Ana Ahkya Byin Shangun Ai Hka

Nsan seng ai hka a majaw ana ahkya amyu myu byin hkrum ai hta kadai ni lawm nga ai kun?Grau nna matsan ai masha ni hkrum katut hkam sha ra nga ga ai gaw ahkyak ai mang hkang langai rai nga ai.Matsan ai ni gaw shani shagu n san ai hka lu nna si mat ai lam ni,hka hta na byin ai ana ahkya ni,dai hta kaga hka hta tun yawng nang ai dat tsi amyu myu hte seng ai ana ahkya ni hpe hkam sha ra nga ai.Kan machyi,kan htawkdang ana ni byin ai gaw ra kadawn ai hka madang hte maren nlu ai,n san ai hka hpe lu hkrum ai a majaw masha law law jamjau hkrum ra ai hte ma kaji ni si sum ra ai law nga ai.

Shara law law hta grau nna tara upadi hte hkrak uphkang ai lam n nga ai shara ni hta nhprang ja lung seng,dat nlung amyu myu htu ai,hkai sun ni hta tsi amyu myu lang ai,jak rung rai shapraw ai lam ni a majaw ga kata na hka ni nsan maza wa ai,hka htung hka n san seng ai ni, byin wa na hkrit tsang ra nga ai.Jak rung na kabai ai rai ni a majaw mung lawm nga ai.Mungkan shara law law ni hta lang ai tsi ni chemical ngu ai dat tsi hte galaw ai ntsin,rai ni gaw anhte a hka shi hka nu,panglai ,hka nawng ni hta matut lwi yawng nga ai majaw mung rai nga ai.

San seng ai hka  kaja lu mai ai lam yawm mat ai ten,shara nkau mi hkan hka taw ai aten ni hta hka lu mai ai hka shi hka hpawk shara ni hpe tingyeng hpaga lam galaw nna dut lu dut sha ai hpe mung mu mada lu ai.Shinggyim masha ni a asak hkrung nga sa lu na madung ra dik ai hka san lu la na lam gaw masha shagu lu ging ai mungkan shinggyim ahkaw ahkang rai nga ai hte dai gaw shingra tara ahkaw ahkang rai nna,kaga shinggyim ahkaw ahkang lu la lam a ningpawt masa lam rai nga ai.

Mungkan ga gaw lu hka nlu nga ai matsan ai ni a ntsa kaba la ai shinggyim wunhpung hte seng ai hka kap nga ai ngu tsun mai ai.Hpa majaw nga yang shanhte lu la ging ai shinggyim sari sadang hte ding yang sak hkrung lu ra ai ahkaw ahkang hpe ningdang hkrum ai majaw rai nga ai.

Ndai hka ni hpe daw chyen sha pyi nhtang jaw,bai wa lu na matu hka san lu la na hte matsan ai ni a hkam kaja lam a matu alu gumhpraw hte madi shadaw gumhpraw ni grau tam jat da ra ai.Rai tim  hka nhpaw n ya lu nga ai bawng ring ai mungdan ni sha n rai,rawt jat hpang nga ai mungdan ni mung lu hka hpe sharam sadi lang ai lam n nga ai,law law lahpawt kau ding yang re ai hpe mu mada ai.

Ndai mabyin masa ni hpe yu dat yang hka hpe ra ai hta jan lang lahpawt kau ai laikyang ni a hpang e byin na mang hkang ni hpe sung sung myit yu ai lam ningra nga ai.Dai re majaw ndai  hka manghkang gaw hka hpaji lam hte htung hking myit jasat lam ni hte daw chyen seng ai manghkang re ai hpe madun nga ai.

Ndai mabyin hte seng nna Hpaji ninghkring ni a sawk sagawn ai hte maren nga yang ndai manghkang hpe hparan na matu,grai ahkyak da galaw ai nrai yang,shi ban ning laman,hka taw ai manghkang kaba hkrum na re nga nna sadi jaw nga ai.Dai hte matut byin na mang hkang gaw grup-yin shingra tara ni hten run ai dam hpe masha wan hku hkrum sha na masa nga nga mali ai gaw anhte nang ngai yawng hte seng nga ai.