“Mai kaja ai kang ka ai dinghku kawa langai byin hkra gara hku shakut ra ai lam ( Daw 1)” (16 September 2018)

Tsawra hkungga ai Nuwa hpu nau ni, “mai kaja ai kang ka ai dinghku kawa langai byin hkra gara hku shakut ra ai” ngu ai gin lam hte seng nna, yawng a matu machye machyang rai u ga, gam garan ya mayu n’ngai.

          Nu ni Wa ni e..mai kaja kang ka ai dinghku kawa langai mi tai nga lu na matu, ta matut, hkungran ai chyeju kum la, hkam la sai hte  tinang hpe shatsam da ya sai lit hpe galoi mung sawn dinglik yu ra hte tinang a myit masa lam hpe Hkristan dinghku la langai mi hku nna, nga sa ra sai rai nga ai. Daizawn nga sa ai rai jang she awng dang ai dinghku hpe shabyin shatai ya lu na rai nga ai. Tsi du kaba ni, tara dara du salang ni hte tinang a kan bau bungli hta lak lai chye chyang nga sai ni yawng hte gaw, shaning law law tinang a prat hpe ru yak jam jau lam myu myu hkrum sha let shakut shaja nna, awng dang lam lu ai ni rai nga ai.

           Dai hta n’ga, hpaga yamga lam hta chyoi chye awng dang nga sai ni yawng mung daihte maren sha yet yet shawng shaman la nna, mahkrum madup law wa sai hte rau awng dang ai chyeju ni hkam la lu nga ai rai nga ai. Dinghku lit magam ngu ai gaw, tsun yang sha loi nga ai, kaja wa ta tut hta grai yak ai. grai shakut la ra ai nga nna, dinghku lit magam hta hkawm sa nga ai nu wa myit su ni tsun ai hpe na chye lu nga ai.

          Ya prat na ramma n’kau mi gaw, kaga ni hpa n’kajang da ra ai sha, dinghku shang ai gaw, mungkan masa langai mi re majaw, hkungran ta matut la yang rai sai, mai kaja ai dinghku la a’jet byin tai wa na sha re , nga nna, myit la , tsun shapraw chye nga ma ai. Dinghku la ngu ai, mying hpe a’rawng shatai nna, dinghku kata hta gaw gaman, shinggan de hkrai pyau hkawm ai ni mung law law rai nga ai. Daizawn n’tsa lam, prat madang hta hkan nna, de ai dinghku gaw jahkring mi sha rai na re.  kaja wa ta tut galaw sa wa ai shaloi gaw, loi ai a’mu bungli n’rai nga ai. Dai majaw, mai kaja ai dinghku la langai mi byin tai wa lu na lam ni hpe myit yu ga.

No. 1 Tsaw dik ai tsawra myit nga sa ra ai lam…. Eph 5:25 hta Madu Yesu gaw nawku hpung hpe tsawra ai zawn, dinghku la ni , tinang a madu jan hpe tsawra nga mu, nga nna matsun da nga ai. Nu wa ni, Madu Yesu gaw kaja wa nan shi a nawku hpung hpe tut nawng e bau sin makawp maga , tsawra nga ai. Gunglau chye ai hpyen ni a lata de nawku hpung hpe n’ap kau ya ai zawn, Kahtawlik nawku hpung na dinghku la ni gaw, tinang a ningrum ningtau jan hpe sha prat tup jaw lup tsawra myit yawng hte hte  tsawra na matu rai nga ai. Galaw sa wa ai lam shagu hta, tinang a ningrum ningtau jan hte jahkrum bawng ban let hkawm sa na grai nan a’hkyak nga ai re. Dinghku kawa hpe kanu myit kam ai zawn, dinghku kanu hpe kawa myit kap jang she tsawra myit hte lam shagu hta awng dang lu na rai nga ai.

          Dai dinghku hta n’kaja ai lam galoi mung shang lu na n’rai nga ai. Dinghku hpe woi awn ai gaw, law malawng dinghku kawa ni nan re majaw, kawa ni ga sadi dung na grai nan a’hkyak kaba rai nga ai. Kun dinghku hta, dinghku kawa a matu ningrum ningtau jan gaw, tsawm htum shayi re ai zawn, dinghku kanu a matu mung ningtau wa gaw, tsawm htum shadang rai ra ai. Reng jang she hpring tsup ai dinghku byin lu na rai nga ai. Dai zawn woi zim lum chye ai kawa gaw kaja wa nan, kang ka ai, mai kaja dik dinghku la, kawa langai nan rai nga ai.

          No2. hta, Tsawra ai lam hpe ta tut madun dan ra ai lam….tinang a n’rum n’tau jan hpe n’gup n’ga hte sha n’re, ta tut hta mung tsawra myit salum hpe ap jaw ra ai. Hkristan dinghku ngu ai gaw, Madu karai kasang nan jaw ya ai chyeju kum hpa re majaw, dai dinghku a ntsa hta shaman chyeju lak san nga nga ai re. Shan gaw langai sha rai nga ai. Dai majaw, kalang lang ningrum ningtau jan ni shalu ai ten, myit n’pyaw, myit pawt ai ten ni byin pru wa jang dinghku kawa ni gaw,chye na hkap la let hkam sharang myit ni hte gaw gap la ra nga ai. Reng jang she ningrum ningtau jan mung, aw….ngai hpe kaja wa sha grai tsawra ai she rai nga ai, nga nna, ningrum ningtau wa a n’tsa kam hpa myit, madat mara ai lam ni nga wa na rai nga ai. Tsawra myit gaw grai nan manu daw dan n’lu ai, a’kyu hkam sha lu ai rai nga ai. Daizawn tsawra myit majing hte gaw gap ai dinghku kata hta dingbai dingna a’myu  myu gara hku ma n’mai shang ai.

          No3. Kangka lam n’nga ai dinghku kawa ni ….ngu dat ai hte, shawng nnan byin chye ai gaw, sadi n’dung ai lam rai nga ai. Dinghku kawa lit magam hpe gun nga ning len, kaga num ni kaw myit kap mat ai, dinghku la ni mung nga chye nga ai. Jahkring jahkra na nga pyaw lam a matu sha machyu jung nna, tinang a ningrum ningtau jan a tsawra, myit mada ai lam ni kaw nna, tsang gang mat wa lu chye nga ai re. Dum n’ta na ningrum ningtau jan hpe gaw bungli ra ai law, zuphpawng law, sut masa hte seng nna, re law, shawa bungli de law nga nna, a’myu myu nga masu tsun kau da, shingdu shinggan de gaw pyaw daw gadaw hkawm rai nga chye nga ai.

          Ndai zawn n’kang ka ai dinghku la gaw, malu masha kaja hpe n’kam sha ai, gung lawm ai malu masha hpe lata sha ai wa hte bung nga ai. Hpang jahtum ana ahkya hte jam jau wa ai shaloi gaw, dum n’ta na ningrum ningtau jan kaw she wa machyu ai lam ni byin wa ai. Daizawn n’jin n’ngut wa ai ten hta she myit malai jang gaw, nang dinghku la, kawa langai a prat gaw hpang hkrat sai rai nga ai. Prov 12:28 kang ka ai lam de hkawm sa ai ni asak hpe lu la na ra ai. lam numshe de yawng ai ni, si ai hpe hkrum sha na ra ai nga nna, shadum da nga ai.

          Dai majaw, Hkristan dinghku hpe gaw gap nga ai Nu ni Wa ni e… dinghku kata hta kang ka ai hte gun hpai gaw gap lu na matu, grai nan a’hkyak sai rai nga ai. Dinghku kata hta shim lum ai tsawra myit ni hpe lu jaw ai, kang ka ga sadi dung ai dinghku kawa, kam grin ai, marai rawng ai dinghku la majing tai lu hkra shakut ga ngu machye machyang rai u ga, n’gun jaw let, ngam nga ai daw hpe du na lamang hta bai hkap madat la nga ga.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.