Sabyi Si hkai Sun Hta Duhkrat Chye Ai Ana Zinli Ni

 Sabyi si hkai sun hta kaning re Ana zinli ni law malawng du hkrat chye ai ngu ai lam hte seng nna Internet laika man hta na mu hti lu ai hpe gam garan ya na n ngai.

 Ndai sabyi hkai sun ni hta ana zinli hku na law malawng mu lu ai gaw lap hkraw, lap kyip ai hte shu di kamu ana ni rai nga ai.

  Lap hkraw ana – Sabyi hpun gaw shaning galu hpun / aten galu hpun rai nna May- Jan shata laman hta lap kyip ana du hkrat chye ai. Sabyi si hkai ai buga ginra ni hta law law du hkrat chye ai. Hpun lakung laking , ndung npawt yawng hta ana ni du hkrat jahten shaza chye ai.

   Ana zinli kumla ni – Ana n-nan byin wa ai ten hta lap a npu maga hta loi htoi htoi re nsam mahkret ni pru wa ai. Jan shingkang npu hta sharawt yu yang grau na mu lu nga ai. Bai Ana zinli sawng wa ai ten hta chyang mang ai  nsam de galai shai wa chye ai. Ana zinli sawng wa yang lap ni mang hkraw wa nna aloi sha run hkrat wa chye ai. Bai lap ni run hkrat mat ai law yang asi ni kyip nyip jup mat chye ai.

 Si tawng ntsa hta Ana du hkrat yang si tawng ni gaw loi mang ai nsam de galai mat nna kalang marang atum mu ai du hkra kapran ga wa chye ai hte asi atsawm nkung myin wa ai lam byin chye ai.

   Shu’ di kamu Ana Zinli – Ndai shu’ di kamu ana gaw Sabyi si hpun hta shaning tup du hkrat chye ai. Asi law law pru ai gaw July hte AUG  hta kalang, Feb hte May shata hta kalang, si urawng ni ntsa hta Ana zinli kumla ni hpe mu chye ai. Ntsa lam hku yu yang, hpun hkalung ai yawng hta du hkrat chye ai.

   Ana Zinli Kumla ni – Ana n-nan byin hpang wa ai ten hta sa byi lap a  npu maga hta amut re ai hpe mu lu ai. Bai dai hta Ana sawng wa yang hpraw nsam de galai mat nna nam lap npu maga yawng ting de matut na chyam bra mat wa ai.

 Asi urawng n nan si ai ten hta ana du hkrat yang asi nmatut si wa chye ai. Asi tawng ntsa ni hta wan hkut wan wu chya da ai zawn byin chye ai. Ana sawng wa yang mang mang re nsam de galai shai wa chye ai hte Si tawng ni ja kat kat rai nga nna kalang marang atum mu ai ten du hkra ga chye ai.

 Ndai ana zinli ni mu hpang ai hte chyam bra grai lawan ai..Dai hpe dang hkra tsi lu  na matu galoi ma nhprai ai sha jep jen yu na matu ra nga ai. Ana a matu kaja dik ai tsi gaw Bawdo tsi n tsin rai nga ai. Acre mi hta kan hkum yun (7) P shadang gat nna Ana hpe makawp maga shamyit kau lu mai ai.