Covid-19 Ana Kaw Nna Ma Kaji Ni Hpe Makawp Maga La Ga

Ya aten mungkan ting hpe hkrit kajawng shangun taw nga ai Covid-19 ana zinli gaw anhte a Myanmar mungdan hta mung byin hkrum chyambra taw sai rai nga ai.Dai zawn ana kap hkrum ai masha ni hta asak laning mi jan kaw nna 10 ning re ai ma ni mung lawm nga ai hpe mungdan hkamja dap ni htuk shapraw ai shiga ni kaw nna anhte mu lu,chye lu nga ga ai re.Dai majaw ndai ana zinli hpe ninghkap makawp maga la ai hpe masha shagu hkan nang hkan sa na grai ra hkyak nga ga ai.Naw kaji ai ma ni hpe gaw kanu kawa ni kawn shanhte chye da mai ai lam ni hpe atsawm sha tsun dan da na,hpa garai nchye ai ma ni hpe rai yang kanu kawa ni nan sadi sahka ya na grai ahkyak ai ten rai nga ai.

Ma ni ngu ai gaw nta kata kaw sha rawng nga ai htan shinggan de pru hkawm chyai ai hpe grau nna ra sharawng chye ai gaw kanu kawa tai sai ni grau chye na ga ai.Ga shadawn kanu kawa ni hte shinggan de muk mari sha hkawm ai,ginsup pa de sa ai,poi shingra hkan lama ma yu chyai hkawm ai hpe grai ra sharawng chye ai ni rai nga ma ai.Rai tim ndai aten hta gaw shinggan nmai hkawm chyai ai,muk sa mari sha ai,shinggan na manaw manang ni hte ginsup hkawm ai lam nmai galaw ai,ginsup pa de sa ai zawn re ai lam ni nmai galaw na hpe tsun dan yang chye na lu sai,loi kaba sai ma ni hpe atsawm chye na hkra tsun dan ra ai.Ga shadawn ya ten shinggan de hkawm yang virus ngu ai ana a majaw machyi wa chye ai,kanu yan kawa mung machyi wa chye ai,jahkru wa ai baw re ngu nna shanhte chye lu na masa hta hkan nna hpa majaw shinggan de nmai pru hkawm ai lam hpe tsun dan da ra ai.

Bai langai mi gaw lata kashin ra ai hpe shanhte galaw nan galaw hkra tsun dan ra ai,galaw mung galaw dan ra ai.Lata kashin ai shaloi mung ya byin taw ai Covid-19 ana hpe ninghkap makawp maga lu na jaw ai lata shin ladat hpe galaw dan ra ai.Asak 2 ning jan,masum ning rai sai ma kaji ni gaw shanhte hkrai shanhte chye galaw ai lam ni nga wa sai re.Shanhte hpe lata kashin ai shaloi sap pya hte kashin ra ai,sap pya bawp law law hte kashin ra ai hpe tsun dan ra na,galaw dan ra na ga ai.Second 20 na hkra kashin ra ai ngu ai hpe ma ni chye na nre,dai majaw ma ni hpe lata kashin sharin ai shaloi birthday mahkawn hkawn let kashin shagun u,birthday mahkawn hpe htum hkra hkawn yang second 20 na hkra lata kashin ai ngu mai sawn la ai.

Lata hpe galoi aten hta kashin ra na ngu ai hpe mung tsun dan ra ai,shat garai nsha yang hte shat sha ma ai hpang lata kashin ai hpe gaw masha yawng galaw nga ga ai re.Rai tim ndai aten hta gaw shawoi na hku majoi mi hka madit kashin ai hpe nmai galaw na sadi ya ra ai,kanu kawa ni nan yu ya nna ma ni akyang byin mat hkra sharin ya ra ai.

Namdum kaw na pru wa ai ten,dum nta sun wang hkan sha ginsup ai rai tim jahkring hkring sha lata kashin shangun u,yup na rai jang lagaw lata atsawm shawng kashin kau nna she yup ra na hpe ma ni chye madat hkra atsawm sha tsun dan ra ai.

Bai nna tsawra ai shiga madat ni ya aten hta ahkyak ai bai langai mi gaw lata hte myi man de masawp jum hkra ai lam n galaw na hpe ja ja tsun da ra ai.Ma ni sha nrai,masha kaba ni mung lata hte myi man masawp ai hpe grai sadi ra ai aten rai nga ai.Hpa majaw nga yang ndai Covid-19 ngu ai ana gaw ana kanu kap ai masha langai langai jahkru kahti dat ai shaloi shi kaw na pru wa ai virus ana kanu ni gaw dai makau grup yin na arung arai shagu hta kap taw chye nga ai.Dai rung rai ni hpe shawng jum magra hkra na gaw lata rai nga ai.Ana kanu kap taw ai arung arai ni hpe jum magra lang ai lata hte myi man bai masawp dat ai shaloi n-gup,ladi hte myi ni kaw nna hkum hkrang kata de kap shang wa na rai nga ai.Ya aten ana kap chyambra law wa ai mung dai zawn re ai lam ni a majaw rai nga ai.Dai majaw ma ni hpe myi man nmai masawp na lam shanhte chye na hkra tsun tawn da ra ai.Jahkring hkring sha tsun shadum ya nga u.

Bai nna ma ni jahkru kahti re ai shaloi mung tissue mai sau magap nna jahkru ra na,kahti ra na hpe tsun dan da u,sharin ya u,lama tissue mai sau n nga ai rai yang machyang dum hte magap nna jahkru kahti ra na lam,lang ngut sai tissue mai sau pa hpe maza kabai ai pung de kalang ta kabai bang kau ra na lam ma ni chye na hkra atsawm sha sharin da ya ra ai.Ndai lam ni mung covid-19 ana hpe shayawm kau lu shangun ai lam ni rai nga ai.

Bai ahkyak ai langai mi gaw ya aten hta shinggan de na manam shing nrai jinghku langai ngai sa nna ma hpe pawn ai,ahpum manam ai lam ni hpe tsep kawp nmai galaw shangun ai.Dai hpe kanu kawa nkau mi ndum nshai rai taw nga ma ai.Loi kaba sai ma ni hpe rai yang kaga masha ni pawn ai,ahpum ai shaloi hkum pawn yaw,hkum ahpum hkraw yaw ngu nna tsun da ra ai,shanhte hpe tsawra nna pawn ahpum mayu ai masha ni hpe ndai ten nmai pawn ahpum na lam tsun dan chye hkra sharin da ya mai nga ai.

Kanu kawa ni chye da ra ai lam ni hta covid-19 ana hte seng nna byin wa chye ai machyi ana kumla ni hpe chye tawn da ra ai.Ga shadawn hkum kahtet machyi wa na,jahkru,kahti rai byin na,ma nkau mi gaw lusha nkam ai,puba ai lam ni byin chye ai,dai zawn rai shagu covid-19 ana a majaw gaw nrai na re,duhkra ladaw katsi kahtet a majaw mung byin chye nga ai.Rai tim ma ni hta dai zawn re ai machyi ana kumla ni byin wa jang ni htep ai tsi rung,tsi gawk de sa madun ra na ga ai.

Kanu kawa ni sadi ra na bai langai mi gaw ndai aten hta ma ni hpe nra ai sha shinggan de nmai woi hkawm ai,ma ni hpe nta kaw tawn da yang nmai kam ai nga nna gat mari ai de woi sa ai,shara ra de woi sa ai lam hpe tsep kawp nmai galaw na ga ai re.Nta kaw kam mai ai masha langai ngai hpe yu da shangun ai gaw kaja dik rai nga ai.Grau nna masha law ai shara,machyi masha nga ai shara hte tsi rung tsi gawk ni de nmai woi sa ai.

Hpa majaw nga yang ndai aten gaw gara shara kaw mi rai rai,masha kadai hta mi rai rai coronavirus ana kanu kap taw chye nga ai re.Dai hpe myit hta galoi mung dum shai nna sadi sahka la nga ga.Ahkyak ai bai langai mi gaw ma ni hpe yup hkru hkru yup shangun ra ai.Yup ten lai ai du hkra TV yu shangun ai,game ginsup taw shangun ai lam ni hpe mung kanu kawa ni atsawm sha yu ya ra ai.Ma ni hpe hkying 9 hta n hpang hkrat ai sha yup shangun ra ai nga nna Sarawun hpaji jaw matsun da ya nga ai re.

Ma kaji lu ai kanu kawa ni hte tsawra ai shiga madat nu wa hpunau ni yawng ndai aten hta anhte yawng hkrit kajawng maja let nga ra ga ai Covid-19 ana zinli hpe machye machyang hte rau ning hkap makawp maga la nga ga.Shinggan de bungli nsa galaw mai mat ai majaw lusha yak hkak ai hte kaga yak hkak lam ni law law hkrum sha nga na ga ai re.Ndai ana zinli kaw na lawan lawt lu na matu gaw masha shagu mungdan hkamja dap ni a matsun,mungkan hkamja dap ni a matsun hte maren hkan nang hkan sa let tinang hkum tinang shawng makawp maga la ai ladat hte nga sa ai rai yang sha lawt lu mai nga ga ai.Dai majaw tinang hkum nan mung hkam kaja hkra nga ga,yup ten hta atsawm yup,tinang hta nga ai malu masha hpe mai byin ai daram rap shara nna sha,hkum hkrang shamu shamawt lam ni galaw ya,myitru shoi hpa lam ni hpe hkrai n myit ai sha,myit pyaw pyaw tawn da rai let tau hkrau makawp maga la nga ga ngu tsun shadum garan kachyan ya dat ga ai.