Vitamin C A Lam Hpe Atsawm Chye Da Ai Kun

Vitamin C nga nna anhte galoi mung na yu taw ai,tsun taw nga ga ai rai tim vitamin C a lam hpe anhte atsawm hkrak chye nga ga ai kun?Hkum hkrang a matu,hkamja lam a matu hpa baw hpe madung akyu jaw ya ai dat re kun ngu ai hpe anhte atsawm chye na da ga ai rai yang vitamin C hpe grau nna akyu pru ai hku jai lang lu sha chye na rai nga ga ai.

Vitamin  C gaw anhte a hkum hkrang hkamja lam sha nrai,hpyi hkamja lam a matu mung madung ra kadawn ai lu sha dat langai rai nna nra,sap sanap,lasa shan hte sai lam lasa ni hta ra kadawn ai collagen hpe shabyin ya lu ai.Vitamin C ngu ai hpe grau nna loi ai hku tsun ga nga jang namsi nam saw ni hta mu lu ai acid dat rai nga ai.Dai dat ni gaw masha hkum hkrang a hkum chying n-gun hpe kaja shangun nna masha hpe hkamja shangun lu ai sha n-ga hpri dat hpe atsawm sha jaw lu ai majaw nra hte lasa shan ni hpe atsam sharawt ya lu ai.Hpyi shan hpe madi lali tsawm shangun lu nga ai.

Vitamin C dat hpe shingra namsi,namsaw,nam law nam lap ni rai nga ai lwi dwi si,lwi hkri si,ba hkri si,lwi hkrawn si,strawberry si ni hta grai law rawng ai hpe mu lu nga ai.Vitamin C hpe tsi mawan amyu myu hku nna galaw htuk shapraw da ai mung law law nga ai hpe mu lu nga ai.

Mi sha tsun sai vitamin C gaw hkum hkrang a hkum chying n-gun hpe kaja shangun ai dat rai nga ai. Masha gaw tinang hta hkam jan lu na hkum chying n-gun kaja ai rai yang she shing gan kaw na du shang wa ai ana ahkya ni tinang a hkum hkrang hpe jam jau njaw lu hkra ning hkap shing dang lu na rai nga ai.Tinang hta hkum chying n gun kaja taw ai rai yang machyi makaw byin wa tim hkum hkrang na ana kanu ni hpe lawan ai hku gasat kau lu ai majaw machyi lawan mai tsai shangun lu nga ai.

Ndai vitamin C hpe lusha n-gun dat ni kaw na law malawng lu mai ai re majaw vitamin C rawng ai n-gun tsi mari sha na malai vitamin C law rawng ai namlaw nam lap,nam si nam saw ni hpe madung sha ya lu ai gaw kaja dik rai nga ai.Raitim vitamin C n-gun tsi lu nna grai wa hkra machyi akyu yawm ai lam chyawm gaw nbyin shangun ai lam chye lu ai.

Masha langai a matu lani mi vitamin C dat  kade ra kadawn ai hpe mung chye tawn da na ra nga ga ai.Shadang la langai a matu lani mi ra kadawn ai vitamin C dat shadang gaw  (90) mg rai nna shayi num ni a matu lani mi ra kadawn ai gaw 75 mg rai nga ai.Shani shagu vitamin C hpe 2000 mg hta jan nna lu ai rai jang chyawm gaw sade hta nlung rawng ai, kraw galau madawn ai,kan mase ai lam ni byin wa chye ai hpe sadi la na ra nga ga ai majaw ra ang ai madang hpe chye tawn da nna shadawn sharam jai lang lu sha chye ga.

Vitamin C dat hpe alaw ahtam nlu ai rai yang mung sai n gun yawm ana byin wa na masa grau law wa ai hte lusha n-gun ningra ai,thyroid hormone law ai,cancer byin wa ai hte hpri dat nlu chyup ai lam ni byin wa chye nga ai.Malut hka yawm lu ai mung vitamin C dat zing hkang da ai hpe tsa shadang 30% daram du hkra yawm mat shangun chye nga ai re majaw ndai malut  hka yawm lu ai gaw hkum hkrang jahten shaza hkra machyi shangun ai hta shara shagu lawm taw nga ai.

Vitamin C dat ra kadawn chye ai ni gaw lu sha lata ai masha ni,lusha hpe hkamja lam hte htuk hkra nsha ai masha ni,sade kashin taw ra ai masha ni,tsa grai lu ai masha ni hte hka yawm lu ai masha ni hta ra kadawn ningra chye nga ai.

Vitamin C ra kadawn ningra ai masha ni hta hpa ni hkra machyi wa chye ai baw re kun  (1) ningma mai yak ai,vitamin C dat yawm taw ai rai yang ningma kaba hkum tsun kaji kajaw hkra machyi la ai ningma kaji nga yang pyi ningma mai yak ai lam byin chye nga ai.

2) Wa uji sai pru ai,ladi sai yun ai lam byin chye ai. (3) Hkum namnak rawt shangun ai,tinang hta e vitamin C dat nlaw taw ai rai yang hkum hkrang hta sau shajan ni law rawng wa ai. 4)Hpyi hkraw ai,hkri kyip kapum ai lam byin wa ai – vitamin C dat law rawng ai masha ni a shan,hpyi ni gaw a madi rai hkalung tsawm nga ai.

5) n-gun yawm ba lawan ai – vitamin C dat n-gun yawm ai masha marai 7 hta na marai 6 gaw grai wa shamu shamawt lam n galaw ai rai tim puba lawan,n-gun yawm ai hpe hkam sha chye ai lam mu mada lu nga ai.(6)Hkum chying n-gun yawm ai – vitamin C hta hkum chying n-gun hte seng ai lam law law nga ai.Dai majaw tinang gaw jahkring hkring sha machyi chye ai,machyi bai bran na, na ai rai yang vitamin C n-gun yawm ai majaw mung byin chye nga ai.Hkam jan lu na hkum chying n-gun hta madung ai vitamin C gaw sinwawp bum ana hte kaga ana ahkya law law hpe makawp maga ya lu ai atsam nga ai.

7)myi mu n-gun yawm ai – vitamin C nlaw ai rai yang asak aprat kaba wa ai hta hkan nna byin ai myi nmu,myi mam mam ai mabyin pyi grau sawng wa chye nga ai.Malu masha kaw na vitamin C alaw ahtam lu ai rai yang she myi hkamja lam hpe grau nna makawp maga lu na rai nga ai.

Vitamin C ra kadawn ningra ai masha ni hta matut byin chye ai ana ni gaw aten na wa jang wa n kaja,wa daw ye loi ai,lata lamyin ni daw ye loi ai,ana kanu shang loi ai,lami laman machyi ai,nra ja kahta ai ana ahkya ni matut byin nang lawm wa chye nga ai.Dai mang hkang ni a matu vitamin C dat bai jahpring ya dat ai rai yang nhtoi kadun laman hkyamsa wa nna shata masum laman bai kaja wa lu mai nga ai.

Ya na zawn ndai ana hkrit ra,wow ra ana kap na tsang ra re ai aten hta tinang a hkum hkrang hkamja nna hkam jan lu na matu hkum chying n-gun kaja ai vitamin C dat alaw ahtam nga na gaw grai ahkyak la nga ai majaw vitamin C dat law rawng ai nam law nam lap,nam si nam saw ni law law sha nna n-gun jahpring la nga ga.

Source from internet

By : Julia Ja Ing