San Pra Ai Wa Sarabyin John Paul II a Labau Lam (Daw 4) 17 Sep 2018.

Pope John Paul II a lam    daw 4

          Nawku hpung a labau hkap madat la na ten bai du wa magang nga sai. Daini na lamang hta, lai sai lamang hta na la lu sai, nau nna shi ai ten hta sha San Pra ai masha tang da hkrum sai, Wa sarabyin Pawlu II a lam ngam nga ai daw hpe matut gam garan ya mayu n ngai.

          Nu wa hpu nau ni, Wa sarabyin John Paul II a sumla hpe yu nna myit dum kyu hpyi ai hte, mau hpa na zawn rai, machyi ana mai mat ai Floribeth Mora a lam kau chyen hpe lai sai lamang hta na la lu saga ai rai nga ai. Mora ya na zawn agajawng sha mai tsai ai nna, Shat gawk kaw amu galaw nga ai ningrum ningtau wa hpang de sa nna, shi hkum nan shi a machyi makaw mai mat sai lam tsun dan nu ai. Daizawn mau hpa atsam the mai mat ai hpe mu ai ningrum ningatau wa gaw, n chye tsun hkra kabu myit pyaw let, karai kasang hpe chyeju dum shakawn sai rai nga ai. Mora ya na zawn a gajawng sha  mai tsai mat ai lam hte seng nna, Shi hpe san jep na matu, Roma mungdan, Vatican, nawku hpung ginjaw kawn nna hpaw da ai tsi rung langai mi rai nga ai, Policlinico Gemelli ngu ai tsi rung kaw, bat lahkawng dang nga let, bai jep sagawn yu ai shaloi, hpa ana mung n nga sai hpe mu mada lu ma ai. Dai majaw, Yawng a man hta sak se hkam sai rai nga ai.

          Ya na zawn, Wa sarabyin John Paul II kaw kam sham kyu hpyi ai a marang e mau hpa atsam the machyi makaw mai tsai wa ai lam, Mora sak se hkam ai hpang, MaMa Adele Labianca ngu ai jan, lai wa sai 1966 ning May shata hta, shi kam hpa ai , n nga mat wa sai Wa sarabyin John XXIII kaw kyu hpyi ai a marang e, shi a ana akajawng sha mai mat ai lam sak se hkam sai rai nga ai. Ndai mama gaw, shi a kam kata kaw cancer mawng ana, gum din kaba rawng ai majaw, tsi rung kaw ga lajang nga ai ten, mau na zawn rai mai mat ai rai nga ai. Ga kajang nga dingngam dai Cancer gundin kaba mat mat nna, sarawun ni du hkra, mau mat ai lam rai nga ai. Dai majaw, tsi sarawun kaba ni, tsi hpaji lam the seng nna, hpa tsun dan na lam n nga sai nga nna tsun da ai lam labau hta mu mada lu nga ga ai re. MaMa Adele Labianca hkum nan mung, ndai zawn mai tsai mat ai gawm mau hpa kumla kaba nan rai sai, nye a hkum hkrang sha mai tsai mat ai nrai, myit masin kata kaw e mung, Wa karai nan nga nga ai hpe hkam sha lu ai sha n ga, wenyi a mai tsai ai chyeju hpe mung hkam sha nga sai, nga nna sak se hkam sai rai nga ai. Dai majaw, nawku hpung kawn nna, Wa sarabyin Yawhan Pawlu II the, wa sarabyin John XXIII gaw, ya na zawn mau hpa lamik kumla ni hpe shabyin ya ai re majaw, nawku hpung kawn nna, shan hpe san pra ai masha shatai na matu, sagawn let, ta tut sak se ni hpe mu lu, hkam lu ai re majaw, San pra ai masha tang da na matu nawku hpung kawn nna myit hkrum sai rai nga ai.

Wa sarabyin Francis gaw, John XXIII , san pra ai masha tai wa na lam hte seng nna, nawku hpung kawn nna mau hpa mabyin masa lahkawng hpe hpyi lagun da ai raitim, mau hpa mabyin masa langai mi the sha san pra ai masha shatai ya na re lam hpe a ja awa, tang shawn da sai rai nga ai. Lai wa sai 2000 ning hta, wa sarabyin John XXIII hpe nawku hpung gin jaw kawn nna, Alu ai masha shatai da sai rai nga ai. Italian mama Caterina Capitani ngu ai jan, shi a machyi makaw byin ai lam, mau na zawn mai tsai mat ai gaw, Wa sarabyinJohn XXIII, san pra ai masha byin tai na matu sak se hkam ya ai, mau hpa lam nan rai nga sai re. Nu wa ni, ya sha tsun ai, wa sarabyin John XXIII a lam the seng nna, du na lamang ni hta matut gam garan ya na matu, lajang da n ngai.

          Nu wa ni, lai sai 1981 ning hta mung, wa sarabyin Yawhan Pawlu II hpe sat na matu lagyim gyam ai, Ali Agca ngu ai wa mung, wa sarabyin Yawhan Pawlu II hpe San Peter Pa kaba kaw e, si hkra gap ai raitim, n si ai sha asak hkrung lu ai lam gaw, mau hpa nan re nga nna Ali Agca hkum nan sak se hkam lai wa sai rai nga ai. Madu karai kasang ai yaw shada ai lam gaw, mau hpa nan rai nga ai. Hpa majaw nga yang, ya na zawn, sanat hte gap ai raitim, n si ai sha matut sak hkrung lu ai gaw, Madu karai kasang a yaw shada lam gade ram dam lada ai ngu ai lachyum rai nga ai. Na la lu sai Ali Agca ngu ai wa gaw, ya na zawn, n kaja ai magam galaw ai re majaw, shaning (20) ning tup, Italy mungdan na,  hkyuk htawng kaw rawng da hkrum lai wa sai rai nga ai. Turiki mung hku nna, hpyi shawn ai hte maren, shi a mara hpe raw ya nna, turiki mungdan de bai wa shangun sai rai nga ai. Raitim, ndai Ali Agca gaw, loi mazut ai masha re majaw, laga mabyin masa ni a majaw, dai mungdan kaw htawng bai rawng ra ai lam mungdan hta htuk shapraw ai, shi lai ka ni hta n dau shana ai lam labau hta tsun da nga ai. Lahta de na la lu sai, nau nna ai ten hta sha, San Pra ai masha tang da hkrum sai, Wa sarabyin Yawhan Pawlu II gaw, nang, ngai a prat ban hta mu lu na lu ai Sarabyin rai nga mali ai re. Chyoi pra ai Catholic Nawku hpung hpe, lam woi ning shawng tai ya ai sha n ga, wenyi kawa langai hku tai ya lai wa sai rai nga ai. Nawku hpung a magam lam hta sha n ga, mungkan lam a matu, simsa lam hte, shinggyim ahkaw ahkang hpe lu ging ai daram lu la hkra shakut ya sai wa mung rai nga ai. Tinang a tingkyeng myit hpe n madun, yawng a matu, lam woi ningshawng, n htoi gintawng tai ya let, Madu karai kasang hpang de woi sa ai, kawa langai rai nga sai re. Machyi makaw, ru yak jam jau, myit daw ai lam, manawn masham ai lam ni gade hkrum ra ai raitim, myit daw ai lam n nga, Madu Yesu the rau sha shakut hkawm sa lai wa sai rai nga ai. Dai majaw, ya daini, anhte yawng a man hta, San Pra ai masha ngu, shakawn shagrau, tang da hkrum sai rai nga ai. Nu Wa hpu nau ni, anhte yawng, San pra ai Yawhan Pawlu II a kasi la let, shi hpe kamhpa kyu hpyi nga ga, Grau nna machyi makaw, ana ahkya hkrum ai ten, san pra ai Sarabyin Yawhan Pawlu II kaw kamhpa kyu hpyi nga ga law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.