit shakrai ya lu nna tsam n gun maga de gale ya ai,bacteria ni hpe shamyik jahten kau nna hkum chying n gun kaja hkra garum ya lu ai.

Ma-un ru gaw hpyi hkamja lam a matu mung tsi tai ya nga ai.Hpyi gaya ana byin ai rai yang yungnu 2/3 daram re ai ma-un ru hpe hka hte asan kashin kau nna grai prut hkra shadu kau dat u.Dai shadu ntsin hpe jahpawt shagu gawm mi rai lu ya mai ai.

Hkum kahtet machyi byin ai rai yang ma-un ru gram 15 dang hpe asan shawng kashin kau nna hka gawm mi daram bang nhtawm minutes 15 na hkra shadu shaprut dat u.Dai shadu ntsin hpe kahtet shakawp da nna lu yang hkum kahtet machyi hkyamsa lu ai.

Kan mase kan machyi byin yang  mung ma-un ru gram 15 daram hpe hka shawng kashin kau nna minutes 15 dang na hkra shadu nhtawm htawn shakawp da nna lu ya mai ai.

Ma-un lakung,ma-un lap ni hpe mung lasa shan ja kang machyi ai shaloi tsi mawan hku jai lang mai ai.Ma-un lakung ai kung nkung re ai hpe hka shawng kashin kau nna hka hpunlum a kahtet re ai hta bang shadu dat u.Dai shadu ntsin hte lasa ja kang machyi ai shara hta sumpan shing nrai hpajet kasha hte tsing kaba ya yang hkyamsa mai tsai lu ai.Bai nna ma-un lakung shing nrai ma-un lap shadu ntsin hte hka shin ya tim mai ai.

Ma-un pu mung sade hte seng ai machyi ana ni hpe hkyamsa mai tsai shangun lu ai.Ma-un pu ta lahkyup mi dang hpe shawng kashin kau nna shadu nhtawm jai lang mai ai.Ndai lam ni gaw ma-un pu,ma-un lap hte ma-un ru ni hta na tsi mawan tai ya ai akyu ni rai nga ai.

Dai majaw tsawra ai shiga madat nu wa hpunau ni nam chyim rawng ai ma-un ntsin hpe jaw ya lu ai ma-un hpun gaw ma-un si,ma-un si ntsin,ma-un pu,ma-un lap lakung hte ma-un ru ni yawng akyu rawng ai,malu masha kaja,tsi mawan kaja rai nga ai majaw tinang a hkamja lam masa hta hkan nna akyu jashawn jai lang chye let mai kaja ai akyu ni hpe hkam la nga ga.Rai tim mung ma-un si hpe chyawm gaw grai law sha jang n hkrak ai re majaw shadawn sharam rai sha nna hkum hkrang hkamja lam a matu kaja ai akyu ni hpe sha hkam la nga ga ngu garan kachyan ya dat lu ga ai.

Lamang ka tang madun ai - Julia Ja Ing