Saba Si A Hkamja Lam Akyu ( Health Care )

Saba si hpe  anhte galoi mung sha taw nga ga ai rai tim saba si hta rawng ai hkam ja lam akyu ni hpe gaw atsawm hkrak nchye ga ai re.Masha nkau mi saba si hta hpa dat atsam mung nrawng ai,sha mai ai baw shat mai re majaw sha, sha ai ngu pyi shadu nga ga ai re.Dai majaw anhte galoi mung sha taw ai saba si a hkam ja lam akyu hpe daini anhte hka ja la yu ga.

Saba si sha nna lu la mai ai akyu ni gaw (1) cholesterol hpe shayawm ya lu ai.(2) Salum ana lu ai masha ni sha ya na htap htuk nga ai.(3) Kan kata hta byin chye ai ana ni nbyin hkra makawp maga ya lu ai.(4)Maju lasa hte seng ai ana ni hpe kaja shangun ai.( 5 ) Cancer ana nbyin hkra makawp maga ya lu ai.(6) Nyan marai kaja shangun ai.(7) Sai hpe san seng shangun lu ai akyu ni jaw ya lu nga ai.

Saba si hta rawng ai dat atsam ni hpe bai tsun ga nga yang (1) saba si hta n nga nmai ra kadawn ai vitamin B uhpung rai nga ai pantothenic acid,vitamin B5,Vitamin B6,vitamin B1Thiamine,vitamin B3 Niacin ni rawng nga ai.Ndai n nga n mai re ai vitamin dat ni yawng gaw hkum hkrang a matu ahkyak ai sau dat,protein dat hte carbonhydrate mabyin masa ni hta ra kadawn nga ai.

2)Saba si hta magnesium,manganese,phosphorus,niacin,potassium,folic acid hte hpri dat ni rawng nga ai. (3) Saba si hta mawm dat hte carbonhydrate ni rawng ai a majaw jitdwi saidwi ana hting hkang ai hta ahkyak ai hku garum ya lu nga ai.(4) Saba si hpe sai kata na n kaja ai cholesterol ni shayawm lu ai malu masha hku nna jai lang lu sha mai nga ai.(5) Saba si gaw mahkak law pru ai hte sinda chyat ai hpe hkyamsa shangun lu ai.(6) Saba si gaw yup n pyaw ana hpe mung hkyamsa shangun lu ai.

7)Saba si gaw hka li ana a majaw byin ai kanpai kaba ai hpe mung hkyamsa shangun lu ai.(8) Saba si hta nasunin ngu ai lu sha n-gun dat rawng ai majaw hkum hkrang hpe hten za shangun ai n kaja ai free radical ni hpe shaprai kau ya lu ai majaw sau shajan ni hpe shaprai kau ya lu ai atsam nga ai.(9) Saba si hta atsam ja ai antioxidant rai nga ai chlorogenic acid rawng ai majaw free radical hpe shaprai shamat kau ya nna latung kanu sat lu ai atsam ni rawng ai.Dai majaw ndai saba si gaw shat mai a matu lu sha kaja langai rai nga ai zawn hkum hkrang hta n nga n mai ra kadawn ai dat atsam ni grai law rawng ai lu sha shat mai kaja mung rai nga ai .

Hkum hkrang hkamja lam a matu kaja ai lu sha re nga tim maga mi de mung ladu lai grai law sha jang gaw akyu yawm shangun ai lam ni bai byin wa chye ai hpe mung sadi ra na ga ai.Anhte sadi la ra na hta  saba si gaw katsi ai malu masha rai nga ai majaw kan shabung,nbung htu,kan makram chye ai hte acid law ai majaw shadawn sharam rai lu sha chye na ra nga ga ai.Bai nna saba si shadu sha na rai yang ting hkum nawng shawng kashin kau ai hpang she ga galep shadu sha u.Shawng ga galep kau ai hpang kashin ai rai yang saba si hta rawng ai lu sha dat n-gun ni hka kashin ai hte rau lawm mat ai majaw lu sha n-gun dat sum mat chye ai hpe mung chye tawn da nna lu sha jai lang let akyu hkam la nga ga ngu garan kachyan ya dat lu ga ai.