Tsawra hkungga ai kun dinghku kanu kawa ni e ahkyak ai lam gaw tinang a ningrum ningtau hpe kaja ai hku mu mada chye nna hpaji jaw chye na mung ahkyak nga mali ai re.Bai nna anhte masha hkum shagu ngu na daram gaw asawng la ai hpe ra ma ai re.Dai re majaw dinghku hta mung hpa masa lam hta raitim atsawm sha asawng tsun ra ai.Dai rai yang tinang a ningrum mung madat ya na sha rai nga ai.Bai nna tinang a dinghku kata na lam ni hte madu jan madu wa lapran na lam ni hpe online lam yan hta mara ai lam hpe mung mai byin ai daram koi gam ga.Ndai lam ni gaw manghkang hpe grau kaba wa shangun chye ai hpe myit dum ra ai.Bai nna tinang a ningrum myit nhtep ai myit tsang ai lam ni hpe mani hpa hku nna pyi ntsun hkrum na sadi ra ai.Hkam sha chye ai ni matu dai lam gaw grai kaba ai lam rai nga ai.Myit sawn shut shadu chye ai shinggyim lam ni gaw dinghku a matu myit tsang hpa byin chye nga ai re.Bai nna Tsawra ai kun dinghku kanu kawa ni e anhte madu jan madu wa langai hte langai hkungga manu shadan ai hku nna tsun shaga kanawn mazum na matu mung dinghku hta grai nan ahkyak la nga ai re.Ndai lam ni gaw bungli shara hta tinang hte bungli rau galaw ai manang ni hte kanawn mazum ai lam hta grau nga ai.Tinang a ningrum gaw tinang hta asak kaji ai raitim shi a ntsa hkungga manu shadan ai hte kanawn mazum na grai ahkyak nga ai.Tsawra ai Kun dinghku kanu kawa ni e lahta de tsun lai wa sai zawn dinghku hta madu jan madu wa myit rum hkum rum nrai tim shada nbung hpre ai lam ni hpe chye na ya na mung grai ahkyak nga ai.Tinang hte nbung ai myit masa gaw tinang a matu mungkan hpe yu nna chye na na matu hpaw da ai hku wat langai chinghka langai re ngu myit sawn la mai nga ai.Kun dinghku kata tinang a ningrum hte nbung ai lam ni hpe jahkrum la ai lam ni nga ai zawn myit bung hkum bung ai aten ni mung nga na sha rai nga ai.Lahkawng rau myit hkrum nna gaw de da ai kun dinghku galoi mung tut agring nga na matu gaw Madu jan madu wa lahkawng yan hte seng ai re.Ndai zawn sai nbung ai jasam lahkawng dinghku nta langai hta galoi mung rau rai agring nga na matu gaw mara dat ya ai,chye na ya ai,tsawra myit hte sadi dung ai lam gaw nnga nmai grai nan ahkyak la nga ai re.Langai a nbung ai masa lam hpe ningdang hkat nga na malai hkungga manu shadan hkat let bawngban la ai lam gaw grau nna kun dinghku hta ahkyak nga ai re.Nbung ai ningmu ni hpe tinang kaw nna myit hkrum lu hkra mung shajin da ra ai.Langai hte langai prat tup rau gindun nga lu na matu gaw mara dat ya hkat ai lam rai nga ai.Ndai zawn langai a mara hpe langai dat ya lu yang she ngwi pyaw ai dinghku byin tai lu na rai nga ai.Dai majaw tsawra hkungga ai kun dinghku kanu kawa ni e tinang a ningrum a masa lam hpe chye ya ai.Ningrum gaw gwi gwi hte atsam ningja nrawng ai hpe mung chye na hkap la ra ai zawn ningrum gaw woi awn chye ai wa rai yang mung tinang myit ra ai lam yawng hpe nlu galaw ya ai lam hpe mung chye na ya let anhte a kun dinghku hpe gawgap sa wa nga ga.

by; John Mung Hkrang