Pu Kaba Cancer Ana Nbyin Hkra Makawp Maga La Ga

Daini na aten pu kaba cancer ana byin ai masha ni mung grai law wa nga ai majaw  mungkan hta No (3) byin law dik ana rai nna kalang lang machyi ana kumla shingnip shingnang n madun ai sha byin ai majaw nsen n shapraw ai masha sat wa ngu nna pyi tsun tawn da nga ma ai re.Ndai pu kaba cancer ana gaw hpa a majaw madung byin wa ai lam hpe hkrak nchye ai raitim asak aprat hte amyu rusai hta hkan nna byin chye ai,aten galu pu dung,pu kaba bum machyi ai masha ni hta grau byin chye ai hte ndai cancer ana byin wa ai lam a ahkyak madung langai mi gaw malu masha a majaw re lam tsun da nga ai.Dai majaw malu masha hpe sadi sahka sha chye na ra nga ga ai.

Namsi nam saw law law sha na,hkyeng ai hka rang shan ni hpe hkut n hkut rai shadu sha ai hte ready made malu masha ni hpe shayawm sha ai gaw pu kaba cancer ana nbyin hkra garum ya lu ai.Bai nna hkum hkrang shamu shamawt lam dingrun galaw ya ai hte tsa shayawm lu na,malut hka yawm dawm kau na,hkum nam nak hpe ra ang ai shadang hta nga hkra hting hkang da ai lam ni mung pu kaba cancer ana sha nrai,cancer hpan law law kaw na tsan gang shangun lu nga ai.

Rai yang pu kaba cancer ana nbyin na matu sha ya na kaja ai malu masha ni hte sha na n hkrak ai malu masha ni hpe hka ja la yu ga.

Sha ya na kaja ai lu sha ni gaw (1) nga chyu hte nga chyun hpan hta na lu ai malu masha ni law law sha u – hpa majaw nga yang calcium dat ra kadawn ningra taw ai rai yang pu kaba cancer ana byin na masa grai nga ai lam tsun da nga ai.Dai majaw calcium dat law law rawng ai nga chyu,nga chyu hte galaw da ai ding chyin ngu ai chyu chyahkri,ding khre chyu chyage,taw bat ni law law sha ya na kaja ai.

2) Shapre hpan amyu myu – shapre gaw hkamja lam a matu kaja ai lu sha langai mung rai nna pu kaba cancer ana byin wa shangun ai kaw na shayawm kau ya lu ai hta mung lawm nga ai.Shapre hta lawm ai mawm dat,vitamin B dat,shan dat ni gaw hkamja lam a matu grai kaja ai dat ni rai nga ai.Dai sha n-ga flavonoids hte kaga antioxidants ni rawng ai majaw cancer cell ni n kaba jat,n chyambra jat wa hkra makawp maga ya lu nga ai.

3) Nsam htoi madi lali  ai namsi namsaw,nam law nam lap law law sha ra ai – dai zawn nsam htoi,madi lali ai namsi namsaw hte namlaw namlap ni hta cancer cell ni kaba jat ai hpe ning hkap shing dang kau ya lu ai phytochemicals ni grai law rawng ai.Htoi ai,tsit,hkyeng ai,maw ai nsam hpan hkum namlaw,nam lap namsi nam saw ni hpe sha ai gaw cancer ana a matu sha nrai,kaga machyi galu byin ai chyi jung ana ahkya ni kaw na mung makawp maga ya lu nga ai.

4) Nga law law sha u – grau nna sau law rawng ai nga hpe sha ya na kaja ai.Salmon nga zawn re ai sau law rawng ai nga ni hta na omega -3 gaw cancer cell ni chyambra kaba jat ai lam nbyin hkra shing dang kau ya lu ai.

5) Shan shayawm sha u – shan dat mung ahkyak ai dat langai rai nga ai.Rai tim myi hprap wan n-gun law law  hte shadu da ai nsam hkyeng ai shan ni gaw pu kaba cancer byin shangun ai hte matut manoi re ai lam sawk maram dap ni tsun da nga ai.Dai sha n-ga dai shan ni hta hkamja lam hte n htuk ai sau ni mung rawng ai majaw shayawm sha ai gaw grau kaja ai.

6) Nhtoi na na tawn da mai hkra galaw shagreng da ai shan ni hpe shayawm sha ra ai.Dai gaw jum grai law bang nna manat da ai shan hte kaga datu dat tsi ni bang nna galaw shagreng da ai shan ni hpe tsun mayu ai rai nga ai.Ga shadawn hot dot,hamburger,wa pu jahkraw,wa magyi shan jahkraw ni grai law sha ai rai yang pu kaba cancer ana byin lu na masa grau nga chye ai.

7) Tsa dawm kau lu hkra shakut u – lani mi tsa gawm 2/3 dingrun lu taw ai rai yang pyi pu kaba cancer ana byin na maga de tsa shadang 20% daram tsang ra taw sai lam tsun da nga ai.Dai hta grau law lu ai masha ni gaw cancer byin lu masa tsa shadang 40% daram grau tsang shara nga ai lam tsun shadum da ya nga ai majaw pu kaba cancer ana hte kaga cancer ana amyu myu kaw na lawt lu na matu lahta e tsun mat wa sai malu masha ni hta na sha ya na kaja ai lusha ni hpe machye machyang hte rau lu sha nna,koi gam ya ra ai lu sha ni hpe mung koi gam shayawm rai let hkam kaja ai akyu hpe hkam la nga ga law.