Sadi Dung ai hte sha Kaja ai ningrum ningtau rai sai kun?II

      Tsawra hkungga ai kun dinghku kanu kawa ni e dai ni na prat hta Sadi dung ai tinang a ningrum ningrau jan hte sha prat tup rau jawm pawng kanawn mazum nga ai hte sha gaw ningrum kaja ngu nmai tsun nga ai.Hpa majaw nga yang ningrum ningtau jan galaw ai hpe dung sha kap nga ai tinang a atsam nkam shaw la ni hpe mung anhte mu lu nga ga ai.Dai zawn sha ningrum ningtau jan mung ningrum ningtau wa hte sha prat tup rau pawng nga ai hte sha gaw ningrum ningtau jan kaja ngu nmai sawn la nga ai.Hpa majaw nga  yang shi hte pawng yang she shat sha lu bu hpun lu ai num ni mung nga nga ai re.Nta hta Dum nta masha ni gaw jam htu hte sha shat sha nga ten anhte gaw Beer seng kaw malu masha kaja hte tsa mai nga ai,nta jai lang ra ai lam ni hte Ma ni a jarik jawng shabrai a matu gumhpraw ra ai ngu yang ngai lu ai yawng nang hpe ap jaw sai le nga mung ningrum ningtau kaja ngu nmai sawn la nga ai.

          Dai zawn sha ningrum ningtau wa a salu salat hte tam jaw ai ja gumhpraw hpe dum nta masha ni a matu nmyit ai sha tsa mari lu majoi jai shama kau ai ningrum ningtau jan hpe mung kaja ai ningrum ningtau jan ngu nmai tsun nga ai.Kun dinghku dum nta masha ni a lam gaw prat a ahkyak dik ai lam re majaw myit pu ba ai lam ni mayak mahkak lam ni grai law nga chye nga ai.Ndai dam ni hpe hkam sharang lai di nga ai ten ting gyeng myit hte nga sa ai,tinang langai hkam sha lam hpe sha ningshawng jaw ai masha ni gaw galoi mung ningrum ningtau kaja nmai byin nga ai.Num mi rai rai,La mi rai rai,ningrum ningtau kaja nga ai gaw sadi dung ai hte tinang a lit hpe kangka ai sha n ga,ningrum ningtau hte kashu kasha ni a matu tsawra matsan dum ai hte chye na ya ai, ngwi pyaw ai dinghku byin tai hkra galaw ai,ru yak jam jau ten mung rau sha hkam sha,hkum hkrang lam hte myit masin lam ni hta jahpring shazup ya lu ai hpe she ningrum ningtau kaja ngu mai tsun nga ai.Dai majaw kun dinghku lam hta shara shagu bu gum shagrit let myi di chyip rai hkam sharang jawm pawng nga ai hta shi maga tinang maga maren mara rau jawm bawngban shada sadi dung nga ai lam gaw grau kaja nga ai.

   Dai ni na prat madu  jan hpe mayam zawn tawn da mayu ai ningrum ningtau wa,Madu wa hpe Dumsu Nga zawn  shangun nna dang sha mayu ai ningrum ningtau jan ngu ai myit masa ni hpe kabai kau ra sai.Hpang na prat ban hpe mung ndai myit masa ni nmai htinglet ya ai.Shi mung tinang mung rap ra ai dinghku shada da hkungga tsawra manu shadan hkat ai dinghku byin tai lu hkra shakut ra nga ga ai.Kun dinghku hta lu na sha na a matu magam bungli galaw ai lam hta maren rap ra ai hku shakut shaja ra ai.Kun dinghku lit magam hta mung maren shakut ra ai.Ningrum ningtau hte kasha kasha ni a lam mahkra hta lit la yu gawn lajang ya hkat let anhte a dinghku hpe gaw de sa wa ga.

by : john mung hkrang