Shani Tup A Matu Ahkyak Ai Manap Lu Sha

Lani mi a matu shawng nnan lu sha rai nga ai manap shat gaw shani ting a matu ahkyak dik re majaw nbyin nmai sha ya na ra ai.Masha nkau mi shana yupra shang hpang hkrat nna yup rawt jan law ai majaw bungli sa hpang hkrat,jawng sa hpang hkrat rai nna manap shat sha na aten nlu jaw ai ni grai nga ma ai re.Kaja wa nga yang manap shat gaw hkamja lam a matu grai ahkyak dik ai lu sha rai nga ai.

Shana tup hpa mung nsha nna yup sai re majaw kaman rai taw ai shat kan a matu manap shat gaw grai ahkyak la nga ai.Manap shat atsawm sha ai gaw shani tup na hkum hkrang shamu shamawt lam,myit hkam sha lam, tsam n gun lapyin hpring tsup lam hte shani tup galaw sa ai magam ni hta myit maju jung lam grau kaja ai akyu ni hpe jaw ya nga ai.Grau nna bawnu hpe jai lang nna myit sumru let bungli galaw ra ai masha ni,jawngma ni a matu dawdan masing jahkrat ai,matsing sumhting ai lam hta kaja ai lam grau byin lu nna ana ahkya kaw na mung makawp maga ya lu nga ai.Hkum hkrang gaw shana ten lu sha rin ai magam hpe galaw ra ai majaw manap shat n sha ai masha ni shat kan ana grau byin law chye nga ai.

Hpum shayawm mayu ai masha ni a matu mung manap shat hpe atsawm hkru hkra sha ya na kaja ai.Shaloi she jahpawt kan hkru sai re majaw shani shat,shana shat ni hpe shayawm sha lu na,manap shat sha ai gaw shani shat,shana shat sha ai htan calorie hkru ai n gun mung grau kaja ai.Dai majaw manap shat sha ai gaw hkamja lam a matu hkrak nna shat kan ana nbyin hkra mung makawp maga ya lu ai.

Bai manap shat atsawm nsha ai masha ni gaw sha ai masha ni htan jitdwi ana,salum sai lam gyip ana grau byin law chye nga ai.Dai majaw manap shat atsawm sha ai gaw hkum hkrang a matu ra kadawn ai insulin hpe mung grau shapraw ya lu ai,shat kan a matu kaja ai sha n-ga salum hpe mung hkamja shangun ai akyu ni lu la mai nga ai.

Masha shagu ngu na daram manap shat sha ngut ai hpang she magam bungli galaw hpang chye nga ga ai.Manap shat shing nrai manap lu sha ngu ai shaloi chyalu hkrawn sha mai ai baw ready made lu sha ni hpe gaw koi gam lu yang kaja ai.Hpa majaw nga yang ready made lu sha ni gaw sai kata hta nga ai jumdwi dat hpe lawan ai hku rawt shangun lu ai lu sha ni rai nga ai.Jahpawt lu sha hpe nam law/lap,udi hpan hte shan dat ni rapra ai hku jinghkum sha ya lu yang kaja ai.

Shingrai tsawra ai shiga madat nu wa hpunau ni manap lu sha atsawm sha nna shani tup galaw sa ra ai magam bungli ni hpe hkam kaja ai hte atsawm sha galaw awng dang lu nna hkum hkrang hkam kaja ai,myit masin ngwi pyaw simsa ai akyu hpe hkam la nga ga ngu tsun shadum garan kachyan ya dat ga ai law.

Lamang tang madun ai - Julia Ja Ing