Ya Ten Ra Ahkyak Dik Ai Lu Sha Dat Ni

Ya na zawn rai shawoi nbyin yu ai ana zinli ningnan rai nga ai Covid-19 (Coronavirus) kap bra ana chyambra nga ai ten hta masha shagu hkum hkrang hkam kaja ai hte hkum chying ninggun kaja ai rai yang she ana kanu ni hpe ning hkap hkam jan lu na rai nga ai.Dai majaw ya aten hta vitamin A,vitamin C,vitamin E,Zinc dat,protein dat ni hpe masha shagu hpring tsup ai hku lu la na ra ahkyak nga ai.Dai dat ni hpe malu masha ni kaw mung lu la mai nga ai.

Hkum chying ning gun kaja na matu Vitamin A ( Betacarotine ) – Vitamin A gaw pu lam hte nsa sa lam hpe hkamja shangun lu ai.Dai majaw lu sha n gun dat ni hpe atsawm sha chyup gang la lu na matu n gun jaw garum ya lu ai zawn covid ana byin wa yang madung gasat machyi shangun ai nsa sa lam hpe hkamja shangun lu na rai nga ai.Vitamin A dat hpring tsup ai hku lu mai na lu sha ni gaw pawt htoi,nai sam,salau lap,tsit ai hkrang pan hte majap shabawm ni rai nga ai.

Vitamin C – vitamin C gaw anhte yawng chye ai hte maren hkum chying ning gun hpe kaja shangun ai dat rai nga ai.Dai majaw ya na zawn rai  hkum chying ning gun kaja ra ai aten hta vitamin C hpring tsup hkra lu na ra nga ai.Vitamin C gaw antibodies byin pru wa hkra jasu alun ya lu ai.

Vitamin C dat grai law rawng ai lu sha ni gaw strawberry,lwi hkri si,kiwi si,lwi dwi si zawn re ai namsi nam saw ni rai nga ai majaw dai nam si nam saw ni hpe sha ya ra ai.

Vitamin E – vitamin E gaw anti-oxidant dat myu mi rai nna hkum hkrang hpe jamjau jaw jahten ai free radical a hpyen kaw na makawp maga ya lu nga ai hte hkum chying ninggun kaja hkra mung kaja dik garum ya lu nga ai.Vitamin E dat grau law rawng ai lu sha ni gaw nam law,nam lap kaw na lu ai sau,hpyi ja ai kata na tum hpan ni hte taw bat si ni sha ya na kaja ai.

Zinc dat – zinc dat mung hkum chying ning gun kaja dik masa hta nga hkra garum ya lu nga ai.Hkum hkrang hta zinc dat n gun yawm ningra wa ai rai yang machyi makaw byin loi nna ana ahkya kanu ni loi loi hte kap shang wa lu nga ai.Dai majaw hkum chying ning gun kaja na matu zinc dat hpe mung malap da nmai nga ga ai.Zinc dat grau law lu mai ai lu sha ni gaw shapre hpan amyu my,tum hpan ni,u shan,hkai pyek shan hte pang lai nga ni sha ya na kaja ai.

Protein dat – ndai protein ngu ai shan dat mung hkum hkrang hta n nga nmai ra ahkyak ai hkum chying ning gun hpe jahpring ya lu ai dat rai nga ai.Protein dat law rawng ai lu sha ni gaw sau nlawm ai hka rang shan,pang lai lu sha,di hpan amyu myu,shapre hpan amyu myu,hpyi ja ai kata na tum hte tum hpan amyu myu ni sha ya na ra nga ai.

Bai hpyi ja ai kata na tum hpan ni hta na anhte loi loi hte lu sha mai ai bu hkrawp si,nbu si,wa hkum tum,tum male tum,gyin shau tum,shatapan tum ni sha ya mai ai.

Dai majaw tsawra ai shiga madat nu wa hpunau ni e ya ten mungkan hta shawoi nbyin yu ai Covid-19 ana zinli a majaw anhte mungkan masha ni yawng hkrit maja let nga ra nga ga ai.Ya aten du hkra ndai ana zinli gaw yawm mat ai lam garai n nga,grau grau byin law jat ding yang rai nga ai gaw tinang a makau mayang kaw nan du taw nga sai.Dai hpe ning hkap hkam jan gasat lu na matu tinang kaw nna shawng makawp maga ai ladat hte nga sa nna masha shagu hkum chying ning gun kaja hkra nga ga ngu yawng hpe kalang mi bai n gun jaw tsun shadum ya dat ga ai law.

Lamang tang madun ai - Julia Ja Ing 

Source from Internet