Wa Sarabyin Francis a Labau - Daw (3) - (October 16, 2018)

Nawku hpung a labau lam hpe hkap madat la na ten bai du wa magang nga sai hte rau, daini na lamang hta, hpung ting a ningbaw Wa Sarabyin Francis a labau lam hpe mu hti hka ja sawk sagawn lu ai made mi shiga madat ni hpe matut gam garan ya na matu lajang da n ngai.

Nuwa hpu nau ni, lai sai lamang hta Wa Sarabyin francis hku nna, Nawku hpung a htung tara nga ai hte maren, Wa Sarabyin Benedict hkringsa mat ai majaw, Sarabyin byin bai lata ra ai, dai majaw, nye a manang Cardinal ni hku nna, mungkan shara shagu na, Cardinal ni hpe shaga let, Sarabyin lata dang da lam ai galaw ai hte, anhte ndai kaw du zup nga ga ai. Nye a manang ni mung, ngai hpe ndai sagurem magam lit shatsam ai hte Karai Wa jaw ya ai lit magam rai sai majaw, ngai hkap la sai. Raitim, ya ngai nanhte Nuwa hpunau ni yawng hpe, rai n shaman shi yang, ngai hpe kyu hpyi ya marit nga nna, san peter pa kaba hta du hpawng nga ai hpung masha ni hpe hpyi lajin lai wa sai lam na la lu saga ai rai nga ai.

Ndai lam gaw, grai shagrit shanem ai, Wa Sarabyin Francis a myit masa rai nga ai. Yan a zawn, Wa Sabyin lata la hkrum sai hpe na lu ai, Argentina mungchying sha ni a myit hta, tsun nma hkrai kabu ai lam ni anhte shiga ni hkan, shi a labau laika man ni hkan mu lu nga ga ai re. Wa Sarabyin tai wa ai hpang, shi a sagu hpung masha ni hpaw tsun ai hta, anhte a Saguremwa, Roma mungdan hta daju let, mungkan ting na saguhpung masha ni hpe woi awn hkawmsa ra sana re hpe kabu lawm ai raitim, anhte a makau na, saguremwa htawt mat wa ai majaw gaw, myit hta amyu mi nga gaw hkam sha ga ai nga nna tsun hpaw da nga ma ai re.

Dai zawn rai nna, Wa Sarabyin Francis gaw, hkringsa mat sai rai nga ai, Wa Sarabyin Benedict XVI a n ngut kre shi ai Nawku hpung a magam lit ni hpe matut gun hpai taw nga sai rai nga ai. Wa Sarabyin gaw, maga mi de, tsaw tsan ai mungdan hkan na hpung masha ni hpe mung, myit du let sa du gawan ai lam ni mung galaw lai wa sai rai nga ai. Shi hkaw dung nga ai, Vatican kaw nna, shinggan mungdan de hkawmsa ai hkrun lam ni hta.. Brail mungdan Rio de jeneiro kaw galaw ai mungkan ramma hpawng kaba de, 2013 ning July shata 22-29 du hkra sa du gawan lai wa sai rai nga ai.2014 ning hta gaw, Iserel, Jordan, palestine de, May shata 24-26, Dingda korea mungdan de August shata 14 kawn 18 ya, Albnia de, Sep 21 ya shani  sa du gawan lai wa sai. Bai Nov shata 25 ya shani mung, Pyintit mungdan de, Nov 28-30 ya shani du hkra gaw, Turkey mungdan de sa du gawan lai wa sai rai nga ai.

Bai 2015 ninng, Jan shata 13 kawn19 ya shani du hkra, srilana hte Philippines mungdan de sa du gawan lai wa sai. June shata 6 ya shani hta gaw, Bosnia hte herzegovia mungdan de. July shata paraw 5 ya kawn 13 ya shani du hkra, Bolivia, Ecuador the Paraguay mungdan de, Sep 19 ya shani kawn 27 ya du hkra, cuba the America mungdan de, Nov 15 ya shani kawn nna, 30 du hkra Kyena, Uganda hte cegral arican republic mungdan de sa du gawan lai w asai rai nga ai. Bai 2016 ning, Feb 12  kawn 18 ya shani du hkra gaw, Cuba hte Mexico mungdan de, april 16 ya shnai gaw, Greece mungdan de, June 24 kawn 26 ya du hkra gaw Amenia mungdan de, July shata  27 ya kawn 31 ya du hkra gaw, Polang mungdan de, Sep 30  ya kaw nna, Oct shata praw 2 ya shani du hkra gaw, Georgia the azebijan mungdan de, Oct 31 the Nov Praw 1 ya shani hta, Sweden mungdan ni de sa du gawan lai wa sai rai nga ai. Bai daining lamang hta gaw, lai wa sai 2017 ning April 28 kawn 29 ya hta Egypt mungdan de, may shata 12 ya kawn 13 ya du hkra Portugal mungdan de, Sep shata praw 6 ya kaw nna,10 ya du hkra gaw, Colombia mungdan de sa du gawan lai wa sai rai nga ai. Anhte a Myanmar mungdan de gaw, lai wa sai 2017 ning Nov shata 27 ya shani kawn nna, 30 ya shani du hkra sa du gawan lai wa sai rai nga ai.

Shingrai, nu wa hpu nau ni, Wa Sarabyin Francis gaw, sak kaba wa sai raitim, sagu hpung masha ni yawng hpe mai byin ai made mi sa du gawan, n gun jaw nga ding yang rai nga mali ai re. Wa Sarabyin a Shakut shaja ai Sasana magma lam ni hpe kasi la let, anhte nang ngai yawng mung, Madu Karai kasang a myi man tau let, wenyi makam masham lam hta labau lu ai ni tai lu hkra shakut nga ga ngu, n gun jaw let, lamang hpe ndai kaw naw jahkring sai rai.

Shamyet shanat ai - Wa Sarabyin Francis a Labau Laika Buk hte Wa Sarabyin a Documentry

Ka Lajang ai; Mama Rose Angeline Maran Nang Doi

                          RVC Ginjaw Rung, Aung Nan

                          Myitkyina