Magnesium Dat Gaw Hkum Hkrang Hpe Hpa Akyu Jaw Nga Ai Kun

Lamang hpe hkap madat n-gun jaw hkaja la nga ai tsawra hkungga ai shiga madat nu wa hpunau ni ndai lamang hta gaw magnesium dat a lam hte seng nna garan kachyan ya mayu ai.Magnesium dat nga nna anhte galoi mung na yu ai,tsun taw nga ga ai rai tim magnesium dat ngu ai gaw hpa re kun,hpa akyu ni jaw ya lu ai dat re kun ngu ai hpe gaw atsawm hkrak nchye na ai masha ni she grau law na ga ai ngu mu mada lu ai.

Ndai magnesium dat gaw hkamja lam a matu ahkyak ai- dat hpan langai hta na rai nga ai.Kaning re ai hkamja lam akyu ni hpe jaw ya lu ai re kun nga yang magnesium hpe kan sa tsi hku nna mung sung lang nga ai.Nam pum pum ai,kraw galau,ka-awn madawn ai,masin kahtet byin ai rai yang magnesium Hydroxide hpe sung lang nga ai.Kanu num ni ma hkum byin ai ten sai shadawn shadang rawt ai hpe jahkrat ya lu ai.Megnisum law rawng ai malu masha ni hpe sha ya ai gaw jitdwi ana hpe maga mi hku nna makawp maga ya ai lam rai nga ai hte salum sai lam pat ai ana,sai rawt ana ni hpe mung makawp maga ya lu ai dat hpan rai nga ai.

Magnesium dat ra kadawn ningra yang hpa ni byin wa chye ai kun – lu sha nkam sha ai,ga awn madawn ai,puba ai,hpam kahpram ai,bawk le le ai ndai zawn re ai ana kumla ni gaw magnesium dat ningra ai hpe madun ya ai ana kumla ni mung mai byin nga ai.

Masha langai lani mi magnesium dat kade daram shadang ra kadawn ai kun  nga yang asak (1-3) ning du hkra na ma ni hta gaw (80)mg ,asak (4-8) ning du hkra na ma ni hta (130)mg ,asak (9-13) ning du hkra na ma ni hta rai jang (240)mg,asak (14) ning lahta na la kasha ni hta (400-420) mg ,asak (14) ning lahta na num kasha ni hta (310 – 400) mg,ma hkum re ai kanu num ni hta (350 – 400)mg,ma chyu jaw ai kanu num ni hta (310 – 360 )mg ra kadawn ai lam chye lu ai.

Rai yang ndai magnesium dat hpe gara kaw na lu la mai ai baw re kun ngu ai hpe hkaja yu ai shaloi malu masha ni hta na rai nga ai tum hpan amyu myu,tsit ai nam law nam lap ni,latsan,shapre hpan amyu myu hte magnesium dat bang jat da ai malu masha ni sha ya nna lu la mai nga ai.

Tsawra ai shiga madat ni masha nkau mi dat lama ma ra kadawn dum yang bungjat n-gun tsi hpe madung  shatai mari lu chye nga ma ai.Kaja wa nga yang malu masha ni kaw na sha lu la mai ai dat ni law law nga ai re.Ndai magnesium dat hpe mung bungjat n-gun tsi lak san rai kaga mi mari lu nra ai.Mi sha tsun mat wa sai shingra malu masha ni hpe man man sha ya ai hte ra kadawn ai magnesium dat hpe law htam ai hku lu la mai na rai nga ai lam garan kachyan ya dat lu ga ai.