Gumhpraw Hta Kap Ai Coronavirus

Ya aten anhte hkrit tsang ai lam langai ni hta Coronavirus ana kanu gumhpraw kaw na kap wa na hpe myit tsang nga ga ai.Sadi sahka lam n nga yang kap mung kap wa lu chye nga ai re.Mi kaw na tinang zing da ai gumhpraw ni hpe tsang nra ai raitim kaga masha kaw na hkap la ai gumhpraw,gat mari ai hkan byan ya ai gumhpraw zawn re ai ni hta ana kanu kap lawm wa chye nga ai.

Rai yang gumhpraw kaw na ana kanu kap ai lam nbyin hkra gara hku sadi sahka la ra na ga ai kun nga yang ya byin taw nga ai coronavirus ana kanu gaw tsa machyan,sap pya ni hte rai yang aten kadun laman si mat lu nga ai.Bai nna kahtet shadang grai tsaw yang mung si mat lu nga ai.Dai majaw gumhpraw hta na ana kanu hpe sat kau mayu ai rai yang gumhpraw hpe sap pya bawp ntsin hta second (20 ) daram tsing tawn nna hka hte bai kashin lang yang ana kanu ni yawng si mat lu ai.Shing nrai spirit tsa machyan hte arut kashin kau mai ai,bu hpun palawng dem shapri lang ai wandem hte dem arut kau yang mung ana kanu ni si mat lu ai.Rai tim gumhpraw hkru mat,je mat na hpe gaw sadi la ga.

Tsawra ai shiga madat nu wa hpunau ni ndai Covid-19 ana zinli hpe grai wa hkrit kajawng ai hku nre sha tinang kaw na shawng makawp maga hpang ai lam hpe hkan sa let sadi sahka la nga ga.Anhte a Myanmar mungdan hta ana kanu kap ai masha nnan mu hpang wa ai aten hta hkrit maja let nga ai masha grai law ai hpe mu lu ai raitim byin ai aten na wa sai hte rau hkrit maja ai lam,sadi sahka nga sa ai lam ni yawm wa ai hpe mu mada lu nga ai.Sadi sahka lam hpe shayawm kau na aten garai ndu shi nga ai.Hpa majaw nga yang Myanmar mungdan na ya ana kanu kap hkrum ai machyi masha ni hta na law malawng gaw machyi ana kumla n madun ai sha ntsen ai masha hpe tsi jep yu ai kaw nna mu lu ai rai nga ai. Bai nna ya ana kanu kap hkrum taw sai masha nkau mi hta kadai wa kaw na,gara shara kaw na kap la ai mung nchye re ai ni grai law taw nga sai re.Dai gaw anhte yawng a matu grau nna sadi maja ra na lam rai nga ai.

Covid-19 ana kap hkrum sai hte si na re ngu hkrit tsang nra ai rai tim byin wa jang tinang langai hkrai byin nna ngut mat na nre hpe galoi mung myitdum let tinang a matu,dum nta masha ni a matu,makau grupyin hte mungdan a matu tinang kaw na shawng makawp maga hpang ai lam hpe mung chying mung shawa masha yawng hkan nang hkan sa nga ga. let ndai ana Covid-19 zinli tinang mungdan kaw na lawan hkoi tsai mat lu na matu yawng jawm ninghkap shamyit kau ga ngu kalang mi bai tsun shadum garan kachyan ya dat ga ai law.