Wa Sarabyin Francis a Labau - ( Daw 2) - (October 9, 2018)

Nawku hpung a labau lam hpe hkap madat la na ten bai du wa magang nga sai hte rau, daini na lamang hta, hpung ting a ningbaw Wa Sarabyin Francis a labau lam hpe mu hti hka ja sawk sagawn lu ai made mi shiga madat ni hpe matut gam garan ya na matu lajang da n ngai.

Nuwa hpu nau ni, Madu a shaning 1992 ning May shata 20 ya shani hta, Wa sarabyin Francis, shi a Saradaw ting nyang ap ai lamang hpe Saradaw jawng hta sha Cardinal kawn ap jaw ya sai lam chye lu ai. Ya na zawn, sagurem lit magam hpe gun hpai shakut nga let, Carinal Quarracino nnga mat ai hpang, 1998 ning, Feb 28 ya shani hta, Buenos Aires a ginwang up Saradaw kaba lit magam hpe gun hpai sai rai nga ai. Ndai zawn rai nna, ginwang up Sagurem lit magam gun hpai ai (3)ning na ai hpang, ya nnga mat wa sai, San Pra ai Wa Sarabyin Yawhan Paulu (2) kaw nna, shi hpe, Cardinal aya bai dang da hkrum sai rai nga ai. Shi a nhkring nsa sasana magam lam hta shakut shaja ai, wenyi lam yan hta n gun dat ai lam ni a majaw, shi a lam gaw, Latin America dan hta kajai gumhkawng wa sai. Ndai zawn, 2002 ning kalang hte 2008 ning hta, kalang numdaw bai Argentina Saradaw wuhpung a ningbaw lata dang da hkrum sai. Anhte yawng chye chyalu rai nga sai, lai wa sai 2005 ning, San pra ai Wa Sarabyin Yawhan Paulu (2) nnga mat ai hpang, Wasarabyin Benedict XVI hpe, Sarabyin lata dang ai shaloi mung, sa dung shang lawm lai wa sai rai nga ai.

    Wa Sarabyin shi a buga rai nga ai, Boeno Arise a lithkam Sagumrem magam hpe gun hpai nga ai ten, Jau ni hte yu maya hpung masha ni, lata gindun nna, nawku hpung a magam lam hta shakut shaja ai, matsan jam jau hkrum ai ni hpe myit du, myit shalawm let, shanhte hpe lakawn lanawn ai magam hpe n gun shadat ai, hpung masha ni hte ahkum dinglum, ni ni htep htep rai nna, woi awn lakawn lai wa sai rai nga ai. Shi a labau laika ni hta hti yu ai shaloi, dai shi a Saradaw ginwang hkan na Nawku hpung masha ni, shi a jawngma manang ni, hku hkau ai manaw manang ni a hkamsha lam hte shi a ntsa mu mada ai lam ni hpe hpaw tsun dan ai lam ni mu lu nga mali ai nu wa ni.

Ganing re ai mu mada ai lam kun? Nga jang, … Wa Sarabyin gaw, kadai hpe mung hku hku hkau hkau maren mara tsun shaga chye ai, shi gaw, ting kyeng mawdaw, Taxi n jawn ai, mungchying sha ni jawn ai mawdaw kaba ni sha jawn ai, dai majaw, mung chying sha ni a sak hkrung nga pra lam hpe grau chye na hkam sha ya lu ai nga ai. Shi a manang ni tsun da ai hta gaw, shi gaw, grai sumnung shingdi ai hte sak hkrung hkawmsa ai wa re nga da ai.

Ndai zawn rai nna, shi a Saradaw ginwang na hpung masha ni a matu, grai kam hpa shara, rai nga ai ten, 2013 ning, Feb 28 ya shani, Wa Sarabyin Benedict XVI, Sarabyin lit magam kaw nna, hkringsa mat ai hpang, March 13, 2013 hta gaw, 1.2 Billion, Wan hkying mi jan re ai Catholic Nawku hpung hpe woi awn taw nga ai gaw, daini du hkra rai nga ai. Wasarabyin a mying gaw, Jorge Mario Bergoglio raitim, San francis Assii a mying hpe la let, shi zawn rai nna, maku grup yin shingra tara hpaw tsawra makawp maga ai, matsan mayan hkam, shagrit shanem let, nawku hpung a magam hpe woi awn na ngu ai yaw shada lam hte hpawn rai nna, Francis ngu myit la let, Sarabyin a lit magam hpe gun hpai ai rai nga ai. Bai nna, Wa Sarabyin a lak lai ai lam gaw, shi hpe Sarabyin lata dang da ngu ai hpang, San peter pa kaba hta ala nga ai, Mungdan shara shagu na du zup nga ai hpung masha ni hpe, shakram ai lam gaw, tsawra ai nawku hpunau ni yawng, ngwi pyaw ai shana de maga rai u ga nga nna shawng, ahkum alum shakram lai wa ai rai nga ai.

Bai nna, Nawku hpung masha ni hpe tsun ai hta, Nawku hpung a htung tara nga ai hte maren, Wa Sarabyin Benedict hkringsa mat ai majaw, Sarabyin byin bai lata ra ai, dai majaw, nye a manang Cardinal ni hku nna, mungkan shara shagu na, Cardinal ni hpe shaga let, Sarabyin lata dang da lam ai galaw ai hte, anhte ndai kaw du zup nga ga ai. Nye a manang ni mung, ngai hpe ndai sagurem magam lit shatsam ai hte Karai Wa jaw ya ai lit magam rai sai majaw, ngai hkap la sai. Raitim, ya ngai nanhte Nuwa hpunau ni yawng hpe, rai n shaman shi yang, ngai hpe kyu hpyi ya marit nga nna, san peter pa kaba hta du hpawng nga ai hpung masha ni hpe hpyi lajin lai wa sai lam garam garan ya let, Wa sarabyin Francis a labau lam ngam nga ai daw hpe du na lamang hta bai hkap madat la nga ga.

Shamyet shanat ai - Wa Sarabyin Francis a Labau Laika Buk hte Wa Sarabyin a Documentry

Ka Lajang ai; Mama Rose Angeline Maran Nang Doi

                          RVC Ginjaw Rung, Aung Nan

                          Myitkyina