Ma kaji ni hpe gara hku shalat shapan la na lam, Daw (3) - Nov 4, 2018

           Ngwi pyaw ai dinghku lamang hpe hka madat la nga ai hkungga tsawra ai shiga madat nu wa hpu nau ni, daini na lamang hta, “ Naw kaji nga ai Ma ni hpe gara hku shalat shapan la na ” ngu ai gin lam hte seng nna sha, machye machyang rai u ga, matut gam garan ya matu lajang da n’ngai.

          Nu Wa ni, tinang a kashu kasha ni hpe yu lakawn, up hkang ai shaloi ra a’hkyak dik a’tsam ningja langai gaw, Ma ni marai langai ngai gawng kya shut shai wa jang, chyena hkap la ya ai lam rai nga ai. Lama na dam jaw na daram shut ai ngu tim pi, lawan ladan mara shagun ai, dam jaw ai zawn re n’mai galaw ai. A’tsawm sha myit yu n’htawm me, sharin shaga la ra ai. tinang hpe shut, hkra machyi wa ai rai jang mung, hkyam sa jaw ya nna, lawan dik ai hku dai wa a mara malap kau hkra a’tsam dat la ra ai. N’dai myit a’tsam ningja ni gaw, nang kanu, nang kawa hta n’nga n’mai rai nga ai.

          Dinghku a kanu kawa, ningbaw ningla lit magam hpe gun nga ai ni yawng, tinang hpe hkra machyi shut shai ai, shing n’rai, tinang myi sai n’htuk nna, yu n’lu ai zawn re ai, lawu na masha ni hpe matai dawp ai hku nna dam jaw ai, shagyeng ai zawn re ai lam ni n’mai galaw ai. Ang nna dam jaw ra jang pi gaw, matai htang ai lam de n’yawng n’byin hkra sadi ra nga ai re. Shut ai wa hpe shim ai hku shaga la nna, shadum jahprang la ai ladat lang ra ai. Shi a gawng kya lam hpe kaga manang ni a man e, tsun jahpoi a’hpyak shatan dan ai lam, gaya jahkrum ai lam n’mai galaw ai. Dinghku a kanu kawa ni hkum nan, dai zawn ma ni hpe a’tsawm sha n’sharin shaga jang gaw, Ma ni a myit hpe shazai kau ya ai hte bung mat na gaw teng sha rai nga ai.

          Tinang a kashu kasha marai hkum shagu a a’tsam ningja, marai n’sam hpe a’tsawm maram, matsing da ai lam galaw u. Dai hpang marai gu hpra hta hkan nna, lam matsun n’gun jaw, sharawt ya u. Bai nna, nang hkum nan, kasi kaja madun nga sa u. Dai shaloi, na n’tsa shanhte kam hpa, myit krem wa nna, tsawra hkung ga, madat mara wa na gaw teng sha rai na re. Tinang a kashu kasha ni ramma prat de du sai rai jang mung, prat madang hta hkan nna, galai shai nga ai ramma ni a lai htung ni hpe chye da, hkan sa, tsun shaga chye na ya na matu mung grai a’hkyak nga ai. Moi na lam hpe sha tik tik hkan nna, shadut shagwi mung n’mai sai re. Nu wa ni, Ramma ten ngu ai gaw, tsawra shawang myit da ai hte, matsan dum lama ai hpe grai hkam la mayu, ra sharawng ai ten rai nga ai. Dai majaw ramma kashu kasha ni hpe sharin shaga ai shaloi, shawang tsawra myit hpe chye madun hkra shakut ra ai. Rap shara ai tsawra myit hpe chye jaw na matu grai a’hkrak nga ai Nu Wa ni.

          Bai, tinang a kashu kasha ni hta na n’myit mada ai marai langai ngai, kaga ni hta a’lak mi rai sharin shaga yak, baw ja ai hpe mu jang mung, myit n’mai htum ai. Nu Wa ni, namhpun taw ai shara hta hkai n’mai hkai jang namhpun tam bang ra ai hte hka jaw, tsing magang rai, pu ba hkam hkai shatut, shakut la ra ai zawn, Dai zawn re ai wa hpe mung myit galu kaba hte ladat a’myu myu shaw, shalat shapan la ra na re.  Dai zawn myit  galu kaba da ai, shawang tsawra myit madun ai, tara rap ra ai, dingman san seng, kasi kaja madun ai lam ni yawng gaw namhpun hte bung nga ai re. Dai majaw, Ma ni hpe sharin ai shaloi ladat a’myu  myu  hte chye sharin na grai nan a’hkyak nga sai re.

          Nu wa ni, tinang a kashu kasha ni htan, nang kanu nang kawa gaw grau zen ra ai re. Hpa majaw nga jang n’dai prat na anhte a kashu kasha ni gaw, sam maram chye loi ai hta moi na ni hta grau kung kyang ai nga nna mung tsun nga ma ai. Shing rai, Ramma ni hpe yu ra ai, kanu kawa myit su ni gaw, kasi kaja madun na grai nan a’hkyak nga sai re. Dai zawn kasi kaja n’lu madun jang gaw, na a myit tsaw, myit dap, gunrawng ai, a’rawng mala ai, myiman lata, lajen laren re lam ni maram la kau yang, na a n’tsa hta kam hpa ai myit ni yawm mat wa nna, nang sharin shaga ai lam ni tang n’du a’kyu n’pru byin mat chye nga ai re. Dai zawn byin jang kun dinghku kata mi rai rai, hpawng ginra magam dap hta rai rai, myit hkrum myit ra, ginlung lam hpe hkra machyi shangun lu ai rai nga ai.

          Dai zawn byin jang gaw, dinhku kata hta myit n’pyaw hpa ni byin hpang wa na gaw teng sha rai nga ai. Kashu kasha ni myit n’su jang kanu kawa ni myit n’pyaw ai zawn, kanu kawa ni kashu kasha ni a n’tsa hta n’chye na ya jang mung ma ni dum n’ta hta myit n’kap rai, mare de len hkawm mat chye ai rai nga ai. Dai majaw, dinghku kata hta, kanu kawa, kashu kasha ni yawng nga pyaw na matu, langai hte langai mara raw, tsawra myit madun let chye na hkrat na gaw madung rai nga ai. Reng jang she Ma ni mung shut shai ai lam hpe myit dum hprang wa nna, mara yin la tawng ban chye na rai nga ai. Dai zawn mara yin la tawng ban wa ai shaloi kanu kawa ni gaw mara raw ya na matu jin jin rai ra ai. Dai gaw grai htuk manu ai, ma shapan shalat ai ladat langai mi rai nga ai.  

           Nu ni Wa ni e….Ma hpe sharin shalat ai shaloi, madung gaw shakawn shagrau chye na a’hkyak dik rai nga ai. N’kau kanu kawa ni gaw, ma ni hpe shakawn na gaw hkum tsun, a’hkre a’re, a’dup gayet ai dinghku kanu kawa ni hpe mu yu ai. Dai myit masin ni gaw dinghku kanu kawa ni a myit masin n’rai nga ai. Ma ni a shawng lam hpe pat hkum ai hte maren sha rai na re. Dai majaw, lahta de na la lu sai machye machyang ni hpe matsing let, kashu kasha ni a shawng lam hta madi shadaw ni tai ya ga ngu mayu n’ngai. Reng jang she, kun dinghku dum n’ta htingbu htingbyen a matu sha n’re, myu  hte mungdan a matu, nawku hpung a matu a’kyu rawng ai, myit hkrum myit ra bawng ring ai chyeju ni shu la lu na re ngu n’gun jaw dat n’ngai law.

Ka Lajang ai; Mama Rose Angeline Maran Nang Doi

                         RVC Ginjaw Rung, Aung Nan

                          Myitkyina