San Pra Ai Wa Sarabyin John Paul II a Labau Lam (Daw 3). 11 Sep 2018.

          Tsawra hkungga ai Nuwa hpunau ni,  nau nna shi ai ten hta sha San Pra ai masha tang da hkrum sai, Wa sarabyin Yawhan Pawlu II a lam hpe yawng a matu wenyi makam masham n gun lu la mu ga, yaw shada let gam garan ya dat lu n ngai.

          Nu Wa hpu nau ni, Madu a shaning 2013 ning July shata praw 5 ya shani, Catholic nawku hpung gin jaw, Vatican kaw nna, Wa sarabyin Pawlu II hpe san pra ai masha shatai na matu, ndau shana lai wa sai lam lai sai lamang hta na la lu saga ai rai nga ai. Lak lai ai langai gaw, Dai zawn n dau shana ai shani hta sha, lai wa sai 1958 ning kawn nna, 1963 ning du hkra Sarabyin magam hpe gun hpai lai wa sai Pope John XXIII hpe mung san pra ai masha shatai na re lam hpe mung shana shabra dat sai rai nga ai. Ya sha tsun ai Wa sarabyin Pope John XXIII gaw, Nawku hpung a Vatican zuphpawng hpe hpaw hpang da ya ai wa mung rai nga ai. Sim sa lam a matu, lak lai ai hku shakut mat wa ai Sarabyin re lam labau hta mu mada lu nga ga ai re. 2013 ning September shata 30 ya shani, Yaten ta tut hta sarabyin magam hta shakut nga ai Wa sarabyin Francis hkum nan, n nga mat wa sai Wa sarabyin Yawhan Pawlu II hte Wa sarabyin John XXIII yen hpe 2014 ning April shata 27 ya shani san pra ai masha  shatai ya na re lam n’dau shabra dat sai rai nga ai.

          Nu wa ni, ya na zawn, san pra ai masha byin tai wa lu na matu, mau hpa lamik kumla kaba (2) nga ra ai lam hpe, Vatican kaw nna, tsun masat da ai lam nga nga mali ai. Ya sha tsun ai mau hpa lamik kumla kaba (2) hpe lu sawk sagawn ai rai jang gaw, San pra ai masha byin tai lu sai rai nga ai. Rai yang, shawng nnan ngu nan, Wa sarabyin John Paul II a lamik kum la, hpa wa rai ta nga jang,  Mama Marie Simon-Pierre Normand ngu ai mama gaw, Wa sarabyin John Paul II hkam sha lai wa sai ana rai nga ai, bawnu ashuk ashak, nru nra, ashun ashan, gari gawa byin  ai baw ana hpe, asak sum mat na daram re ai ten, Wa sarabyin hpe myit dum let, akroi anoi, akyu hpyi la ai ten, n myit mada ai sha, mau na zawn rai, kalang ta ngap sha mai mat ai. Dai gaw, shawng nnan lang ngu na lamik kumla kaba nan rai nga ai. Bai, lahkawng ngu na hta gaw,  asak (50) ning re ai Nu num langai mi mung, bawnu hte seng ai ana byin nga yang, Wa sarabyin John Paul II hpe myit dum let, shi a sumla hpe yu nna, kyu hpyi ya nga yang, dai wa sarabyin a sum la dai Nu num hpe ga shaga wa ai hte, hkam sha nga ai ana kalang ta mai tsai mat sai rai nga ai.

          Wa sarabyin John Paul II, san pra ai masha tai na matu, shi a jaw e, byin pru wa ai shawng na mau hpa lam gaw, san pra ai masha garai ntang shi ai shawng ( 3 ) ning ten hta, Floribeth  Mora Diaz ngu ai jan, Wa sarabyin kaw kamhpa kyu hpyi ai a marang e, shi hta hkam sha nga ai ana ahkya , mau na zawn mai tsai mat wa sai lam, yawng a man hta sak se hkam tsun dan sai rai nga ai. Ya na Zawn mau hpa ni byin pru wa ai gaw, Wa sarabyin John Paul II hpe san pra ai masha byin tai shangun na matu, lam hpaw ya ai, ninggam ni rai nga ai. Mabyin gaw, ndai hku rai nga ai. Floribeth Mora gaw, kashu kasha (4) hpe shangai shaprat ai jan rai nga ai. Lai wa sai 2011 ning kawn nna, Ma Mali a kanu Mora gaw, shani shana baw machyi ai hpe hkam sha nga ai re majaw, shi hpe gawn lajang ai sarawun, tsi du kaba ni hku nna, shi hpe asak galu na ntai ai lam hpe pyi tsun shapraw dan sai rai nga ai. Yan a zawn baw machyi ai lam hpe dai buga na tsi du ni n lu gawn lajang sai re majaw, Mora hpe Mexico hte Cuba ngu ai mare kaba de sa tsi yang sha mai tsai lu na lam tsun dat nu ai. Raitim, Mora gaw, ja gumhpraw yak hkak ai a majaw, ganing ndi dai hku sha nga ra mat nu ai. Sarawun, tsi du kaba ni gaw, nang hpe lam amyu myu hku nna tsi lajang ya lai wa sai, ya matut nna gara hku tsi lajang ya na lam n ngai mat sai, nang shata mi sha asak hkrung lu sana n dai, nga nna hpang jahtum ga tsun sai rai nga ai. Dai majaw, Mora gaw, myit daw let, yup ra ntsa kaw galeng rai, Polish amyu masha sarabyin a sumla kap ai, Magazine langai hpe myit shalan let, hti yu nga ai. Shi a nrum ntau wa Edwin gaw, ningrum ningtau jan hpe akyu hpyi nga na matu sha n gun jaw nga sai. Edwin a matu laba dik tsang ya ai lam gaw, ningrum ningtau jan asak nhkrung na hpe n rai nga ai. Hpa majaw, nga jang, shi a kasha ni, kanu n nga mat jang gara hku sak matut hkrung na hpe sha tsang ai nga nna tsun da nga ai. Tsun mayu ai gaw, shanhte a kun dinghku hta ningrum ningtau jan gade ram ra ahkyak ai hpe ngu mayu ai rai nga ai.

          Mora gaw, shi hti nga ai Magazine hta, Wa sarabyin John Paul II hpe alu ai masha shatai na lam mu hti hkrup nu ai. Dai majaw, wa sarabyin kaw kam hpa kyu hpyi nga sai. Mau hpa atsam gaw, Wa sarabyin John Paul II hpe alu ai masha shatai na shana Mora hpe shingran hta dan pru dan ai kaw nna, Shi hpyi shawn ai lam hpe wa karai kasang hkap la ya sai nga nna, hkam sha lu sai ngu kam sham nga sai. Mora hpang jahpawt yup raw tai hte, shi hti ai Magazine hpe bai mada yu ai shaloi, Wa sarabyin John Paul II gaw, lata lahkawng hpe sharawt da ai sumla hpe mu lu ai hte, shi hkam sha ai ana ma hkra mai tsai wa sai hpe sung sung hkam sha nga nu ai. Bai, shi na lu ai ga gaw, “Rawt tsap u” “hkum hkrit” ngu ai hpe na lu dat nu ai. Kaja wa nan mung, asan sha mai tsai mat sai rai nga ai.

          Nu wa ni, Labau sagawn hpung ni hku nna, kaja lamik kum la ni mung law law naw nga ai. Ratim, lak san tang madun ai lam gaw, n galaw lu shi ai lam tsun da nga ma ai. Wa sarabyin a sum la hpe yu nna kamhpa kyu hpyi ai hte pyi machyi makaw mai tsai lu ai lam gaw dan dawng nga mali ai re. Wa sarabyin kaw kam hpa kyu hpyi ai a marang e myit mada shara n nga ai ana ahkya ni mai tsai lu ai lam grau ngwi ngwi, masha yawng ngu na ram chye wa sai rai nga ai ngu gam garan ya let, ngam nga ai daw hpe du na lamang hta bai gam garan ya na n ngai law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.