Wa Sarabyin Francis a Labau - ( Daw 1) - September 25, 2018

Nawku hpung a labau lam hpe hkap madat la na ten bai du wa magang nga sai hte rau, daini na lamang hta, hpung ting a ningbaw Wa Sarabyin Francis a labau lam hpe mu hti hka ja sawk sagawn lu ai made mi shiga madat ni hpe gam garan ya na matu lajang da n ngai.

Nu wa hpu nau ni, nang ngai anhte yawng chye nhtawm me, ya ta tut, anthe a tsa ban hta nawku hpung hpe woi awn nga ai Wa Sarabyin Francis gaw, Chyoi Pra ai Catholic nawku hpung a (266) ngu na Kasa Petru a gawng malai tai nga ai, Sagurem, Wa Sarabyin mung rai nga ai. Shi gaw, Argentina myu sha rai nhtawm me, Kawa Mario Jose Bergoglio hte kanu Regina Maria Sivori yen kaw nna, 1936 ning, December shata (17) Ya shani, Argentina mungdan, Buenos Aires ngu ai shara hta shangai chyinghkai wa ai rai nga ai. Shi a mying gaw, Jorge Mario Bergoglio rai nga ai. Kanu yan kawa gaw, Italian bu htawt hkawm masha rai nna, Argetina mungdan hta sa du shanu machyu nga ai lam chye lu ai. Wa Sarabyin shannau ni yawng rai yang, marai (5) rai ma ai, la kasha masum, hte numsha lahkawng rai nga ai. Ndai zawn rai, Kanu yan Kawa a shingnip npu hta nga let, mungkan hpaji ni hpe sharin hkaja la ngut nna, 1958 ning, March shata 11, shi a asak (21) ning jan hta, hte society of Jesuit ngu ai, Jau Wuhpung de shang let, Karai hpaji ni hpe sharin hkam la hpang wa nu ai.

Dai hpang chile mungdan kaw e shingyim wuhpung wuhpawng hte htunghking lam yan hte seng ai hpaji ningli hpe sa sharin hkaja la ai ngut ai hpang, Argentina mungdan de bai nhtang wa nhtawm me, 1960 ning, March shata 12 ya shani gaw, poverty, chastity and obedience ngu ai, matsan mayan ai, san seng ai hte madat mara ai ngu ai shawng ningnan na ga sadi hpe hkamla sai rai nga ai. Dai hpang, 1963 ning hta, Philosophy ngu ai myit sawn hpaji janmau hpe Colegio de San José ngu ai College kaw nna hkamla lu sai rai nga ai. Dai hpang 1964 ning kawn 1965 laman hta, Immaculate Conception ngu ai College hta myit sawn hpaji sharin Sara magam gun lai wa sai lam shi a labau laika hta matsing da ai hpe mu lu ai. Dai hpang, 1966 ning hta gaw, dai hpaji hpe sha, Bunno Aires na, Colegio Del Salvatore ngu ai jawng hta myitsawn hpaji hpe sha, sharin ya lai wa sai rai nga ai.

1967 ning kawn 1970 ning du hkra gaw, mi shi myit sawn hpaji sharin hkaja la ai, College, Colegio de San José ngu ai kaw sha, Theology ngu ai chyum hpaji hte seng ai lam hpe jan mau gup la lu sai rai nga ai. Ndai zawn rai nna, mungkan hpaji hte karai hpaji ni hpe sharin hkaja la nga let, 1969 ning December shata 13 ya shani gaw, Wasaradaw kaba Ramon Jose Castellano a lata hta htani htana jau tai aya hpe hkamla lu sai rai nga ai. Dai hpang, 1970 hte 71 ning hta, Spain mungdan na, University of Acala de Henares ngu ai dakkasu hta, matut hpaji sharin hkamla lai wa sai. 1973 ning, April 22 ya shani hta final profession ngu ai, Jesuiuts jau wuhpung a hpang jahtum ngu na ga sadi hpe hkam la lai wa sai rai nga ai. Dai hpang Argentina mungdan de bai nhtang wa let, Myit tsawn hpaji hte chyum dakksu hta lithkam Jau hku nna magam gun lai wa sai.

Ndai zawn, magam gun nga yang, 1973, July 31 ya shani hta, Argentina mungdan, Jesuits Jau wuhpung a lithkam Jau kaba magam lit hpe shatsam hkrum let, 6 ning tup magam gun lai wa sai rai nga ai. Dai magam gun ngut ai hpang, Colegio De san Jose ngu ai Collage hta, 1980-86 ning du hkra, lithkam Jau magam hpe bai shatsam hkrum lai wa ai. Ndai zawn rai nna, Wasabyin shi a magam bungli shagu hta kang ka let shakut shaja ai lam ni hpe mu lu ai majaw, Buenos Aires a Saradaw Kaba Cardinal Antonio Quarracino kaw nna, shi a magam hta shaga la let, shi hte rau nawku hpung a magam ni hpe shakut nga sai rai nga ai.

Shingrai, 1992 ning, May shata 20 ya shani gaw, Madu hta ban sa yup pyaw mat wa sai rai nga ai, San pra ai Wa Sarabyin Yawhan Paulu (II) kaw nna, shi hpe Auca a Saradaw hte Bouenos Aires ningtau saradaw aya, lit magma hpe shatsam sai rai nga ai. May shata 20 ya shani hta, shi a Saradaw ting nyang ap ai lamang hpe Saradaw jawng hta sha Cardinal kawn ap jaw ya sai lam gam garan ya let, Wa sarabyin Francis a manu dan la ai labau lam, ngam nga ai daw hpe du na lamang hta bai gam garan ya na nngai law.

Shamyet shanat ai - Wa Sarabyin Francis a Labau Laika Buk hte Wa Sarabyin a Documentry

Ka Lajang ai; Mama Rose Angeline Maran Nang Doi

                        RVC Ginjaw Rung, Aung Nan

                        Myitkyina