Covid 19 Ana Galoi She Mat Hkoi Na Kun

Corona virus Covid -19 ana zinli gaw ya sha hkoi tsai mat ai baw nrai sai. Dai majaw tinang hkum tinang sadi nna she nga ra na ga ai.Ndai ana zinli hpe makawp maga lu ai/shamai shatsai lu ai tsi mawan kaja lawan lu htuk shapraw na matu mung akyu ja ja hpyi nga ga.

Ya ndai aten hta gaw anhte a shani shagu na nga sat nga sa lam hpe galai shai nna ladat nnan hku asak hkrung hkawm sa ra sai.

Corovirus (Covid – 19) ana gaw shara shagu hkan galoi mung nga taw chye ai ngu myit la nna ahkyak ai lam n nga jang,tinang a dum nta kaw sha nga ai gaw makawp maga lam kaja langai rai nga ai.

Ahkyak ai lam n nga jang shinggan de majoi npru hkawm na,pru hkawm ra jang myiman magap mask hpe nbyin nmai jai lang na,ra ang jang face shield ngu ai myiman shinggan hpe jai lang na ra nga ai.

Grau nna masha law,masha hpawng chyawm ai shara ni hpe mai byin ai made koi yen ra na ga ai.Bai nna manam hkap la ai,sumtsan manam jashawn bang ai lam ni mung shayawm ra ai/mai byin yang ndai aten gaw manam nhkap la ai kaja dik re.

Ndai lam ni gaw mungdan asuya hte hkamja dap a matsun hpe hkan sa ai lam mung rai nga ai majaw masha shagu sadi maja let nga ai rai yang she ana chyambra ai lam yawm mat lu na re.

Mungkan hkamja dap,mungdan hkamja dap ni a matsun ni hte maren lata hpe ladat jaw jaw hte jahkring hkring sha kashin na mung ra ai.Shinggan na du wa yang labu palawng hpe kalang ta raw galai kau na,hka nlu shin kau ai rai tim lagaw lata atsawm kashin kau na ra ai.

Kaga masha hte ga shaga ai,gat mari,gat sa ai shaloi hkan pre 6 gang ai hku nga na mung ahkyak ai.Nra jang kaga masha hte ga majoi n shaga hkawm ga.

Shinggan de pru hkawm ra jang mai byin ai daram masha law ai ten hpe koi yen ga.Tinang a dum nta manam hkap la ai lam mung mai byin ai daram n galaw ga.Ahkyak ai manam ni hte hkrum shaga ra jang social distancing ngu ai pre 6 gang ai kaw na she shaga ga.Tinang hkum npyaw ai zawn nga wa jang  hkamja dap de lawan ai hku shana ga.

Naw kaji ai ma ni hpe mung Covid-19 a lam atsawm chye na hkra tsun dan ga,ndai aten ma ni hpe shinggan de nwoi hkawm ga,jahkring jahkra gat sa mari ai zawn re ai hkan jahkring sha re ngu nna ma ni hpe n woi sa ga.

Hkam jan lu ai hkum chying n gun kaja na matu hkru hkru yup,hkru hkru sha na ahkyak ai zawn tsa chyaru hte malut hka yawm lu sha ai hpe shayawm ra ai ten mung rai nga ai.

Sadi sahka let nga ai gaw tinang hkum nan a matu hte tinang dum nta masha ni a matu,tinang a mare buga,tinang a mungdan hte mungkan hpe makawp maga ai lam rai nga ai.

Tsawra ai shiga madat nu wa hpunau ni e ndai Corona virus Covid-19 ana kap hkrum jang tinang hte ni htep ai masha ni,tinang hte hkrum ai masha ni hta lawan ai hku kapbra ai hte tinang jum magra da ai arung arai ni kaw nna,tinang jahkru kahti dat ai shaloi pru wa ai nbung kaw nna mung kaga masha ni hta kapbra lawan ai ana zinli rai nga ai majaw hkrit tsang ra ai ana langai re ngu hkap la nna yawng a matu galoi mung sadi sahka let nga sa ga,tinang kaw nna shawng makawp maga la ai gaw masha yawng hpe makawp maga ai mai kaja lam rai nga ai.

Source : Ministry of Health and Sports, Myanmar .

By – Julia Ja Ing