Kashu Kasha Prat Hpe Hkra Shangun Ai Lawhpa Myit

Mungkan hta manu dan ai nhprang sut rai ni hpe tinggyeng akyu lu su nga mai lam sha tam bram nga ai dut lu dut sha nga ai ni,arung arai shapraw ai hpaga sut du ni a shadawn sharam kata jai lahpawt kau ma ai nam hpun,nam maling hpun kawa hte du sat du myeng hpan ni n nga wa ai lam gaw htawm hpang na kashu kasha ni a matu sha hpa nam law,nam lap ni,tsi mawan hpun ni hte kaga ra kadawn ai nam hpun arai ni hpe jasum kau ya taw ai lam rai nga ai.Hpun hpan amyu myu gaw htawm hpang e shinggyim masha ni a ra ai lam hte grup-yin manghkang ni hpe reng hkang makawp maga ya na ahkyak ai rudi ruhpang jaw ya lu nga ai re.

Hpun amyu myu hkrung mahkrung dusat amyu myu gaw,dai shanhte a hpan hta akyu pru manu dan lam hpra hpra nga ai.Dai hpe n mu,tinang akyu a matu chyu sha myit nna amyat tam mayu ai myit masa hpe shayawm kau na ra nan ra nga ga ai.Shaning shagu ngu na daram hkying lam re ai hpun amyu hpan hte dusat baw sang ni htum wa nna,mungkan ntsa e hten bya si hkrum ai majaw,amyu mat mat nga ai.

Dai ni hpe anhte n chye ai hta n-ga,anhte a kashu kasha ni mung mu yu lu sana nrai nga ai. Karai Kasang hpan tawn da ya ai dusat dumyeng amyu hpan law law hta na Anhte shinggyim masha ni a majaw dutsat amyu hkying lam hte Karai Kasang hpe shakawn shagrau lam nlu galaw mat ai gaw  mai kaja ai ahkaw ahkang hpe anhte nlu la mat,tat sum kau ai lam langai mung rai nga ai.

Ya na zawn du sat amyu hpan hte hpun kawa,nampu nam pan,tsi mawan ni nhkum mat ai gaw anhte shinggyim masha ni shang lawm galaw ai lam ni a majaw sha madung rai nga ai.Ga shadawn tsing sat tsi,latung sat tsi ni hpe jai lang ai.Tsing sat tsi jai lang ai gaw yi sun hkauna galaw sha ai masha ni a matu tsing magang nra sai majaw bungli grau tsang ai,aten nhtum sai,grau masan sa ai zawn rai tim htawm hpang a matu hkrat sum lam tai wa ai,hkai hpun nmai hpun ni yawng nmai hkai sha mat ai, latung sat tsi jai lang ai mung hkai sun a matu kaja tim ntsa malen u ni hte latung shingtai arai hkrung kanu amyu sumhpa hpe shayawm htum shangun nga ai re.Dai hte maren matut mahkai lam a matu ningmaw lam kaba ni galaw hpaw ai,hkai sun yi ni a matu shara law law hpe wang kum da ai,hka nu ni hta hka lawng kaba gawgap ai hte dai zawn re ai bawng ring gawgap masing law law galaw ai majaw,hta n’ga,dusat ni shingbyi nga shara nam maling bum ni hpe garan masing jahkrat galaw ai majaw dusat ni nga shara n nga wa ai,wuhpung garan mat ma ai,kaga shara de htawt sit n mai ai,shanhte wanglu wanglang hkawm sa sak hkrung n lu ai lam ni byin wa ai lam ni a majaw re ngu mu mada lu ai.Ndai lam ni yawng gaw shingra masa hpe tawt lai nna anhte shinggyim masha ni a shang lawm galaw ai lam ni hkrai rai nga ai,dai re majaw anhte nang ngai yawng a tinggyeng akyu hpe madung myit nna lu su nga mai lam tam ai myit jasat,marin lawhpa myit hte majoi lahpawt jai lang ai lai akyang ni hpe shading sharai,shadawn sharam let anhte a makau grup-yin,anhte a mare buga,anhte a mungdan,anhte a mungkan ga  hpe hkam kaja shatsawm shahtap ai magam hta shang lawm nga ga law.