Mawkmu Pawt A Hkamja Lam Akyu

Mawkmu pawt hpe e moi kaw nna shat mai malu masha shadu sha ai shaloi jai lang lu sha ga ai hte maren ya daini na aten masha ni grau sha law wa nga ai.Ya ten mawkmu pawt hpe mahkri shat mai ntsin shadu sha ai,hotpot hte marlar shan kaw,marlar shat mai ni hta grai bang sha law wa ai hpe mu lu nga ai.Miwa myusha ni gaw moi shaning aten law law kaw nna mawkmu pawt hpe mungding tsi hku jai lang ma ai hpe mung chye lu ai.

Mawkmu pawt hpraw ai hte hkyeng ai baw hpan lahkawng nga ai hpe chye lu ai.Hpraw ai hpan gaw shat mai lu sha a matu grau sha mu ai rai tim,hkyeng ai hpan gaw grau nna tsi byin ai lam mung chye lu ai.Mawkmu pawt hta e vitamin dat,nhprang dat,hpri dat,carbohydrate dat ni  grai law rawng ai.Dai re majaw mawkmu pawt sha nna hkamja lam akyu ni law law hpe lu la mai nga ai.Mawkmu pawt hta e mawm dat grai law rawng ai majaw kan chyat,kan shing dang ai lam nbyin ai sha kan sa man hkra garum ya lu ai.

Vitamin A hte C grai law rawng ai majaw myi mu n gun hpe kaja shangun ai hte hkam jan lu na hkum chying ninggun hpe kaja shangun ai.Cancer ana byin wa lu masa hpe shayawm kau ya lu ai,tau nau makawp maga ya lu ai.Vitamin C dat grai law rawng ai majaw hpyi,shan pri madi tsawm na matu n gun jaw ya ai.Hpyi a matu vitamin C gaw kaja dik n gun jahpring ya nna collagen pru wa hkra jasu alun ya ai.Collagen pru ai gaw saba lai jan shing kang a majaw hpyi hten za hkra machyi hkrum ai lam nbyin hkra makawp maga ya lu ai zawn aten garai ndu yang hpyi kyip kapum dumrit ai lam nbyin hkra mung makawp maga ya lu ai hte shan nsam hpe asan rai pri madi tsawm htap shangun lu ai.

Mawkmu pawt hta lu sha n gun dat hte mawm dat ni grai law rawng ai majaw salum sai lam ni hpe hkamja shangun ai zawn sai shadang hpe hting hkang ya lu nna cholesterol hpe jahkrat kau ya lu ai.Potassium law rawng ai majaw salum ana nbyin hkra makawp maga ya lu ai.Magnesium hte calcium law rawng ai gaw cell ni hta ra kadawn ai ntsin hpring tsup nna sai gayin hkawm sa kaja ai majaw salum sai lam chyum gyip ai lam nbyin hkra makawp maga ya lu ai akyu ni mawkmu pawt sha nna lu la mai nga ai.Mawkmu pawt hpe shadu sha ai shaloi grai na hkra mari da ai hku nre sha,ya mari ya sha rai a katsing hprap hprap shadu sha ai gaw grau kaja ai.

Tsawra ai shiga madat nu wa hpunau ni ndai mawkmu pawt gaw sha dat yang mung hkyau hkyau  nga nna sha mu la nga ai zawn hkamja lam akyu law law hpe mung lu la mai ai lam daini anhte na la,chye la lu saga ai. Dai re majaw mawkmu pawt hpe sha nna hkum hkrang,myit masin ngwi pyaw hkam kaja ai akyu hpe hkam la nga ga law.

Lamang tang ma dun ai - Julia Ja Ing