Jau Jau Yup Yang Hkamja Na

Yup hkring sa la ai gaw masha langai a hkamja lam hte galoi mung matut taw nga ai re.Masha langai hkam kaja ai hte asak hkrung hkawm sa nga lu na matu yup ten hpe hkamja lam htuk ai hku  galoi mung aten jaw chye na ra nga ai.

Yup ra shang hpang hkrat ai hte yup nhkru ai gaw matut taw nga ai re.Masha gaw shana yupra shang hpang hkrat ai rai yang jahpawt grai jan law hkra yup nna hkying hkum kade na hkra mi yup ai rai rai ,jau jau yup nna yup hkru ai hte hkam sha lam nbung nga ai.Galoi mung yup nhkru ai masha gaw hkamja lam hta hkra machyi wa na teng sha rai nga ai.Dai majaw jau jau yup nna hkru hkru yup ai rai yang hkam kaja lam hpe grai akyu jaw madi shadaw garum ya lu na mung teng sha rai nga ai.Hkamja lam htuk manu ai hku yup hkring sa la na kaja dik aten gaw shana hkying 9/10 aten re nga nna hpaji ning hkring ni hpaji jaw matsun da nga ai.

Jau jau yup hkring sa ai masha gaw Myit pyaw lam hkam sha lu ai, hpa majaw nga yang jau jau yupra shang nna yup hkru ai masha gaw yup rawt wa ai ten hta mung myit ni asan zeng nga nna myit pyaw ai hpe hkam sha lu ai.Masha gaw myit pyaw jang she lam shagu hta mung myit simsa kabu gara hte galaw lu nna awng dang lam hpe mung grau lu la mai nga ai re.

Jau jau yup ai gaw myit tsang lam ni yawm mat ai – hpa majaw nga yang masha gaw yupra shang ten hpang hkrat magang myit tsang lam ni law jat magang rai nga ai.Shing nrai myit tsang lam ni hpe htaw myit,le myit rai yup npyaw,yup nmai mung byin chye nga ai.Dai lahkawng yan gaw matut manoi rai nga ai majaw kaja dik gaw jau jau yupra shang yup hkring sa la ai rai yang myit ru,myit tsang hpa lam ni myit sumru ai hpe grai shayawm kau ya lu nga ai.

Myit maju jung lu lam kaja ai – yup hkru ai masha gaw mi sha tsun sai hte maren yup rawt wa ai ten hta mung myit asan apan,azet atsang nga ai hpe hkam sha lu nga ai.Shaloi gaw shani tup tinang galaw ai magam bungli lam shagu hta mung myit pyaw simsa ai hte myit maju jung lu nna kaja dik ai hku dawdan galaw sa lu na rai nga ai.Sawk sagawn ning hkring ni hpaji jaw da ai gaw shana hkying 11:30 garai ndu ai laman yup hkring sa ai gaw hpang shani myit maju jung lu lam kaja nna myit lawm hkum lawm rai magam bungli galaw lu ai majaw awng dang lam hpe grau nna hkam la lu ai nga nna tsun da nga ai.

Sai,shan tsawm htap ai – hpa majaw rai na kun,jau jau yup ai shaloi hkum hkrang gaw hkring sa ten jau jau lu ai,hkring sa la na aten grau law ai majaw hpyi hta na cell ni hpe bai galaw sharai ai magam hpe atsawm sha aten la nna galaw ya lu nga ai.Dai majaw sai,shan,hpyi ni pri madi tsawm htap ai akyu hpe hkam sha lu na rai nga ai.

Matsing nyan kaja ai – kalang lang lama ma hpe myik nga,kalang ta malap kau ai,sumru nlu ai lam ni byin yu na ga ai re.Dai zawn byin ai lam gaw yup nhkru ai,yup ra shang ten grai hpang hkrat ai hte a ding tawk matut taw ai rai nga ai.Dai majaw yup hkru ai gaw myit maju jung lam kaja ai sha n-ga,matsing nyan hpe mung kaja shangun lu nga ai.

Dai majaw nang kaja wa hkamja ai hku nga mayu ai rai yang yupra shang nhpang hkrat na,yup hkru na grai ahkyak nga ai.Grai hpang hkrat nna yup ai masha a hkum hkrang gaw grau nna puba lawan ai,ana ahkya ni hpe ning hkap shing dang lu na atsam yawm mat nna hkamja lam hta grau hkra machyi hkrum lawan nga ai.Dai re majaw jau jau yup ai akyang gaw hkum hkrang de du shang wa na ana ahkya ni hpe ning hkap shing dang kau lu ai atsam grau kaja ai majaw machyi makaw ana ahkya hte tsan gang shangun nga ai.

Shingrai tsawra ai shiga madat nu wa hpunau ni yup hkring sa ten hte seng nna atang ahpa zawn sha n shadu ga,yup nhkru ai gaw tinang a hkum hkrang hkamja lam hpe grai hkra machyi htenza shangun taw nga ai hpe dum ga.Game ginsup,sumla hkrung yu, ph kajam,facebook yu shakut re ai hte yup ten hpe n shayawm kau ga,ana ahkya ni hpe n saw shaga ga ngu shiga madat ni yawng hpe kalang mi bai tsun shadum garan kachyan ya dat ga ai law.

Lamang tang madun ai - Julia Ja Ing